16-9-2015：半熟手媽媽5m．嚐遍天下美味第一步

由 Rita 於 2015-09-21 00:00:00 發表 | 累積瀏覽 289

分類：

雖然話頭六個月全人奶可以供應BB所有營養需要，但其實都冇話必須要六個月整嗰日先開始加固(引進固體食物)嘅，以前我哋細個時四個月都開始食糊仔啦～其實有指引可以參考，符合晒所有條件嘅BB就可以嘗試開始食奶以外嘅食物啦﹗我個人認為BB ready的話，早少少都有好處，主要係開始時媽媽同BB都要適應，既然有「人奶夠晒營養」做backup，即使加固唔理想都唔駛心急～而且要趁佢有興趣時試喎，好把握時機，減低將來揀飲擇食嘅機會～另外我又諗，三日加一樣新食物，咁一個月咪得十樣，咁幾時得食到好多樣嘢？大家可以睇衛生署嘅小冊子：

http://www.fhs.gov.hk/tc_chi/health_info/child/14727.html

我其實一直都好期待同曉一齊嚐遍天下美味，第一步當然係開始食唔同種類嘅食物啦，開頭諗住都等足五個月先開始，但呢個人仔比起我更心急﹗

4個月28天呢一日(點解咁準確？因為有用「時光小屋」app，下次同大家介紹下～)，我哋食梨時，曉望到眼甘甘，超樣食嘅樣⋯梨本身都係致敏低危嘅，蓉就應該太粗粒，而且冇工具在手，我批准爸爸俾佢舔舔，點知⋯超鍾意﹗﹗﹗一拎開仲要喊添，俾番佢又繼續舔舔舔～

婆婆屋企咁啱又有個熟蘋果，擇日不如撞日，就俾佢試下第一口蘋果蓉啦﹗之前滿四個月後間中都會遞隻匙羹俾佢睇下有冇反應，一直反應都一般，但估唔到要識就會突然識﹗食蘋果蓉又係超開心呢，又係喊住要下一啖～不過第一次食，只俾咗總共一茶匙佢咋，慢慢適應～

既然開始咗，接住落嚟幾日都計劃下點樣逐步加固啦～其實早啲之前已經買定嬰兒米糊粉，諗住等曉ready就開始俾佢食，所以蘋果蓉之後第二樣就係plain媽媽奶米糊啦，食咗幾次，俾佢食嘅份量都慢慢增加中～

時機都好重要，健康院書仔教，夠鐘食奶前半個鐘可以俾固體食物BB，其實初期BB未慣，食固並唔可以代到一餐奶住，以曉嚟講，埋身食幾多就唔知啦，如果食樽的話一餐食150ml，但而家糊都只食到佢隻Combi BB碗嘅三分之一左右，所以同一餐都要再食奶～呢個星期嘅經驗係，食糊真係唔可以太餓時食，太餓佢會唔耐煩，細細啖細細啖都唔飽嘅，所以要先食奶打底～

去Heidi姨姨屋企探BB，原本未諗住俾佢試新嘢，但曉見我哋食西瓜咁滋味，又好想食，爸爸又心軟向我請求批准，唔緊要啦，三日一樣新食物呢條rule其實都係擔心食物敏感啫，邊度有人對西瓜敏感㗎～原來西瓜唔易壓成蓉，只會壓成汁，所以索性一整舊俾佢舔算了，算唔算係BLW嘅一種？BLW = baby led weaning主張唔將食物壓成蓉或細塊，而係將食物嘅原貌俾BB去explore去嘗試，等佢哋自己去develop對食物嘅興趣同食用嘅方法，我認同一半半啦，合適的話我都唔抗拒俾曉拎住一舊嚟自己dap，不過乖乖用碗同餐具一啖啖去食亦係要學習嘅餐桌禮儀，同埋可以確保營養均衡嘅攝取～

繼蘋果蓉，plain媽媽奶米糊，下一樣挑戰嘅係甘筍﹗媽媽終於第一次為曉曉煮嘢食了﹗蒸可以保存最多營養，而我哋有電蒸籠又方便，兩小條甘筍已經可以食到好多餐了，粒粒蒸熟後出動Mandy姨姨送嘅Combi處理食物嘅工具，用最初階嘅篩網壓壓壓，原來都唔容易呢～

聽取同事嘅意見，我哋決定建立「製冰工場」，其實BB食物繼每餐新鮮煮以外，另外可以保存營養最好嘅就係冰咗佢，再按每次需要份量解凍翻熱，每次整多啲方便啲，之後有多啲唔同食物係冰箱，combination就多啲啦～我哋專登係日本城買咗矽膠冰格嚟用，其實本身唔係想咁花俏要星星形，但夏天將要過去，Aeon同實惠都冇矽膠冰格賣了，款式只剩普通硬冰格，矽膠的話要逐粒退出來容易好多呢～讚呀﹗

甘筍媽媽奶米糊，yummy～

下一站－－啤梨﹗我哋距離嚐遍天下美味又近一步啦～

呢個網頁講製冰BB食物幾好㗎：

http://wholesomebabyfood.momtastic.com/pureebabyfoodandstore.htm

前往其他半熟手媽媽blog