2007年11月24日, 一覺醒來太陽還未出來,今日又唔洗返工,於是乎打開電腦睇吓相,忽然睇到一輯file的相片, 就讓我記起2006年12月的某一日, 有個佬友打黎問我農曆年前得唔得閒, 有冇興趣玩玩年宵, 因為佢地今年年初係長沙灣年宵市場投了一個熟食檔, 正值個時我D工作時間非常之自由, 而且又未玩過, 所以諗都唔諗就一口答應咗。
距離開檔日子仲有一日的一個下午, 電話響起, 因為人手抽調唔到, 所以call 我去幫幫手set 檔, 一輪爬高爬低之後, 能力可做的都已經做晒,但因裝電工程有小小延誤, 所以開檔時間需要順延一日到2月12日先可以正式運作。
時間一日一日近, 心情一日一日奮 (興奮), 終於到開檔既第一日2月12日, 中午時份各有各到, 大家走過對面吃過午飯之後, 就開始Set爐煲水, 烹調煮食...........忙了一大輪之後, 差不多四時左右就正正式式開檔大吉。
(1) 開大............檔。
而我地供應ge野都有唔少架, (食ge有魚蛋 / 燒賣 / 粉果 / 腸仔 / 鹵水雞肶雞翼火雞腎 / 蝦醬鮮魷 / 香煎蘿蔔糕同各式串燒 / 飲ge呢就冷熱乜都有),而我就選擇咗做...........鹵水皇子 (因為我差唔多日日都係主力賣鹵水) 就係貢賣賣吓,不知不覺就玩到成夜晚黑11點幾,唔好以為可以走得,因為重有好多好多手尾要跟架,d靚女就去做村姑 (洗碗 / 洗煲 / 洗毛巾...........) 貢d俊男就緊係做保安啦 (擒高擒低綁好返晒d帆布),大家攪一攪都攪咗成粒鐘ga。
(4) 保安員 & 村姑。
好彩我地既大當家已一早安排佢同另一位佬友架車送我地返歸 (仲要每日都有保母式接送),真係認真唔話得,你話依d佬友係邊度搵吖! 真係賣身都制呀。 其實每天既工序都差不多,每日一早就去補貨同做set up (分頭行事),中午就開檔賣野,收檔之後,幾位當家仲要返屋企預備第日d食品,真係瞓都瞓唔到幾個鐘。
講返自己先,其實頭幾日d人流唔係太多,始終依到唔係旺區,所以我地日間唔會太忙,而我地每日三餐再加上任何肚餓時間,我地都會將個檔口變成自己既buffet court,任食任飲,結果食足五日,真係有生以黎連續食魚蛋食得最多的幾日。
正所謂時間日日過,銀紙日日多,轉眼間已經到左年三十晚,亦係年宵ge最後一日,而生意額亦係最多的一日,其實個日個個都做到停唔到手,不過我就偷懶咗半日,因為我約左d朋友一早行山,要到下午先出去幫手,而且一做就做到零晨既4點幾。
(25) 同心同力。
(28) 唔好比佢停。
仲記得臨近尾聲的時候,大家為了清貨,出盡計仔 (一盒十粒魚蛋變咗廿粒,買雞肶就送串燒等等),最後還是剩下了四五十串的串燒,依個時候大當家即時攞住d串燒拎咗過去花檔同人以物易物, 結果換黎一大堆鮮花(冇一佰支都有五六十支)................ 真係貢都得, 等大家都可以都攞d走, 當收拾清洗過所有野後, 大家都準備走, 點知依個時候點解會有生日蛋糕ge ? 原來我地有位當家剛剛正日生日, 大家高高興興係度唱生日歌, 跟手食埋個蛋糕, 天都快光啦, 真係要返屋企瞓啦, 忽然間有一把靚聲叫停咗我, 原來有利是收, 係大當家既小小心意(嘩…..好大封呀), 但興奮既心情都難掩我既倦意, 到依一刻……個天真係光晒lu。
(31) 乜花都有。
差d唔記得仲有剩餘物資二 (飲品),你睇…….我都拎咗幾多返屋企, 勁呀 !
成個新年都唔洗買野飲............
累積瀏覽 457516
全部攻略 627
全部回應 529