31 AUGUST 2015(MON)
原本都只係想煲馬蹄竹蔗茅根水等小小豬清熱下火,就係我買材料嘅時候,店員嬸嬸就教我加埋粟米同粟米鬚去煲,話個效用更加好,就係咁我就試下煲依個粟米馬蹄紅蘿蔔竹蔗水啦~材料有竹蔗、茅根、粟米鬚、馬蹄、紅蘿蔔及粟米,份量方面就同店員講大約幾多個人飲,佢就會幫手執啦!
今次新加入嘅粟米鬚,嬸嬸話係新鮮晒乾,所以要先浸洗半個鐘,咁就會乾淨返啦~
加左粟米同粟米鬚一齊去煲,個味道又真係唔同啲,完全唔洗加任何糖,都好清清甜甜,飲落有好香嘅竹蔗味之餘,仲有好濃嘅粟米味,真係唔錯。最好就係小小豬都好鐘意飲,仲自動自覺話要飲添。
雖然依煲依個涼茶又真係幾多功夫要做(尤其係去馬碲皮,真係十萬個唔願意),不過可以清熱下火同埋潤肺排毒,小小豬又鐘意,咁麻煩少少都要煲下佢呀!