8 思前想後.... 煩過揀老婆

由 oasiswong 於 2015-07-13 00:00:00 發表 | 累積瀏覽 225

分類：

攻略日期：2015-07-10

是次消費：每人平均約HK$ 500.00

尖沙咀區眾多供應自助餐的酒店, 價格由最平的三百至最貴的九百. 想搵五百元左右, 網上大搜查, 研究了一整晚, 思前想後, 揀老婆都無咁頭痛.... 最後選擇了金域假日酒店. 星期五的價格略高於星期一至四, 可惜指定日子是星期五, 否則還可以平多八十元. 星期五的價格$598, 剪下Openrice的優惠卷, 可享有八折優惠, 但原來還有更平的付款方法, 就是匯豐信用卡, 竟然比Openrice優惠卷更著數, 可享七五折優惠, 連埋加一服務費, 盛為五百元一位. 另外最特別的是, 除了一般自助餐所實行的"七歲以下的小童免費"之外, 在暑假期間, 七至十四歲的小童也可享半價優惠, 這麼多的特惠配合, 唔使再多揀了, 立即打電話..….雖說...唔使多揀, 但訂位時, 又遇到了另一難題, 友人是”蠔痴”, 問一問....原來餐廳現時提供每天不同主題的款式食品. 雖然每天都有生蠔供應, 但星期一直情是以”蠔”為主題, 不單有兩款生蠔, 而且還有其他不同款式以蠔為主題的熱食. Friday or Monday: that is the question…la. 當然, 這只是友人的難題, 這麼麻煩的難題, 都是不要通知他了.... , 因為.... 我對星期五的龍蝦主題好有興趣….靜靜雞揀星期五算吧….哈哈..

假日酒店屬於香港望族"夏利里拉家族"擁有, 其掌舵人夏利萊(Hari Naroomal Harilela) 就剛於年尾逝世. 在薄扶林書院上課時, 曾經講及印度人在香港的歷史, 當時請到"歷史博物館館長"丁新豹先生來客席幾堂課, 集中講香港的外籍族群對香港的貢獻, 夏利萊是其中的討論範圍, 但講及的事情不太多, 反而, 另一位, 也與金域假日酒店有關的印度人: 麼地(Mody), 更加深入講及其事跡, 畢竟, 麼地曾經在關鍵時刻捐款給香港大學, 在講大學歷史時, 不可能跳過不講, 金域假日酒店座落的位置正就是以麼地命名的”麼地道”.

自助餐下午六時開始, 準時到達, 立即有得食. 首先行沙律區, 自製一道賣相不錯的龍蝦沙律. 新鮮沙律配波士頓龍蝦, 自己調較最愛的沙律汁: 三成Caesar sauce, 三成Italian sauce, 三成Blue Cheese sauce, 最後加多一些olive oil, 味道最合我心意. 爽口的羅馬生菜, 軟嫩的紅珊瑚菜, 微微腥的狗牙菜, 苦澀的火箭菜, 正所謂吃得苦中苦, 方為人上人, 小朋友嘗苦瓜為”苦”, 成年人嘗苦瓜為”甘”, 口味呢家嘢真係仁者見仁, 智者見智, 不同程度, 食出不同味道, 你食唔出, 我幫唔到你了.

龍蝦就無沙律菜咁煩, 口味應該唔會有大差異, 我真係未聽過有人唔鍾意食龍蝦喇...., 龍蝦品種多的是, 澳洲龍蝦和菲律賓花龍蝦當然是上品, 但間中一嘗波士頓龍蝦也有另一番風味, 迎年不單西餐廳多了供應波士頓龍蝦, 就連中菜館也推出很多不同煮法的龍蝦菜餚, 原因是近十年的全球氣候暖化, 令波士頓龍蝦產量大增, 大量供應之下, 價格三級"下跌", 如果不是國內需求相應增加, 估計價格跌得更大. 波士頓龍蝦肉質絕不遜色, 中間身體部份啖啖肉, 彈牙度爆燈, 近頭部的蝦膏, 入口濃郁鮮味.

我沒有友人對"蠔"那種痴心, 但都有一點兒愛慕之情.... 生蠔櫃位有專人開蠔, 夠晒新鮮, 但每次只限取三隻生蠔, 開蠔好手, 功夫了得, 十幾秒一隻, 基本上不需等, 也見不到要排隊, 即去即攞, 只需閣下行多兩轉, 食完三隻, 行一轉再攞三隻, 這安排對我不構成問題, 食完三隻, 行一轉, 有助消化, 好吖! 但友人是蠔痴, 死要一次食六隻, 他想盡辦法要一次過攞六隻, 不停地與"開蠔阿姐"打牙骹吹水, 好彩阿姐也好健談, 我無眼睇了….

生蠔的最佳拍檔就是檸檬汁, 千萬別加茄汁或辣椒仔, 浪費了蠔的鮮味. 問一問開蠔好手, 這晚供應的是美國蠔, 但沒有再問蠔的品種. 一般以為美國蠔通常外型大隻而味淡, 其實細隻的Kumamoto也是出產於美國的, 但這晚供應的品種也是屬於小型細隻. 的確, 美國蠔的口感較為清淡, 金屬味輕, 但勝在肉厚軟身, 入口不失爽脆, 鮮味而甜.

魚生櫃位有多款刺身供應, 但我只好其中三款: 甜蝦, 三文魚和吞拿魚. 尤其最愛吞拿魚, 看見魚生櫃內的吞拿魚, 顏色粉紅, 新鮮度十足, 今晚要食過夠.

甜蝦鮮味不在話下, 攞了三次, 食了二十隻都有. 三文魚厚切, 那種鮮橙顏色的外表, 未入口已知絕不會失望. 吞拿魚是我最愛, 我亦理解自助餐的水準未必太高, 師傅用的"刺身大刀"未夠鋒利, 下手時也未夠狠心, 結果這片吞拿魚的切口散爛了, 然而, 賣相雖差, 但沒有影響口感和味道.

吞拿魚運動量大, 而且是偏向無氧運動, 無氧運動會增加乳酸(Lactate), 平常遊水速度在100km/小時之下, 被捕捉時掙扎, 速度可達180km/小時, 肌肉突然應變, 乳酸快速增加, 被捉上岸時, 因死亡而氧氣不能供應至肌肉, 乳酸無法運走, 肉質偏酸更加明顯. 愈深色的吞拿魚, 酸味愈高, 是因為被釣後大力掙扎, 魚身溫度上升, 血管爆裂, 乳酸隨血液流入肌肉, 味道更為偏酸. 這裡供應的吞拿魚顏色呈粉偏紅, 已經預示了新鮮程度, 無酸味, 入口鮮甜, 好滿意.

要食出刺身的鮮味, 絕對不可以落芥辣, 尤其是辣度甚高的行貨芥辣, 否則只食到蹌口味感, 浪費了新鮮的魚肉鮮味.

多款芝士供應, 但我只鍾情兩種: Brie和Camembert, 我對Emmental無甚好感, 個人口味, Emmental 只應用來做三文治…哈! Brie和Camembert的味道最相似, 如果想慢嘗兩者分別, 那自助餐就是最好的機會, 任你食..... Camembert產於Normandy, Brie 跟本就是地區 Seine-et-Marne, Brie較大, 似Pizza, Camembert較細, 大約八安士左右, Camembert 清新芳香, 帶奶油香味, 而Brie會有菌香帶些酸.

Soft ripened cheese味道溫和, 濃烈度不高, 作為頭盤, 不適宜配餅乾, 較新潮的口味當然是配青瓜條或蘿蔔條, 當然, 如果閣下口味再特殊, 可以到甜品區取幾片生果, 保證口味特別有驚喜.

走一輪熱食區, 首先看見燒牛肉和燒豬脾, 回座位時, 友人大讚豬脾配蘋果醬, 我掛住發噏風, 忘記了"相機先食"的原則....哈!

這樽超水準花膠燉湯, 是女士們的恩物, 一小盅但絕不欺場, 配料足, 有龍眼肉, 豬展肉, 大東菇, 白蓮子. 當然, 花膠煮湯比較麻煩, 時間要控制得宜, 畢竟, 自助餐不可能用大件貴價貨的厚身花膠, 而太細和太薄的花膠, 煮得太耐會溶, 而用燉湯方式, 一方面, 不怕煮至溶掉, 另一方面, 燉湯比老火湯更存氣, 可保持養分, 湯水清而不膩. 如果加些蟲草花更正呀… (好似係...)

之前食過屬於冷盤類的水煮龍蝦, 熱食區也有另一款焗波士頓龍蝦, 透過烤焗, 芝士醬滲入龍蝦肉, 龍蝦肉嫩滑鮮味, 配合滑溜芝士白汁, 龍蝦味道更豐富.

德國燒豬手, 切件任取, 曾經出晒名的德國菜餐廳, 就是位於金域假日酒店地庫的Delicatessen Corner, 開業四十年, 於上年五月結業, 結業消息一出, 想訂位見最後一面都無望, 結業前的整個星期都完全爆滿. 其鎮店王牌"德國燒豬手" 轉過頭來, 走上了兩層的Bristo, 舊食客終於可以憑弔一番了....哈哈...

德國燒豬手, 雖然沒有了最佳伴侶"酸椰菜", 但燒至脆身的豬手, 皮脆爆兼惹味, 已經很滿足.

印度人做老闆的食肆, 你不會懷疑其出品的印度咖哩吧... 雖然只有兩款咖哩, 但做得出色. 香料味道未算出眾, 但咖哩香濃, 辣度中等, 適合全家大小.

兩款印度薄餅: Naan 和 Pappadam.

個人口味, 最愛反傳統, 印式flatbread: Naan, 綿厚口感, 塗些乳酪, 果醬和蒜茸牛油, 好味程度不失於咖哩汁, 而薄薄的印度脆餅papadam, 配咖哩牛肉就最好味.

繼續龍蝦停不了, 中式炒龍蝦鉗, 自配西蘭花蝦球作點綴, 大大隻的龍蝦鉗, 白嫩勁彈的啖啖龍蝦肉, 到此已經九成飽, 係時候走走甜品區.

甜品做得小型精緻, 可以試齊各款又不會過份飽.

還有多款小果撻, 今次真是太飽了.

小型燉蛋, 好似豉油碟的大小, 不可放過.

燉蛋與西瓜一起入口, 減低肥膩度.

其中最特別的甜品櫃, 一系列裝飾過的甜品, 賣相太好, 吸引力高, 迫住你起碼攞一碟.

十足十高檔西餐廳的餐後甜品, 縱使飽上了心口, 仍然要一嘗.

Häagen-Dazs 的雪糕專櫃, 意想不到的供應五款口味, 但與我無緣了, 此時此刻, 飽到上口嚨了, 最多食一款.