前日(19-9-2015 Sat)同班姊妹試完衫後,大部份都有自己o既活動,伴娘MC,女友人WK陪我行金都,之後去尖沙咀會合揀禮服o既男友同伴郎AY,攪掂後,一對伴郎伴娘又有節目,剩返WK,我同男友三人食晚飯,由於身處韓國街,於是食韓國o野啦.

o係尖沙咀,好難有平o野食,行過見到呢間唔係韓燒,係部隊煱,男友話食呢間,又o岩o岩爆滿要等位,等o左一段時間,職員叫我o地後面o既兩個客人,因只有兩個人走.

再等多一段時間,職員又係叫兩個人入去,然後同我講就快有三個位,o岩o岩埋單.

等多一陣就叫o地入去,安頓好後,決定要$210.00o既部隊煱同$85.00o既石頭飯,要牛肉.

落完單,職員拎個爐同三個前菜o黎,

然後我覺得食石頭飯不如食其他韓式小食,於是改要$130.00o既韓式豬手.

等o左一陣,部隊煱到o黎,薄薄一個薄薄o既紅色煱,

見到有一片芝士,腸仔,午餐肉,豆腐,金菇,年粽,我o地將腸仔同午餐肉整落下面,見到重有韓國粉絲,泡菜.

差唔多可以就食喇,腸仔午餐肉都係香港本土貨式,唔係韓國,由於有泡菜,就知道呢個煱係辣.其實所有o野都正常冇問題,只係一個簡單煱.

之後食韓式豬手,豬手旁有好多配料同韓式辣醬,

男友食o左話幾辣,所以我唔食o個邊啲o野,只食豬手,豬手口感爽唔太腍,味道….同香港食o既鹵水豬手冇乜分別.

之後WK食到要飲凍飲,所有凍飲都係$10.00,自己攞.

服務:
合格啦,不過叫佢俾幾杯水o黎,係熱茶,要攤至可以飲.

價錢:
冇加一服務費,呢餐$350.00.

題外話:
其實我o地大約係6:30pm到,等o左大約廿幾分鐘至有位,之後食食吓,啲人陸續食完離開,大約剩返40%位都再冇人o黎,我o地真係o黎得唔合時.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================