光陰似箭, 今日小齊 5歲半啦 ~
呢半年好似過得好快咁,
特別係放完暑假後密鑼緊鼓咁搵學校,
個個星期都好似好快過咁~
記錄下小齊各方面o既發展
一般發展:
體重：比之前磅好似仲輕左, 得返 35磅左右
身高：104 cm
衣服尺碼: 100- 110, 4Y - 6Y 都有, 視乎牌子與質地
鞋碼: 28/29
飲食習慣方面:
已戒奶, 但屋企仲有D 保兒加營素睇佢有冇心情飲下
早餐: 要返早學我通常比個飽佢
荼點: 又係我預備, 通常係麵包, 餅乾, 蛋糕...
午餐: 婆婆預備, 我要返工睇唔到佢食成點, 婆婆就話ok, 下晝食多d
水果做TEA: 阿公係水果專員, 每日都會預備比小齊食, 佢一路睇兒童台一路食
晚餐: 我覺得佢食好少, 食餸多過食飯, 好少可以食晒成碗, 食得晒果日我要買六合彩
學術上: 我地都係跟返學校進度, 冇再外打補針,
其實我覺得跟到學校進度都算唔錯咖啦~
數學科小齊是比較弱, 唯有鼓勵一下佢做多D計多D,
中文英文方面 keep 住學校水平, 最多得閒睇下書,
AUDIO BOOKS 我地仍有繼續聽, 不過今年因為要考學校, 功課亦多左,
所以今年聽 AUDIO BOOKS 次數少左, 但我會盡力協調下希望可以繼續聽書o既工程
平時有時間會同小齊練下寫字, 係咁多~
日文班: 小齊今年係日文通識三年班,
佢有時會話好鍾意返, 有時又話唔想返 (特別係下晝瞓晏覺唔夠果陣)
我有時等接佢放學時在門外聽到佢同老師講o野, 我覺得佢有進步咖,
會話起碼夠膽同老師講, 文法再慢慢執吧!
其他興趣班: 因為小齊最喜歡畫畫, 所以仍是繼續,
音樂班上左8堂, 老師要去生BB 暫停10星期,
劍擊在上第2期課程, 小齊興趣一般, 10月尾會完成, 考慮緊之後點?
自理能力方面:
刷牙自己OK, 沖涼"局部" OK (即係洗頭都要媽媽幫)
著衫著鞋著襪呢D 就係簡單果D OK, 其實只要我地放手, 由佢自己慢慢摸, 總係會OK o既,
好多時係我地唔抵得佢咁慢而幫佢搞掂, 學習"放手"係我地今年o既重要事項!
仲要另一樣就係小齊o係婆婆屋企睇好多電視, 成日掛住睇兒童台,
嬲嬲地真係想叫阿婆cut左佢!
升小戰鬥:
升小o既戰鬥都叫完成左差唔多一半,
九, 十月係高鋒期, 我地差唔多個個星期都要出動!
比d新鮮感, 儘量著唔同衫去面試, 等我第時睇返都分到邊間打邊間...haha
暫時好幾間都係見完等待中,
小齊表現我就覺得中規中矩啦,
競爭太大結果好難講
到現在我亦冇咩可以幫到佢, 唯有係面試完同假日帶佢輕鬆下,
等佢可以緩和下再戰鬥,
呢場仗大人細路都辛苦, 但媽媽都會支持小齊,
我覺得佢能夠完成面試又肯同我分享已經好好!
加油小齊! fighting !!
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
