尋晚(9-7-2007 Mon)一行九人o黎呢o度食慶祝男性朋友C脫藥海飯局
我o係7:20pm到o左,同時有對中年男女walk in,不斷問經理要等幾耐至有枱,經理都有禮貌咁答冇答案啊,或者15分鐘吧(因當時係爆滿同有枱都已經book o左)嘩!星期一喎,唔係週六,日同公眾假期都咁full,咁勁?
而我o地當然係book o左枱o既一群啦.
坐低冇耐,後面張枱有片皮鴨食喇,我都嗅到好香,望落去,色澤夠深,我o地一定會叫呢道菜啦.
但因為我o地好多朋友仍然o係公司努力撕殺中而遲到, 主角為免被侍應們以不友善o既目光望住我o地,唯有o係六個人o既情況下,o黎一招’食住等’.叫o左
1.雞絲粉皮
份量唔算少,粉皮夠滑,唔錯.
2.素春卷.
好似唔係炸,應該唔錯o既,可能我自己唔係咁鍾意食呢樣o野啦.
陸續有人o黎到,但一來仍未齊人,二來大家想留肚食甜品,於是全程都係採取食完又叫o既方案.再叫四樣:
8.片皮鴨
因為今晚每枱都有order,呢個菜變o左係最遲o黎.除o左未食甜品外,已經食o左其他餸,但依然覺得呢個鴨幾好食,好過北京樓.
3.炒雜錦菜(係咁上下啦,唔記得正確名堂喇)
我食到有荀,紅蘿蔔同好大舊o既冬菇, 其他冇留意有咩料.呢個就普普通通啦
4.係咪紅燒豆腐呢?
都幾香脆,熱騰騰
5.鱔糊
呢個拭食啊,幾大礫, 鱔糊又多又切到大大件,又夠汁,OK啊.
食清光喇,唔係好夠,好奇o既我叫o左
6.高湯水餃
個窩算大個,但眼見有好多湯, 水餃好似唔多,為確保每位都有得食,就數吓.啊,有10粒水餃o既.於是限定每人一粒.一向o係外面食任何有湯o既食物(當然真係一煲煲o既湯例外)都唔會飲o個啲湯,但今次就因為被’高湯’二字吸引而叫o既就一定要試試,飲o左一啖,只係淡淡o既味精湯,失望.咬一口細細粒o既水餃,就食到好香o既韭黃味,豬肉丸唔太油,OK o既.
7.細小籠包
一客十個,又係o岩o岩好.啲餡同水餃有啲似,唔係咁熱,不過又係好過北京樓.
9.炸醬麵
係畀最遲o黎而冇食頭五樣o野o既朋友食o既.好大碗啊.不過冇湯上過喎,朋友問侍應menu寫明’伴湯’,侍應話係有寫,但o衣o家唔興有湯,所以冇.
10.拔絲香蕉
香蕉開始黐住喇,侍應都o黎唔切’掉’入冰水中,有一件散晒啊..整好後,要好快手食o架,唔……糖漿已經唔熱且已開始淋,唔太甜.冇我兩年前o係雲陽閣川菜館第一次接觸拔絲蘋果o既感覺咁好囉.
11.高力豆沙
皮薄薄,好多豆沙餡,,唔係太甜,OK.不過有位朋友因為唔食蕉,又怕佢至愛o既高力豆沙入面有蕉,於是搣開o黎探究,卻被佢發現有塊唔知咩o既o野o係o度,不過佢掉o左佢食o左就算.
除o左冷盤外,所有食物只都係微暖,覺得呢o度o既o野食係笑同OK之間,冇想像中咁好食.
環境
坐o係最角落o既枱,覺得唔算迫夾.
服務
一坐低,唔駛叫,就自己畀滾水同香片各一壺你,奇怪.
而o係上頭兩樣菜時已經攪錯o左,當我o地都研究o緊o個碟係咩o黎時,佢o地就自己走攞返話上錯.@_@”
當你未叫o野食時,侍應就多,但當你想搵佢時,就成日見唔到你囉.
埋單$1,013.00,經濟o既一餐.可惜今次飯局o既主角為怕我o地有人放飛機食唔晒一隻教化雞而冇預訂,於是我就同教化雞無緣喇,嗚嗚!!!!!!
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
