講起三個願望，你會諗起啲咩？
阿拉丁神燈？
聖誕老人？
我會諗起KINDER 出 奇 蛋
細個睇電視，一開始就有個媽媽見到囝囝做晒功課決定送份禮物俾佢
小朋友就話”要朱古力，想要玩具，同埋新奇刺激嘅嘢"
跟住就同媽媽去超級市場買KINDER出奇蛋啦
小朋友（包括我）見到呢個廣告，真係深深俾佢吸引住㗎
又有朱古力食，又有嘢玩，真係好想要呀
好惜，媽媽又點會咁易買俾你呀～
好不容易，媽媽終於係復活節呢啲大時大節買隻蛋俾我
講真，呢隻蛋都真係好鬼甜㗎
一個小朋友，根本無可能一個人食得晒
所以，我通常會同妹妹一人一半
或者食四分一再包番埋，留底遲啲食
當然，成件事嘅重點緊係入面嗰嚿玩具啦！
我記得入面有砌嘅小玩具，有鎖匙扣，有小擺設
就咁一個小小玩具，抽到嘅時候已經好開心啦！
買出奇蛋一啲都唔平
直到而家買嘅次數真係一隻手都數得晒
或者物以罕為貴啦
到而家都仲好記得當時收到、食到嘅心情
食過出奇蛋嘅你，又有無類似嘅回憶呢？
連載於www.dmx.hk
<
============================================
感謝 沙沙密卡的彩色世界 提供以上資料
沙沙密卡的彩色世界的網誌: http://sasamaka.pixnet.net/blog
============================================
