28/7/2008 Sat 1:40pm
肚餓,於是落街食o野,食麥當奴?但又唔想飲汽水同食薯條,而且又唔係平,又記得上次話想試吓佢o地$10.00o既秘製豬扖包,於是落o黎試吓.呢o度服務都幾好,一坐低就會畀啲餐具同杯茶你,兼同你講有快餐,但我搵極都搵唔到快餐牌o係邊,眼見$15.00o既豬柳漢堡下午茶餐,差四個字就到2:00pm,於是睇吓可唔可以搏大霧叫呢個,亞姐話未夠鐘,唔可以叫住,我話咁單叫呢,(因為我實在太肚餓喇),佢答唔知幾錢喎,我指向牆上o既價錢牌答$10.00,此時至發覺係唔同o既,係豬扖包(可能我餓壞o左),佢答:啊,唔同o架,豬柳漢堡就好似麥當奴o個啲,豬扖包就用新鮮豬扖整.咁我就決定要豬扖包o勒,佢話唔抵喎,要快餐啦,我答驚食唔晒,唔緊要啦,就係咁,我都係叫o左個豬扖包同凍華田.此時,我至見到快餐o既餐牌,全部都係飯餐,才$20.00,而我見到有人叫飯餐,都幾大碟,應該幾抵食o既.
好快,飲品到o左,今次唔同上次咁,唔係暖o既.
可能我太肚餓喇,望住水吧,見個廚師擺個包上o黎,諗住整好畀我啦,咦,未到o既?回頭一望,亞姐o係微波爐裡面拎返個包出o黎畀個廚師,啊,原來係叮熱個包,不久,大大個豬扖包到,亞姐話好低食.J
我多手打開o黎睇,有蕃茄片o係底,有唔太多o既沙律醬,件豬扖好熱,係o岩o岩煎起o既,大約有7mm厚啦.
食落去,都OK,不過諗唔到點解要叫秘製囉,蕃薯片都係新鮮o既.
亞姐o既服務唔錯,但豬扖包卻不足以令我畀個笑佢.不過做屋邨生意,呢o度已經好過百晉o架喇.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
