準人妻的煩惱

03.10.2015

好似好奈無寫日記 , 因為真係好似好忙 , 但又唔知自己忙緊咩 !

結婚真係無想像中簡單 . 一直我都只想旅行結婚 , 一心諗住明年一月去西班牙前 , 會先清左今年既免費機票 , 去多次北海道跟沖繩 .

係選好註冊日子後 , 又要早 3 個月到網上登記 , 之後再到婚姻註冊處到選註冊時間同交錢 . 交好錢後 , 唔知點解講下講下要過大禮 , 一直以為過大禮係可以好簡單 , 小地勤心中一直以為只係男家攞禮金上黎就叫完成 , 結果越攪越多野 , 仲要買埋回禮餅 . 之後媽媽又話要我買個大紅篋放嫁妝 , 又棉被 , 又枕頭 , 仲有套龍鳳被 . 之後仲話要出嫁前返屋企 " 上頭 " , 又花燭 , 又龍鳳餅 ...

一直以為註冊當天 , 兩家人食個飯就完結 . 最後係兩家人先食一圍 , 小地勤預左要比杯茶兩邊父母飲 , 諗住簡簡單單 , 結果媽媽都係話要買金飾 , 奶奶又話點都要比對金手鐲我 , 仲有一堆其他野 ... 其實小地勤真係唔想因為結婚而花兩家人錢 , 結果都係要洗好多錢 . 

話唔擺酒 , 結果親戚食飯都要 8-10 圍 , 諗住平平地係酒樓食 , 最後去左酒店食 . 開始四圍問朋友有關晚禮服既事 , 整晚禮服 , 奶奶衫 , 媽媽衫 , 搵朋友幫手化新娘妝同當攝影師 , 整帖同買餅卡 , 唔請朋友同事都要派打西餅比人食 ... 仲要成日為左結婚既事而同父母嘈 . 原來結婚真係好煩 !

小地勤由本來只係簡簡單單既旅行結婚 , 到依加成為 " 細攪 " , 粗略計算已經花左 20 萬 ... 當中一半係我個賣身價 . 其實我夫家個邊真係好錫我 , 我奶奶仲幫左我好多忙 , 令我煩少好多野 , 起碼奶奶早就買左間屋比我男人 , 我地唔洗做樓奴 . 所以我班同事及朋友成日都笑話我 " 原來小地勤咁值錢 " .

印象中 , 六年前 , 我朋友結婚 , 根本唔洗花咁多錢 , 由幾時開始 ? 同結婚有關既事項竟然咁貴 ! 今日去朋友推介 , 檢查得最全面既家計會做婚前檢查 , 兩個人就 1800 蚊 ... 真係好貴 . 定係小地勤真係太少出門 , 咩都唔知 , 咩都唔識 . 依幾個月 , 我既錢好似倒水咁 , 原來搵兩萬蚊一個月係咁少咁唔夠用 .

年輕人想簡單 , 想省錢 , 但有些事唔輪到我地決定 . 眼間花左兩家人咁多錢 , 小地勤又內疚又煩惱 ... 

一想到如果將來想要要養個小朋友 , 睇黎真係要開始 OT 既生涯 ! 無 200 萬身家都唔敢去諗 .