本來去Mira CoCo, 入到去, 三張吉檯無人坐, 店員話全都被訂, 要坐圓形擺設的高座, 同事丙腳短, 怕坐得唔舒服, 唯有去 The One 既 Harlan’s, 是實上, 同事丙好鍾意Harlan’s, 佢好鬼喜歡Harlan’s 員工果種服務態度, 好鬼馬, 對客人愛理不理, 好似求佢比你幫襯咁樣, 真係好鬼正喎….哈哈...。

我的友好同事, 屬姑姑寒寒的性格, 買親嘢必定問長問短, 但係...依家D後生仔無耐性麻... 你問長問短, 又唔知係未幫襯, 加上...人地出咗名, 生意唔憂做, 就梗係面黑啦...。

尤其是去所謂的高級店, 雖然服侍閣下的服務員, 與閣下的收入和階層，也不會相差很遠，但佢地就係睇你唔順眼囉….哈哈哈哈… 我都要講句: 至憎D客問長問短, 斤斤計較, 吭!! 無錢就唔好嚟買嘢啦!! (我話緊我, 唔好諗錯隔離….哈哈哈哈). 嗱..嗱..嗱!! 講清楚D, 事先聲名呀, 今日服務我地個兩位美麗女店員, 好有禮貌呀, 態度非常之良好, 對答十分之得宜呀, 同事講緊佢上次幫襯咋, 唔係今日呀, 你唔屈我呀!!!!!

Mousse au Chololat-banane, 焦糖香蕉法國朱古力, $46. 法國朱古力製造商, 兩家(Valrhona和Michel Cluizel), 比起Godiva, 便宜一個級數, 但水準絕對不失色. 名牌食品與名牌手袋當然不同, 買名牌食品, 縱使都有炫耀指數, 但肯定不高. 食落口既嘢, 味道最緊要, 而女士手袋, 如果不是名牌, 話之你手工好到一流, 始終無人願意付名牌的價格去買.

賣相絕對有水準, 深啡色光滑的表面, 放上一件鮮黃的馬卡龍, 加上一片薄身的曲朱古力片.

切開一半, 樓上的馬卡龍, 經不起時間的考驗, 內裡的糖漿已經收水, 刀一切, 隨即爛開碎裂, 但無影響味道, 入口仍然鬆脆, 焦糖慕絲溝入了香蕉味, 甜度中等, 入口香甜軟滑, 包著外層的薄身朱古力膠布, 甜度高 有些少漿糊的口感, 兩者 味道配合得也相當得宜.

Le Matcha, 綠茶法國朱古力, $48. 這款名為”加勒比”的Valrhona朱古力, 果酸味輕, 有杏仁和咖啡豆香味…. 描述是從網上抄出來, 我就食唔出了, 你食得出!?!? 蒙眼試食喎! 哈哈哈哈… 我相信如果是原始純朱古力, 是可以吃得出分別, 但已經製成了的慕絲…. 就難度高了. 此款蛋糕的另一重點是加入了君度(Cointreau)的橙味甜酒, 80後的年青人可能對”君度”這牌子不太熟識, 但我們這七十初期的一代, 肯定會記得當時賣的”君度”廣告. (https://www.youtube.com/watch?v=Trpf3GNBAIo). 其實君度橙酒的酒精度頗高, 達40%, 不過這件蛋糕入口時, 完全感覺不到橙酒的香味.

名為”matcha” (抹茶), 賣相比之前的”焦糖香蕉”更吸引, 用非常薄的朱古力薄布包著蛋糕周邊, 上面唧了一圈的朱古力小花, 中間一隻白朱古力小波, 這種用白糖做小波波, 只是得看字, 絕對唔好食.

又是一刀切開一半, 抹茶味的慕絲包裹著朱古力慕絲的核心, 口感與之前的”焦糖香蕉”無大分別, 抹茶味道未算太濃, 但甜度比較高, 未知是否”君度”橙酒的關係, 我都是比較喜歡”焦糖香蕉朱古力”.

食蛋糕, 咖啡是最好配搭, 愈甜的蛋糕, 配愈濃的咖啡. 這店的咖啡是用LAVAZZA出品, 啞….法國蛋糕配意大利咖啡, 唔….. 哈哈…我要了一杯拿鐵(Latte), $30. 價格定得比想像中低, 來到檯時, 表面的顏色顯得不均勻的深啡色, 缺了些美感, 但飲落, 水準非常好, 夠濃厚之餘, 全無澀味.

至於同事的那杯 Green Mango Peach Tea, $32. 貴過我杯咖啡, 最長名稱的一款茶, 友人飲了第一啖, 聽佢講….有茶味…, 再飲一啖, 唔..唔… 有茶味… 哈哈哈哈….笑屎我了.

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================