星期五晚的旺角, 認真非同小可…., 我係講食肆排隊條長龍, 原本打算去太子”淩發”潮州打冷. 到步後, 見到場面太震撼, 接近七、八十人在門口等位….唔使諗, 即走. 改去旺角”新泉發”, 到步, 場面都唔少嘢, 也有三、四十人在等. 卒之走了入隔離的茶記”新君豪”.

此等近年開的茶記, 睇正”自由行”當旺, 專做大陸人生意, 心諗…食物質素都唔方好. 其實不關是否大陸人, 通常做”遊客”生意的食肆, 服務態度多數唔錯, 甚至好好禮貌, 但食物質素就甚差. 服務差, 遊客未幫襯已經走人. 但食物味道, 食了落肚才知，食完後才知上了當, 而且遊客都未必分得出當地食物味道好壞, 他們分分鐘以為當地的味道就是如此. 就算食得出, 遊客”以訛傳訛”的影響能力, 也不及本地人. 做本地客生意的食肆, 要迎合本地人, 食物要有水準, 因為好快一傳十, 十傳百. 但做遊客食完一次, 就算唔好食, 都唔會傳得到去第二個遊客, 況且, 遊客在旅遊時的包容度比較高. 當然, 除非該店要衰得好緊要, 衰到可以國際出名, 咁就另話…

潮州滷水鵝, 大碟$90, 小碟$70. 在無期望下, 反而有驚喜. 但絕對不是期望下調後的主觀感覺, 而是再三經友人証實. 這店的滷水鵝, 絕對不會比”新泉發”的差. 滷水色澤深, 味道夠濃, 但偏鹹一點, 鵝肉嫩滑, 鵝皮帶點肥, 女士們怕怕, 男士們覺得剛好, 有些少肥, 入口才甘香, 送酒一流.

正所謂….消費者用腳投票, 我們用銀包裡的銀紙投, 食完一碟九十元的大號, 再要多碟七十元的細號. 但好似..大小差唔幾多....

韭菜豬紅, $40, 這就沒有滷水鵝的出眾了, 但都算是合格貨色. 豬紅爽口帶脆, 韭菜有渣略為韌, 上檯熱度未算熱到辣口感覺. 然而, 味道仍算十分好.

藍妹, 夠凍, 但未去到凍入心那種. 全店坐位十分迫, 但起碼有背坐位, 新泉發的坐位無背, 坐得更不舒服.

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================