8 失憶症又嚴重了...

尖沙咀區搵食, 我最喜歡的兩個地點: 「諾士佛臺」和「尖東海旁」, 午餐時段必選尖東, 無敵海景已經是無得輸, 但夜晚, 黑漆漆, 縱使有海景, 也不太吸引, 寧願揀「諾士佛臺」, 熱鬧好多, 交通又方便. 有人稱諾士佛臺是「九龍蘭桂坊」或「九龍Soho」, 我覺得是言過於實了, 皆因尖沙咀區, 仍然是本地人士居多, 外藉人士太少, 與蘭桂坊或Soho差天共地. 今晚七時左右到達現場, 燈火通明, 人來人往, 各式餐廳, 內外都放滿檯凳, 生意算唔錯了.

目的地是諾士佛臺1號, 位於美麗華商場側, 如不想行斜路, 可由美麗華商場入, 坐扶手電梯, 上一層, 途經「星爸爸」咖啡店旁邊的出口, 再上幾級樓梯便到, 慳番好多腳骨力. 全棟大樓都是食肆, 今天有約位於5樓的泰國餐廳.

一出電梯便見到大型招牌, 標誌用泰國國花: 黃金雨 (學名: 阿勃勒 Cassia fistula), 在上面再加一個泰式傳統殿頂. 店名「泰燒遙」, 玩食字, 同音「太逍遙」, 專賣燒烤菜色.

門口放了一塊 可能是 專登打斜的 宣傳木板: 8月生日晚市優惠, 另如果提早埋單或宵夜時入座, 可享免費甜品拼盤. 需出示ID card以核實, 十分合理, 否則鬼知你真定假咩?! 但對於一些視"年齡秘密"如生命一樣緊要的女/男士們, 便有困難了. (小弟公司就最多此類型的女/男士了)

近入口處的櫃檯, 設置了兩個串燒玻璃台, 第一個玻璃台, 放了很多不同的串燒食品, 由平均$15/1串(2串起) 至百多元也有, 價格合理.

第二個玻璃台, 放置了各式各樣的海鮮, 三、四十元起至二百多元也有, 明碼實格, 平貴適隨尊便.

地方寬敞, 空間感大, 座位距離足夠, 檯面闊, 是晚生意好, 全店滿座, 仍然坐得十分舒適.

是日推介: 洛神花茶 ($28), 「洛神花」名字真係改得好好聽, 洛神是古代神話中伏羲氏的女兒「宓妃」, 她於洛河被淹死而成為洛神. 進入了現代社會, 神話破滅, 今天就算真係「宓妃」翻生, 溺斃於「維多利亞港」, 也不會傳出個「維神」故事吧.... 洛神花被喻為「花中紅寶石」, 是夏天最佳消暑凍飲, 味帶酸, 像山楂, 可去油膩又有助降血脂. 聽店員講, 餐廳每天只做一煲, 限量供應, 賣完即止, 隔離檯遲來的客人想要, 已經賣晒. 洛神花含檸檬酸, 滋潤喉嚨, 味道酸甜、開胃、提神、甚至解醉, 如果怕酸, 加蜜糖, 味道一流!

泰式生蝦刺身 ($128). 這是我最喜愛的泰菜之一, 牢牢記住了泰文的讀音: Goong Chae Nam-pla, 拼音不易記?? 唔緊要, 記中文: 「公車攬霸」, 易記好多,  下次去泰國菜館, 記得搵位泰國靚仔或靚女 實習一吓 . 此店的「公車攬霸」十分特別, 以 Shot Glass 盛載, Shot Glass 即是 Shooter 杯 (唔知? 就當係高身的神檯玻璃杯吧....). 泰式生蝦 與日本刺身一樣, 講求新鮮, 但必然是用草蝦, 蝦身灰色紋理, 去腸拆殼後, 留尾殼.

泰式生蝦重點是醬汁, 以蒜、薑、辣椒、魚露、青檸製成, 比日式芥辣的單調味道更豐富, 還加上一片薄荷葉, 入口更清香. 蝦身飽滿光澤, 肉爽晶瑩, 把薄荷葉包著蝦身, 鮮甜脆口蝦肉和清香薄荷葉共冶一爐, 酸甜香辣皆有之, 絕對無得輸!

泰式酸辣鳳爪 ($88). 我研究了很多年, 到底「去骨鳳瓜」係香港先有, 還是泰國先有呢?? 小時候成日聽大人講三級笑話(此三級不同彼三級, 絕無"色"情之想, 只有"食"情之意), 話說....舊時「去骨鳳瓜」的製造方法, 係婆婆..., 細路仔時代聽完, 信以為真 (可能真係真㗎...哈哈哈..), 食飯時候都係無謂講咁重口味既話題了... 

悶熱夏天的最佳涼伴美食, 醒胃醃料醬汁, 清新檸檬汁, 冶味魚露香, 辛辣、酸、甜集一身, 去骨鳳爪, 脆口彈牙, 入口初時清涼, 咬落中酸微甜, 最後辣度上升至喉嚨, 刺激開胃.

青芒果軟殼蟹沙律 ($118). 又是一款炎夏佳餚. 青芒當造之時, 青皮黃心, 特別清甜, 不似「黃芒」的甜膩. 炸脆的軟殼蟹夠鬆化, 入口脆卜卜, 十分香口, 與青芒果絲和酸甜醒胃醬汁, 配搭得宜, 清爽解油膩.

吃完冷盤前菜, 未上熱食之前, 先來一枝白葡萄酒, 爽一爽喉嚨 (我的痴呆失憶症又嚴重了, 回家才發現, 只影了酒樽, 忘記影酒杯....) 新西蘭國藉, 出生於馬爾堡（Marlborough）的 Peter Yealands - Sauvignon Blanc 2013 ($400). 這酒莊根本就是有錢佬的大型玩具, 富翁Peter Yealands 偏要與眾不同, 葡萄園建在山坡上, 只是為了測試幾乎微乎其微的口味差異. (你話呢個世界, 有錢幾好呢... 哈哈...)

餐牌上的 Tasting note 咁樣樣講喎..: "ripe notes of passionfruit and guava", 的確, 有很香和清新的果味, 至於是否番石榴或熱情果...? 對唔住了, 我程度太低, 未能嘗到... 另外還寫著:"aromas of fresh herbs and blackcurrant", 未睇時唔覺, 但睇完...好似有神跡一樣, 立即感到了微微的草香氣味... 拿! 唔好質疑我既專業程度, 就係咁神奇架喇....  至於blackcurrant, so....sorry...., 我真的無能為力了..., 就算你講到明比我聽, 我爛泥扶唔上壁, 程度低, 真係唔覺, But anyway... 我反而覺得有一陣陣柚子香喎, 無論如何, 整體口感不錯, 酸度清爽, 收尾時微澀, 四百元的價格, 屬合理範圍.

泰式小食拼盤 ($148). 小食拼盤以巨型長碟盛上, 重點除了主角的全隻蝦的春卷、泰式蝦餅、沙嗲串燒、燒豬頸肉外, 還有重要配角, 就是四種自家製、兼改名改得好特別的醬料: 泰呷醋(Thai Sour Sauce), 泰嬌爹(Thai Satay Sauce), 甜酸雞醬(Thai Sweet & Sour Sacue) [餐牌上係咁樣寫, 唔好問我點解有個"雞"字, 有興趣不妨親自來問一問師傅..], 肉汁醬(Thai Meat Sauce). 另外, 餐牌上還有十四款不同種類的自家製醬汁可供選擇, 不同口味有不同要求, 落單前記得向店員了解一吓.

我最喜歡: 又軟、又滑、肥瘦雙間的豬頸肉, 然而; 豬頸肉本身就是世紀大謊言: 豬頸肉根本唔係豬「頸」上的肉, 而是豬臉頰肉. 拿...唔好話我懶醒, 我一早都覺得奇怪啦..., 我只聽到過 男仔同女仔講: 你「面豬登」好滑噃... , 而幾可有聽過: 你條頸好滑...吖? ...係化..? 此塊豬頸肉燒得晶瑩亮麗,  咬起來, 香、脆、嫩, 有韌性, 粘甜酸醬最好味. 另一款牛肉串, 肉質軟嫩帶原始的纖維口感, 燒得香口, 塗滿沙嗲汁, 淡淡縈香.

泰式炸蝦餅,  外皮金黃, 脆口鬆化, 內裡淡粉黃的蝦肉色, 彈牙爽口, 拈一些甜酸醬或沙爹醬, 味道超正! 而至於拼盤上那件「全蝦春卷」, 我所練的擒拿手, 未練得到家,  擒拿唔到, 但聽到同檯人吃得脆卜卜的聲音, 以及帶滿足的眼神, 已知脆爆兼好味道爆燈.

燒原隻鮮魷 ($140), 此為時令價, 即每晚不同, 近門口玻璃檯上, 明碼實價, 以每隻計. 在紅磡街市, 同樣大小, 睇怕也不下四、五十元, 餐廳賣一百四十, 價位適中.

碳燒大件原隻鮮魷魚, 睇見流口水, 以半厘米厚度橫切, 外表燒得半白半黃, 微微焦黑,  內裡仍保持雪白魷魚身軀, 惹味香噴噴, 配以此店自家製的醬汁"泰優魷" (Thai Squid Sauce),  夠晒和味.

以食用而言, 魷魚三部份 (不是做科學研究, 否則可能分成十多部份) 魷魚鬚和魷魚鳍最好味, 其次才是魷魚桶身. 近魷魚桶尾連鳍部份, 肉質不單彈牙煙韌, 還有脆爽口感, 我專登留下一點「泰式生蝦」用的特製青檸醬汁, 與濃郁惹味的魷魚配合得天衣無縫.

華欣特色咖喱蟹 ($328). 咖喱蟹是泰式餐館必食之選, 而華欣位於曼谷南約200公里的近海城市, 所以泰式海鮮多以此地命名. 把炸起的大肉蟹, 再放入香料和黃咖哩一起炒, 咖喱滲入蟹肉, 其餘醬汁淋面. 肥碩大蟹和黃金咖哩配搭得香豔動人, 味道飄香, 遠至隔離檯都聞得到.

超大隻新鮮靚蟹, 浸在香濃黃咖喱汁中, 肉質鮮甜嫩滑, 蟹肉厚實質感, 咖喱濃郁惹味, 伴白飯或法包都是絕配.

泰式爆炸豬手 ($258). 此店的炸豬手, 與別的泰菜館不太類似, 師傅用蒜頭、魚露、鹵水等調味浸過一晚, 然後花幾小時燒豬手後風乾, 再炸和放入爐燒.

放入火爐大燒, 部份燒焦乃無可避免, 切除略為焦黑部份, 試一口, 皮脆肉質鮮甜, 食落不肥不膩, 鬆化入味, 骨膠部份仍保持煙韌多汁, 軟腍度更勝一般的滷水豬手.

飛天炒通菜 ($75). 據聞起源於芭堤雅大排檔, 店主在一次炒通菜期間, 不慎弄至火爐失火, 火焰高燒似向天上飛, 食客與遊人以為表演, 於是掌聲不絕, 店主靈機一觸, 就把此菜命名為「飛天炒通菜」. 傳聞不知真假程度, 但這碟泰國運來的通菜, 炒得爽脆多汁, 葉嫩滑, 梗幼細, 菜味香而不澀, 雖然辣椒不多, 但辣度絕對不輕, 女士們要小心了.

燒遙特式炒飯 ($128). 「燒遙」取名於同音「逍遙」, 炒飯可以有幾逍遙? 這下子...可真的考起我了... 上檯時賣相吸引, 材料特多: 大蝦仁、蟹鉗肉、鮮魷魚、青口、還有脆皮燒腩. 飯身炒得金黃, 眼見也粒粒分明, 那件脆皮燒腩, 望見都流口水.

飯身炒得香口, 全沒有一嚿嚿, 而且少油, 粒粒金黃, 與乾蔥等惹味香料混合, 鹹香帶些少微辣, 配上一件皮脆肉香的燒豬肉, 入口更香更惹味.

泰式炒金邊粉 ($92). 「金邊」明明在柬埔寨, 但又不知甚麼理由, 金邊「粉」會變成泰、越兩國的名菜, 世事果真奇怪.... 炒金邊粉(Pad Thai) , 就好似港式炒米粉一樣, 只不過做得比米粉粗一點, 真是普通過普通, 把豆乾、芽菜、韮菜、蝦米等細碎材料亂撈在一起, 但泰國人卻超喜歡, 估計這也是最多人吃的一味泰國菜, 魚露味道突出, 有些泰國菜館會加入羅望子(Tamarind), 以增加酸味口感, 其煙韌彈牙和酸甜辣的味道, 叫人一試難忘.

炒金邊粉是甜、酸、鹹、辣味道共冶一爐, 初入口時甜味突出, 之後一點點酸味滲出, 繼而魚露的鹹鮮味, 最後感到微微的辣椒味, 如果想為舌頭帶來更清新的感覺, 吃時可試加點鮮榨青檸汁, 更添滋味.

燒虎蝦 ($48/隻). 此與燒魷魚一樣, 也為時令價, 玻璃櫃檯有列名價格, 以街市成本也要廿元一隻, 四十八元絕不算貴.

可能是最遲上的一道菜的原因, 又可能是我掛住與隔離吹水至忘形, 回家後整理相片, 才記起當時沒有吃到此味菜色, 但從外觀而言, 我已經好肯肯定...要去食多一次了. 但去之前, 睇怕都要去見一見醫生, 了解一吓我的「痴呆失憶症」是否需要加藥.....

泰式甜品代表首選, 非芒果椰汁糯米飯 ($78) 莫屬吧... 芒果糯米飯, 絕對是享譽全球的泰國名菜, 貨如其名, 並沒有甚麼華眾取寵的名堂, 也沒有甚麼超凡的點綴, 就是實實在在的原始芒果配原始糯米飯, 最多都是加一點椰漿, 這樣簡單的菜色, 竟然被泰國霸佔為國寶級甜品, 真係令「他國人」羨慕又忌妒.

凍的糯米飯可以如此好味, 已是一絕, 而糯米飯加生果, 中國人真是再有創意也想不到吧..., 軟香糯的米飯, 甜而多汁的芒果, 再加上濃郁的椰漿, 放入口中, 層次分明, 醒神開胃.

椰青糕 ($48). 雖然椰青糕沒有芒果糯米飯那麼國際聞名, 但仍然是被泰國據為己有的國家甜品. 新鮮椰青水加入椰青肉, 雪凍之後, 晶瑩剔透, 椰青絲滑口, 透明糕質, 味道清甜.

此店的營業時間好特別, 由下午3時至零晨2時, 不設午餐時段, 即每天一開門, 便是下午茶時間 (套餐都是四、五十元左右). 晚飯設有「早鳥時段」, 提前於7時半結賬離開, 可享八折優惠. 而宵夜時段更有七折優惠和紅、白酒買一送一.

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================