最新一輯美少女戰士上咗畫啦
你哋有無睇呀？
趁佢呢排咁紅，我都扮下先～
與其話係新一輯，其實係將第一輯從新畫過
由以前好粗糙嘅畫面變得更加華麗，SailorMoon 變得更高更瘦，禮服蒙面俠變得更靚仔
不過，我記得，以前美少金女戰士出嘅畫冊全部都好細緻好靚，可惜細個無錢，唔係我應該會買好多好多好多⋯⋯
細細個我已經係一個問題多多嘅人
即使到而家，我每次睇親美少女戰士都會遏而不捨咁問：
點解佢哋變咗身都係一樣樣，只係換咗套衫，多咗個頭冠就無人認到佢？
唔係應該好似飛天少女豬事丁咁，完完全全變成第二種生物先唔會俾敵人認得出咩？
仲有仲有，佢哋下下變身都用咗成分鐘，係呢個時候點解啲怪物唔攻擊佢呀？？
睇故唔好駁故，呢啲位多數無咩人理我⋯⋯
無論點都好，美少女戰士係我個年代真係王者
身邊嘅女同學個個都好鍾意睇，仲要日日追，因為唔睇一日，第二日番到學校就會無朋友XD
新一輯開始，唔知我嘅禮服蒙面俠又會幾時出現呢？
============================================
感謝 沙沙密卡的彩色世界 提供以上資料
沙沙密卡的彩色世界的網誌: http://sasamaka.pixnet.net/blog
============================================
