探險家攻略 > 休閒玩樂 / 城中探秘 / 旅遊 > 郊遊 / 特色景點 / 古蹟 / 廟宇 / 長線旅遊 > 福建土樓4天遊 @ 2011 夏

福建土樓4天遊 @ 2011 夏

由平凡人於 2015-09-28 23:50:00 發表 | 累積瀏覽 658

分類：長線旅遊特色景點廟宇古蹟郊遊；地區：中國

是次消費：每人平均約HK$ 1000.00

< 福建土樓4天遊 >

今年端午節假期留係屋企冇去玩，而前幾年比較鐘意去旅行，每次有假期都唔會放過，襯住端午節連星期六日有三日假，就近近地揀左去福建土樓呢個幾特別既地方，用左唔洗一千蚊就可以渡過幾日假期，都幾抵玩丫；土樓分佈係福建永定﹑南靖等地好多唔同地方，坐車比較麻煩，所以就決定包車，係網上揀左個價錢合理而且有好多台灣網友好評既師傅，幾個人share車費好平，而且所有野都有包車師傅安排唔洗諗咁多；出發前再買好火車飛，咁就可以安心等出發


福建土樓4天行程：
Day 1：香港 - 深圳 - 永定
Day 2：永定 - 南靖。河坑土樓群﹑塔下村﹑裕昌樓﹑田螺坑土樓群
Day 3：南靖。田螺坑土樓群 - 永定。高北土樓群﹑南溪土樓群
Day 4：永定 - 深圳 - 香港
福建住宿：田螺坑土樓﹑永定土樓

3-6-2011

第一天

今日夜晚坐火車出發去福建，收左工慢慢去都未遲；火車由深圳站開出，過左關仲未夠鐘上車，先係火車站旁邊既茶餐廳食晚餐，不過大家都認為呢道既野唔好食（都好過係火車上面食既）

食完就行去火車站啦

今次坐既係K636班次火車；自從廈深鐵路通車後，呢班車已經唔存在lu，而家去土樓可以選擇坐和諧號，比起呢啲舊火車快好多又舒服好多

火車總站係福州，我地去土樓唔會坐到咁遠，係永定就會落車

今次都係坐硬臥車箱

一開車職員就推車賣福州魚蛋，第一次見火車上有呢啲特色野賣


開車冇耐未夠10點就熄燈，邊會咁早訓得著



火車中途有好多站，有時無聊會走落車又走返上黎，晚媽媽既月台好冷清

今程車唔洗坐好耐，四點幾天都未光就去到永定站落車


包車師傅已經係火車站門口等我地出黎，今日土樓行程未天光就開始啦；係永定站落車既睇落大部份都係旅客，黎得呢道大家都係睇土樓，因為都冇其他野睇，哈哈

晨早永定街頭好冷清，就算係汽車站都係冇咩人



黎到第一樣做既野就係食早餐先，咁早大部份鋪頭都未開門，係汽車站對出見有麵食大家就坐係街邊開餐啦

食完正式出發去土樓
第一個到既係承啟樓，不過而家七點都未夠，唔好話土樓，連公廁都未開門，大家落車望一望就上車走lu...

坐多20分鐘車，去到有北斗七星之稱既河坑土樓群，呢道當時唔洗收入場費架（而家就唔知啦？），應該算係冇咁出名同少遊客去既地方



第一次接觸土樓係興奮少少架啦，即刻衝入去睇睇先；呢道既土樓多數都開住門可以自由進入，不過始終仲有好多居民住係土樓入面，所以最重耍都係盡量唔好影響到當地人生活


人生第一間入去既土樓係「春貴樓」，世界文化遺產黎架


男人就坐係道飲茶吹水，女人就抱住BB煮早餐，係呢道做男人幾好呢，哈哈



可以上上面參觀



走廊用木建造，要輕力啲行


曬左啲咩呢？

出返黎啦

河坑土樓群有好多座土樓，圓又有方又有，大又有細又有



細細座幾得意

全條村環境都幾靚



好多地方都曬左野，唔知係咩黎呢？

好多好多土樓



晨早農夫們已經努力工作



呢啲唔算係土樓掛？

行晒全村只係見到兩位遊客咋，難得可以清清靜靜

夜晚燈籠發光應該會好靚



過橋離開lu

行上土樓旁邊既山腰，有個觀景台可以睇到全個河坑土樓群，可惜天氣唔太好睇得唔清楚



偷睇到入面

係呢道行行下就行左個半鐘，要上車去下一個地方啦；下個目的地就係有閩南周莊之稱既「塔下村」，不過見到個名唔好對呢道有好大期望，人地周莊靚好多囉



入去塔下村之前已經要比入埸費，門票同田螺坑通用好似要過百蚊，唔平架！河兩岸都係好多小型啲既土樓



當地人生活好樸素



塔下村其中一個特別既地方係祠堂

祠堂上有好多精緻木雕，文革時期塔下村村民好醒目，係舊有木雕之上加上紅衛兵雕塑，咁就避過紅衛兵破壞，否則後面既雕塑一早比人摌晒啦



祠堂對出有23枝石柱，每枝代表古時一位村民考中舉人或者做到大官，咁呢道都出好多叻人bor

塔下村有好多土樓可以入去參觀，都係比較少商業化



離開塔下村之後去到有東倒西歪樓之稱既「裕昌樓」，頭先比既入埸費已經包左呢道

呢座土樓有超過700年歷史，係福建最古老土樓之一，係元朝已經建成；呢道最特別既地方係中間一層所有枝柱都係傾斜，但土樓經過咁多年又地震依然冇事，而家仲好穩陣，非常厲害



土樓中間係一座祖堂



裕昌樓地下每個房間都係廚房，而每個廚房入面都有一個水井，所以呢座樓係有好多好多井

裕昌樓有五層高，每層都有唔同用途，地下係廚房，一樓係糧倉，二樓係老人家住，三樓係年青人佳，最頂就係放棺木既地方

裕昌樓已經好商業化，好多人做生意，好快行完就出返黎啦


離開裕昌樓，跟住就去到四餸一湯，亦即係福建土樓之中最出名最多人去，個個都必到既「田螺坑土樓群」，呢道亦都係我地今晚住既地方，就住係土樓入面，哈哈

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：N/A

是次消費：每人平均約HK$ 1000.00

共0人比"掂"

EEChan 於2015-09-29 00:03:07 留言
你真的很喜歡去旅行,我們以前坐的火車臥鋪跟你相片中的好像不一樣,沒這樣擠迫.
舉報回覆
No.1

stellaluk 於2015-09-29 06:28:46 留言
自由行睇得更多
舉報回覆
No.2

Linda_Lee 於2015-09-30 09:20:07 留言
我都好想成日返大陸周圍去, 又平又有野睇, 仲可以短棄離開下香港TIM, 不過我好耐都未坐過硬臥車箱, 以前返大陸就成日搭, 你去個到搭左幾多個鐘牙?
舉報回覆
No.3

特搜總編E 於2015-10-04 02:05:25 留言
恭喜！經過「SeeWide評審團」一致通過，你的發佈已被選為推薦攻略！你將獲得200經驗值作獎勵！
舉報回覆
No.4

平凡人於2015-10-05 21:40:17 留言
原文由 EEChan 於 2015-09-29 00:03:07 發表
你真的很喜歡去旅行,我們以前坐的火車臥鋪跟你相片中的好像不一樣,沒這樣擠迫.

哈哈火車硬臥大多數都係咁既樣，可能你坐既係軟臥，冇咁迫不過價錢比較貴
舉報回覆
No.5

平凡人於2015-10-05 21:41:44 留言
原文由 stellaluk 於 2015-09-29 06:28:46 發表
自由行睇得更多

係丫，會比跟團睇得多啲，哈哈
舉報回覆
No.6

平凡人於2015-10-05 21:50:20 留言
原文由 Linda_Lee 於 2015-09-30 09:20:07 發表
我都好想成日返大陸周圍去, 又平又有野睇, 仲可以短棄離開下香港TIM, 不過我好耐都未坐過硬臥車箱, 以前返大陸就成日搭, 你去個到搭左幾多個鐘牙?

而家去大陸都唔平啦，由其係門票非常貴我都好耐冇坐硬臥車箱，諗返上一次坐已經係年幾前既事呢程車好短只係大約8個鐘
舉報回覆
No.7