7 有趣的形容詞 牛

午飯時間, 無無聊聊, 與同事到咖啡店發噏風, 話題當然離不開講公司壞話….. 咖啡加麵包, 睇睇免費報紙...又一餐, 報紙廣告見范生范太介紹九龍城火鍋, 同事話好耐無打邊爐, 就不如放工繼續吹水, 可以再大講特講公司...... 老闆肯定全日眼眉跳….

這店的名稱是”牛精皇”, “牛精”是廣東話的形容詞, 用來形容 脾氣暴躁和橫蠻火爆等性格的人. 廣東人可能對”牛”沒甚好感, “牛”作為形容詞, 專用在不太好的貶義方面, 例如: 死牛一便頸, 拉牛上樹, 牛唔飲水唔禁得牛頭低 等等, 全都是負面形容. 但北方話是另一回事, “牛”通常是正面意義, 多用來讚人, 例如: 他這個人真牛, 太牛了等等..., 北方人用”牛”字, 等同廣東人用”勁”字, 這麼完全相反的意思, 很有趣, 要再研究一下出處源頭, 才可以了解因由.

第一次幫襯, 通常選擇招牌握介, 五隻手指公的第一隻: 招牌牛精鍋 ($198). 其實都好想食”海底椰豬肺鍋”, 好喜歡那種白白的豬肺湯底, 但兩者選其一, 都是先試招牌推介為上.

近年很多火鍋店都提供海鮮刺身等食品, 但我都是思想守舊派, 打邊爐時不太習慣生食, 就算最鮮甜的象拔蚌, 我都要放入湯浸一浸才入口. 這店也有提拱不同的魚生刺身, 同事對生蠔有特別興趣, 見價格不貴, 就落單要了兩隻Gillardeau No.2. ($38/隻). 三十八元, 只是一般外賣店的價格, 定價中等.

賣相驟眼不太肥厚, 但入口完全另一回事, Gillardeau出名結實脆口, 食蠔習慣只加些少檸檬汁, 落茄汁食蠔根本是浪費美食. 第一口咬落, 肉質口感絕對夠厚身, 有彈性之餘不失爽脆感, 然而海水味道偏重, 有些少蓋過了蠔味.

同事和我有一點相似, 就是打邊爐時喜歡續樣落單, 慢慢食, 食完一樣再叫一樣, 不會一次過叫晒上檯. 首先是牛精鍋及其配料, 包括有: 牛肚, 牛肺, 牛尾, 牛腩, 牛孖筋, 牛膀.

牛雜之中, 我最愛是牛肚和牛膀. 在湯裡不斷地翻滾, 蜂巢肚煮極不易爛, 一口可咬開之餘也不失煙韌. 牛膀切片厚度略高, 雖未達至沙粉口感, 但都軟熟綿綿.

牛肚的蜂巢造型十分四正, 厚身的牛肚邊, 絕不過韌, 入口彈牙.

牛尾是意想不到的出眾, 煮得夠火喉, 一咬已經骨肉分離, 但邊位的皮和膠質, 仍然彈性十足, 口感似牛筋, 但沒有牛筋的韌度, 連牛尾肉一起咀嚼, 比所謂的牛筋腩, 更勝一籌.

范生范太介紹那款 本地手切牛頸脊 ($298). 近年多了專賣牛肉的火鍋店, 牛頸脊也是重點推介項目, 但一般的火鍋店都會把牛肉切得四正的長方型, 此店反而切成不規則的形狀, 更顯得那種手切牛的質感.

牛脊位置也是常活動部份, 但未至於有很大勞動, 所以脂肪均勻中也帶些少厚雪花紋.

靚牛肉, 只需熱湯灼一灼至七、八成熟, 雪花脂肪分布於肉中, 牛肉味濃, 牛脂味香, 入口甘香鬆化, 軟滑腍度剛好.

手打三寶丸 ($98) 也是推介項目. 手打丸造得比一般的大粒. 墨魚丸彈牙度最高, 反而墨魚味道偏輕一點, 如果可以混一些小墨魚切粒, 口感將會更好. 蝦丸是我最喜歡的必食項目. 手打至膠狀, 彈牙度十足, 入口蝦味濃, 好滿意. 鯪魚球不是我所愛, 但都食了一粒, 口感比較一般的實, 魚味足但不腥, 對於我這般怕”鯪魚球”的人, 也算不錯.

肚子已經八成滿, 與店員打牙骹, 發吓噏風, 講吓生意經之時, 想落單叫碟生菜, 店員提議我們不如試吓即炸紫菜響鈴 ($63). 上檯時賣相的確有創意, 以腐竹皮包著紫菜, 即叫即炸, 入口時還有熱熱口感.

響鈴的最佳食法是放入湯內浸一浸, 半秒就夠, 入口還有炸後的脆度, 又有濃湯味道, 口感與味覺雙料齊美.

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================