8 發噏風....

免阻大家時間, 先講結論, 後再研究各款食物. 上星期剛吃過另一間九龍的一星店: 沒有海景的”海景軒”(“商品說明條例”….應該無包括店名吧…哈哈..). 主觀感覺上, 一星店與三星店的差別, 只在服務水平, 而食物方面, 除貴了差不多四成的價格外, 食物口味方面, 真的恕小弟食不出有很大的不同, 甚至…些少主觀認為, 我一星期食幾次的灣仔”利苑”, 與星級店相差無幾. 各位食評家的大哥大, 可否客觀一點, 心諗….如果用一招: 朦眼試食. 幾間比較出眾的小菜酒家師傅, 同時做相同的菜, 你食完…分得出邊間係一星、二星、三星店, 我真係可以寫個”服”字…..兼請閣下食翻餐又得啫…哈哈…

鬼佬評中國菜呢家嘢, 真係好特別…. 連續四年都獲得米之蓮三星, 食物質素當然無問題, 但是否出眾, 全港最好..… 我都係個句, 朦眼試食可知真正高手…. 當然我明白, 在此用餐, 包括埋環境與服務的價格, 但…咁…即係…承認此店的食物並非物有所值? 拿…我無話過”環境”和”服務”唔值錢呀.. 講計數…數口? 我都唔算差…, 服務呢家嘢, 頂多比你收貴二十個巴仙吧, 想再高D呀..!?? 你餵埋我食咩?!? 最衰, 我唔好呢家嘢….哈哈哈…

服務水準如何高級?? 只係換杯, 都可知一二. 原本放檯的普通中長咀(Tall Wine) Cabernet酒杯, 我們飲Burgundy, 要換闊口, 於是, 單就換酒杯都要用咗二十分鐘. 因為要續隻續隻換, 攞一隻, 換一隻, 每一隻都要行一次去後面餐車, 唔可以一次過換晒檯面的杯, 重要注意, 千企唔可以出現杯撞杯的玻璃聲…..咁未就係高級囉…哈哈…我覺得…好有星爺既攪笑feel呀…哈哈…

Vougeot Premier Cru 2005, 友人揀, 我無睇Wine Lists, 好似聽到侍應哥哥與友人談過, 大約港幣千五. 哈…即刻上網了解一吓. ”Wine Monopole”網站 有得賣, 價格…好有意思..哈哈..:港幣689, 個號碼, 似曾相識,…哈哈. (真架, 無老作, 有興趣可以自己搵搵, 呢到好似唔比放公司網址). 至於味道, 我只係飲開”新世界”既平價貨, 法蘭西既出品, 我真係識條鐵…, 不過, 還可以對比一吓網上的評價吧: 【紫羅蘭香和類似櫻桃…】, 唔講唔覺, 講完即刻feel到些少…哈哈.... 【有矮木叢、落葉、松露氣味”】…嘩, 星爺話齋, 程度好高喎, 我程度咁低, 想像唔到……., 至於【單寧雅緻, 酸味較為均衡, 餘味有甘草氣味…】…每人分得三分一杯, 飲晒都未試得清楚, 咽咿..….

杏香墨魚球, 炸脆了的杏片包在外, 內裡墨魚丸單牙, 以青瓜片墊底, 加上拉幾下鮮橙黃色牆汁在碟佈置, 要數最美觀的一碟菜, 竟然係這款免費贈送的小吃…哈哈..真有些意想不到…

片皮乳豬件, $360, 師傅先把皮下所有肥和瘦肉切出, 只剩下薄薄的脆皮, 再把切出的瘦肉一片放在底部, 中間加了一層小小麵餅, 食落完全沒布肥膩感覺, 可惜每人只有一件, 唔夠喉, 此片乳豬, 大約3cm x 3cm的大小, 計一計數, 即係$45/一件, 心諗, 係新斗記, 三百六, 可以食到半隻豬喇, 新斗記的水準有無三星店咁好!??... 唓…! 新斗記最差就係服務水準, 無嘢差得過服務啦, 新斗記既乳豬當然唔會差過呢間三星店啦, 而且, 我應為, 起碼, 熱度, 一定新斗記勝一籌, 因為唔使攪來攪去, 切來切去, 先攞上檯..囉…呵呵…

甜芥辣燒鱔, $280/八件, 味道的確夠特別, 十分微微的芥辣味道, 有重重的蜜味, 半脆半韌的表皮, 街外從未食過. 這使我想起, 前幾個月, 在油麻地街市內的”源興美食”的燒鱔, 兩款口味都各有不同, 這裡的脆中帶醬汁的濕潤, 而”源興”的是乾身的硬脆. 兩者比較, 味道各有優勝, 打和. 而如果只講口感的話, 龍景軒的”甜芥辣燒鱔”, 略勝些少… 但問題係, 源興的燒鱔, 只賣$150/十件….友人即刻打斷我發言…話: “嘩..嘩..嘩…你搵間..唔知咩嘢無喱頭店..同米之蓮三星比?!?!?! 唔係化?!?...” 噿..…Hermès隻袋係貴在個牌子, 唔係貴在質素呀! 懵丙!... (我心裡同自己講…哈哈)

酸辣班片湯, 搵晒成本餐牌都搵唔到, 可能係友人之前食過再叫, 其實即係上海既酸辣湯, 加三塊星班片, 酸辣湯做得出色, 少少辣, 少少酸, 好平均. 配料切絲, 切得好幼細, 街外一般上海菜館, 不可能做到, 口感一流. 但星斑塊略遜, 入口, 微微的魚肉腥味.

菜胆北菇燉竹笙, 友人要了另一款湯, 無飲過, 無意見, 聽友人形容: “清清地…幾好吖..”

焗釀鮮蟹蓋, $220, 餐牌上寫著, 焗釀的蟹肉內有洋蔥, 但食唔出太重的洋蔥味, 蟹肉味道… 好有蟹味…囉…哈哈哈哈. 外表的炸皮做得不算厚, 脆度高, 內裡的蟹肉餡中規中矩, 以口感而言, 蟹肉質素好.

龍帶玉梨香, $280, 炸球, 外表微微一層薄身的炸粉, 內裡是梨、帶子、火腿. 入口, 三樣味道都唔太重, 入口, 未睇餐牌, 唔知用甚麼材料, 咬入口時, 只認得有帶子. 無論如何, 三樣食物扣在一起, 整體口感與味道都幾特別.

子薑爆鴛鴦雞, $240, “鴛鴦雞”, 即係雞肉和田雞肉, 街外好多食肆都有供應, 但多數都係以煲仔菜為賣點, 很少以普通小炒碟上, 個人的主觀口感而言, 除了子薑入口幼嫩外, 雞件與田雞肉也不是特別出眾. 當然, 田雞肉是只取腿部, 一般食肆難以跟隨, 但講到新鮮肉質味道和口感, 近排食過的佐敦小店的即擋田雞, 絕對超值.

彩椒豆豉爆羊展肉, 又係搵唔到價錢的一碟, 估計都係三百元左右, 但..”羊展”? 一啖, 咬落, 唔似係展肉, 不過, 可能係我孤陋寡聞, 羊展的”展”, 並不同牛展的”展”…哈哈…. 味道較濃, 肉質就非常軟熟.

如意琵琶映紗窗, $280, 類似鮑魚菇的東西放中間, 竹笙卷著蘆筍, 撈有些少雜菜碎的豆腐. 總共四件, 基本上唔夠六人分….呢四件齋件, 收二百八, 哈…. 服未!?…

玉液銀杏扒鮮支竹, $180, 即係白果炒蛋白與腐竹, 蛋白都算又軟又滑. 鮮腐竹, 較厚身, 口感尚算滑. 整體口味清新.

龍景軒炒飯,$360, 內有龍蝦肉粒, 味道似加了些少蛋黃, 味香, 飯身炒得未算超卓, 尚可稱做免強的粒粒分明, 其實照片也大概看到, 可能是因為師傅的炒法, 並非十分乾身, 想保留水份, 希望飯身不致太乾, 但唔太合我胃口, 我喜歡超乾身的炒飯. 個人而言, 但除了高價食材外, 我覺得此店的炒飯, 不及”海景軒”.

仙翁米香芋西米露, $60, 唔好意思, 我覺得只是一碗普通的芋頭西米露, 與一般甜品店的差不多.

生磨合桃露, $60, 我無食, 其中一位友人食完後講了句: “紅磡的芝麻綠豆糖水鋪, 都有合桃露, 都係生磨, 二十蚊一碗, 口感好幼細, 好滑….” 致於面前的一碗….佢無多講了….哈哈..

認為龍景軒有神級地位的大哥大們, 千企唔好怪小弟無禮, 食評只是供個人玩樂, 發吓噏風而已...見諒...最多比翻個"讚"吖...

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================