8 跑多兩個圈還 脂 債

八十後出世的各位, 應該只知道有"百德新街", 而不知道這條內街的原來的名稱是"厚誠街", 由七十年代開始, 這條街就已經被命名為"食街", 但在九十年代的十分短暫時期, 曾經被改名為"名店坊", 包裝成專買名牌的小街, 當時大陸自由行還未在香港出現, 目標顧客都是香港的有錢人.....oh...sorry, 應該係"無錢"既香港人, 讀過吓市場學的商科生, 應該都知道名牌公司的目標顧客都是一般人, 如果名牌只做有錢人生意, 晨早執笠了, 最多賣名牌的人, 其實就是我這般普通的打工仔, 儲幾個月錢, 先捨得買隻幾萬銀既袋 ....攞出去威...吖麻....哈哈...

谷歌地圖上仍然有"厚誠街", 但街道上已經沒有"厚誠街"的路牌了, 此街道的店鋪地址也改為"百德新街". 講起"百德新街", 你會諗起邊首歌? ....  " ..在百德新街的愛侶，面上有種顧盼自豪……" 未聽過?? 你唔係"千禧後"出世, 就一定係"七十前", 首歌無咩嘢特別, 最特別係網上留言好笑: "點解在百德新街的愛侶，面上有種顧盼自豪…? …", 除咗係...係歧視 軒尼斯道、駱克道、謝斐道既情侶之外, 到底點解? 點解?? 答案自己去搵, 點搵?? "..站在大丸前你就會知道.." ... 喎

裝潢簡潔有特色, 用磚頭切成的底部, 未加修飾的水泥牆, 黑色粗獷型的金屬框, 大半部份用玻璃窗, 一眼望盡店內環境,  現代感強烈. 店內有二人對坐式座位, 還有L型 可望向街的吧檯式座位, 一邊吃, 一邊看風和人景, 特別舒暢寫意.

漢堡包系列, 餐牌中有32種不同款式, 而與牛肉有關的Burger, 共有10款, 我已經看中了其中最"邪惡"的一款、膽固醇指數爆燈的 : 鵝肝牛肉漢堡.....餐牌下半部份是海鮮類漢堡, 大致上是魚、蝦、蟹等類別, 約有13款, 隔離檯的一對韓國遊客叫了一款"龍蝦漢堡", 無意中偷聽到...好似幾好食, 好滋味喎... ("無意中 偷聽到"呢句好好用，公司最八啩既同事甲，日日都講呢句 ..) 

另一頁的上半部份是雞、鴨漢堡, 還有專為素食者而設的"烤雙蘑菇漢堡", 真的可謂應有盡有.... 下半部份是各式沙律和炸物小食.

飲品比想像中的多, 咖啡、茶、水、果汁、啤酒、紅/白餐酒、和其他半酒精類飲品, 款式多, 各適其適, 悉隨專便.

Iced Pineapple Fruit Tea ($38). 餐牌寫著 Homemade (自家製) 的 Iced Tea.... 想了一想, 有邊間餐廳係非自家製的凍茶呢.....哈哈... 甜度中等, 茶味夠 但不澀, 而且有很多菠蘿碎粒沉底, 用飲管, 吸一口, 便可以連菠蘿碎一起飲下, 好清新的口味, 表面放一片薄荷葉, 增加香味, 算交足功課有餘.

Kronenbourg 1664 Blanc ($68). 近年在香港大賣, 十分受歡迎, 這法國出品的輕度啤酒, 香味特重, 未飲已經聞到清新花香, 還有柑橘的果味和小麥的香醇, 泡沫幼滑, 清涼冰凍, 配炸薯條和炸雞翼, 不二之選!

Melted Cheese Twister Fries 芝士旋風薯條 ($48). 旋風薯條, 即扭紋薯條, 即叫即炸的薯條, 好食 .. 是常識吧. 絕對是 外表脆, 內裡軟, 加上熱溶的車打芝士, 入口香味濃郁, 質感強烈, 絕對是增肥恩物, 睇怕今晚要跑多兩個圈還債了...

Portobello Cheese Burger 大烤菇芝士牛肉漢堡 ($105). 此款漢堡用了肥厚多汁的Portobello mushroom (學名: 龍葵菇, 而台灣食店一般翻譯做: 波特菇). Portobello深啡灰顏色, 毛皮般的表面, 內裡呈黑色菌摺, 香港廚師通常稱為: 大香菇.

巨型漢堡包, 如常地切開一半, 十分高的身型, 層層疊疊, 最上層是大烤菇, 中層是極厚的漢堡牛肉, 漢堡牛肉表面鋪了半溶的車打芝士, 底層是一片鮮紅色的蕃茄, 還有那些據聞是自家製的"蕃茄洋葱醋"醬汁, 賣相已經攞滿分.

與朋友分享, 一人一半, 漢堡大件到...在拿起時, 都很難固定於手中, 所以不要拿走那枝竹籤, 好讓它可以固定整件漢堡包. 用手輕輕壓一壓, 麵包的軟熟度, 超乎想像, ..我把口都夠大, 剛好一啖咬了一個小邊位, 牛肉雖然全熟, 但仍然感覺嫩滑, 肉汁流出, 牛味濃郁, 咬落有嚼勁, 蕃茄新鮮多汁, 自家製的醬汁果然特別, 沒有千島醬的杰度, 但味道甜酸得宜, 清新可口.

Foie Gras Beef Burger 鵝肝牛肉漢堡 ($158). 精心佈置的外觀, 上檯時包面已經打開, 好讓客人可以清楚看到兩件厚切的煎鵝肝. 同樣用"竹籤"拮實整件漢堡的配料, 與"大烤菇"不同, 就是多了一份小型沙律菜.

近鏡可以看得更清楚, 鵝肝切得的確夠厚, 雙面煎得夠誠意, 啡啡的焦黑顏色, 芝士半溶解地包裹著整件漢堡牛肉的表面, 醬汁下還有一塊大大的生菜.

澳洲牛肉的牛味濃郁, 配上煎香了的法國鵝肝, 也是濃厚的味道, 這是雙"濃"出海.... , 哎... 忘記了...還有香濃的車打芝士, 真是"濃"爆的一餐, 入口甘香厚膩, 爽脆生菜和新鮮蕃茄, 絕對是最佳的配搭. 食完呢餐, 今晚回家要跑多兩個圈還"脂肪"債 ....

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================