8 在桂林街的貴州菜

今日去黃金買電腦，等砌機等夜左，所以我就同男朋友行下睇下有乜野食，行到去桂林街，丫~ 見到間幾醒目黃色嘅貴州菜館，係桂林街食到貴州菜都係幾特別



本來以為夜晚都9點幾無乜人，點知竟然都仲有半成人係度，而且每張枱與每張枱之間嘅距離好夠，所以坐得好舒服~

我最無諗過係一間細細地嘅貴州菜館，menu 竟然係用ipad?! 真係太有型啦嘛~ (但要啲店員識用~ )











本來係好想叫一種叫「折耳根」的東西，不過店員話俾我地知可能有啲羶味~ 好奇怪，點解一種草係會有羶味嘅呢~ 店員話呢啲係貴州人鍾意食嘅野~
anyway我地叫左個酸湯魚$238，其實無諗過條魚咁大條，起碼有兩斤….. 店家話係每日兩點就運過嚟~ 所以條魚係新鮮嘅~

不過想俾個建議店家，最好唔好雪住佢la~ 如果可以搵個缸養住啲魚，即叫即整仲鮮味~ 而家個肉質都好結實~

建議個配菜可以多少少，因為得紹菜、豆腐同埋薯仔，每樣仲要好工整咁得兩件~ 不過其實一條魚，兩個人食都真係乜都夠~ 雖然個湯好似好辣咁，但其實只係個色而已~ 唔係太辣~ 

呢個你唔好以為係用嚟點，其實係要等個魚湯滾左，然後放啲湯落呢個碗仔度~ 我想話其實呢個調味料對食條魚實在係有起死回生嘅作用。

因為本身我覺得條魚係無乜味道，但係點左呢個之後，成條魚真係好味左好多，有辣項，而且多左魚嘅鮮味都出左嚟，仲有啲蔥香~ 

總括嚟講，條魚其實真係唔錯，最好嘅係呢度啲伙記俾你好悠閒咁係度食野，唔會收你啲碗碗碟碟係度阻住你傾偈，所以本人覺得唔錯~ 下次會嚟再試埋其他野~~~ 

============================================

感謝 Jackiess 提供以上資料

Jackiess 的網誌: http://www.openrice.com/zh/gourmet/reviews.htm?userid=151264&city=hongkong

============================================