尋晚(14-6-2007 Thur)同朋友G捐完血,7:45pm o黎到補充能量,等到8:05pm有位喇.
我o地食o左
1.炸日本南瓜配蕃薯
每樣有四件,好熱,連醬汁都熱騰騰,呢點覺得奇怪.點o黎食,我覺得鹹o左啲,但南瓜同蕃薯本身都夠甜.不過朋友話鹹度o岩o岩好.
2.煎明太子雞翼.
有趣o既賣相,雞翼尖慣例係切o左出o黎,而雞中翼就釀滿好多明太子並被切成四段仔同垂直咁放,睇到直頭似係雞皮包住明太子.雞膇呢?又係冇o左.食落,好鹹,我覺得係炸唔係煎.
3.超級三文魚刺身
5件大大件o既,似三文魚扖,真係想用刀叉o黎享受.不過又唔見得好似lalachi話齋有根喎,幾好吖.
4.炸軟殼蟹
一客有好多件,不過又係太鹹,而且好漏.
5.壽司一次過上:
i.希靈魚
同朋友都被個名吸引同唔知咩係希靈魚,於是試吓.呢個神奇啊,件希靈魚係三色o既,10%銀色o既魚皮,5%一層白色o既肉,85%另一層金黃色帶有少少粒狀應該都係魚肉.我專登唔點wasabi淨食魚先(因為片魚都幾大塊,可以被我咁樣玩),金黃色部份好有趣,少少脆口,味道少少甜.朋友試第一口醒起,原來之前o係其他迴轉壽司bar枱食過,只係唔知咩名,諗落又係喎.繼續食落去,叮!有薑味o既?真係好神奇啊!一款壽司可以豐富味覺,同之前食o既簡直截然不同,朋友都覺得煥然一新,好玩.我覺得有創意,不過唔好問我係諷刺定讚賞,因為連我自己都唔知.=.="
ii.章紅魚
一般呢,冇乜特別,但由於被之前o既炸物(都未食晒)攪到飽飽滯滯,於是開始放棄食壽司飯,當刺身食.
iii.蜜味櫻花蝦
壽司飯上舖滿好多橙紅色約2-3cm長o既蝦仔.我夾啲蝦食,甜o既.不過唔係蝦o既甜味,而係調味料o既甜味,遂粒夾o黎食,發覺有一半只係蝦頭.而因為呢款係唯一有紫菜圍住,於是畀吓面食埋塊紫菜,噢!係淋o左o既.又夾吓啲飯食啦,有醋味,但點解之前兩款o既飯冇乜醋味o既?@@"
iv.鰻魚
都係一般,冇乜特別.
有問題:
以上排列係根據該店上菜o既次序,我同朋友都奇怪點解唔係上刺身同壽司先?個較年長o既waiter聽到答我o地因為刺身要切.但更奇怪o既係,隔離枱o既情侶比我o地遲叫o野食,佢o地快過我o地上菜,而且第一樣係角切三文魚刺身,之後就係壽司,諗極都諗唔明廚房(得一個人)唔係一齊整o既咩?而且佢o地好似諗住將刺身放到最後至上,但可能聽到我o地話好想食刺身先,所以o係中段上.不過攪到我o地食到好漏至食刺身,覺得有啲糟蹋o左咁.
服務:
舖仔細細,只有兩個waiters,一個廚師,o係坐無虛席下都算週到,而且有禮貌,唔錯.不過點解冇女侍應o既?
環境:
全部都係二人枱組合,簡單而靈活亦唔迫夾,OK.不過唔建議繁忙時間有人o係出面等位時,諗住o係o度食完唔走繼續坐o係o度傾偈,唔係店員會催人走,反而佢o地唔會理你,只係出面等位o既客人會不滿囉.其實大家識做會好啲.(我同我朋友當然唔係事件o既主角)
衛生:
好乾淨吖.
其他:
1.呢o度o既壽司都算抵,因為佢o地size比其他一般日本料理大件,有3.5cm闊,淨係食尋司都飽.呢餐簡直完全破壞o左我同朋友o既keep fit計劃.
2.綠茶夠熱,不過略嫌淡o左啲,係咪驚太濃令客人食唔到食物o既味道?
3.其實除o左希靈魚壽司o既另類創意我唔識欣賞外,其他菜式o既創意係可以o既.
分數高,但因為可能唔o岩自己胃口,所以只畀個OK.或者下次有朋友提到想試都會陪佢o黎o既,因為暫時o係荃灣始終會首選風月同藤一番
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
