尋日(28-6-2007 Thur)放o左工出o黎攞o野,同朋友W兩個人o黎試吓點好食法.只係大約6:45pm o黎到,樓下冇食客,我o地沿長長o既樓梯上二樓,所有食客都清一色坐晒o係卡位,幸好時間尚早,重有兩個卡位剩,於是我一個箭步咁走到去轉彎位o既卡位o度坐.
兩位亞姐都冇招呼我o地,咁重好,等我o地慢慢商量,唔好催我o地.決定o左喇,為o左試勻呢o度o既招牌食品,唯有又冒住增肥o既危險,叫o左
1.$45.00錦鹵雲吞.
大概有8隻雲吞,大大碗甜酸汁.啲汁好稀亦好淡,配料亦有下面光頭惡漢所講o既,重有豬肝,雞腎,不過我試吓食啲配料,嘩!唔掂呀!唔知點形容,好難食啊,雞腎開始變硬,就連好簡單o既青椒都有異味咁,就只有菠蘿係正常o架.所以我o地都唔食佢啲配料喇,就咁點每隻只有一粒蝦仔o既炸雲吞o黎食就算啦.
2.$45.00焗排骨飯
賣相OK o既,飯裡面有蛋,橙紅色o既排骨,朋友即問係咪即係焗咕嚕肉飯?我都唔識答.食落,都係普通貨色.
3.$36.00干炒牛河
色澤夠深,但冇乜味又唔夠鑊氣.牛肉都OKo既,唔太老.
食完上述o既食物就知道我o地一定好飽,不過,畀吓面,叫o野飲吓啦.
4.$15.00紅豆冰
大大杯,有好多紅豆,紅豆都腍晒,唔錯o既.
5.$11.00熱咖啡
朋友周旋o係咖啡同奶茶之間,猶豫好耐至決定o既,佢話要睇一間茶餐廳o既功力就係o係飲品o度.
端上o黎o既咖啡,我都已經嗅到好香o既咖啡味,以前去茶餐廳,朋友飲咖啡我從來都嗅唔到咖啡香味,呢間係第一間.朋友飲o左大讚唔錯,夠香濃.
我o地覺得呢o度o既o野食只屬一般,唔值呢個價.如果話係一時失準?咁點解唔keep住水準令人覺得抵食同想再o黎幫襯?唯一就係靠懷舊o既裝修o黎吸引一次性o既顧客?的確係,尋晚親眼見到三個客人只係上o黎二樓參觀就走o左.
服務:
上菜速度略嫌耐o左啲,不過唔係亞姐o既問題,係廚師整得耐.
亞姐o既服務態度都OK啊,落單時佢見我o地兩個女仔叫咁多o野,都好疑惑咁re-confirm.到最後o既干炒牛河到來時,佢都問一問有冇叫干炒牛河.都唔錯吖,免得有誤會發生嘛.
環境:
冷氣唔均勻,朋友嗌焗,我就OK囉,建議開動o係轉角位o既吊扇o黎改善.而尋晚都唔多人,甚至到我o地走時(8:08pm)都有三個卡位吉o左.
註:
近樓梯有個古董收銀機,好有美應,好想擁有佢.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
