出發非洲之旅前，收到個遠在外國嘅訊息，一位旅行界前輩已籌辦好一個極光及古巴的攝影團，想我幫手講一個以此為主題嘅旅遊講座。
其實認識這位攝影老師都算係機緣巧合，上年無意中報錯攝影班，他便是我的老師了~
他開聲叫我幫忙講旅遊攝影講座，真的受寵若驚。旅遊是我至愛，而賞識我嘅仲要係旅遊界嘅前輩添！講旅行經我應該無問題，但講攝影自問只係略懂皮毛。我曾經好短時間沉迷攝影，但現在旅途上大部份以抓拍為主，D相好多都唔見得人⋯
講座當日講到攝影部份絕對是班門弄斧，相信在座很多師兄師姐是很專業的。
從非洲回港後就為講座做準備，整Powerpoint、搵資料等。可惜一直都未完全做妥，要拖到最後一日才趕工⋯ 另一方面又要揀非洲嘅相上載到相簿，真係分身不暇。
講開旅行事，回想起近來都做多咗相關活動，來個總結先~
［做導遊］
幾年前曾經當過幾日導遊。十年前於埃及旅程認識嘅日本朋友Nori帶了幾個朋友來港，做了幾日導遊，太平山、食海鮮、蘭桂坊等⋯ 令到他的朋友滿載而歸。臨走前這個新認識嘅朋友仲話 “I Love HK, I Love You” 添! 真的好開心架~
![]() |
| 諗住做吓旅遊大使啫，個多月後竟然收到每人一份嘅禮物，好開心呀~ |
［旅遊節目協力］
上年結婚前，日本朋友Nori又來香港，不過今次不是來旅遊，而是作為一個日本旅遊節目『高田純次のアジアぷらぷら』的監製。(心諗他終於搵到工啦)
他稱來港拍攝旅遊特輯，並想我幫手搵幾個識日文嘅靚女做節目嘉賓，其實都幾有難度，又要識日文又要靚女⋯
高田純次是這特輯的主角，知名度於日本非常高，Nori話是每個日本人必定認識的藝人，應該類似曾志偉、蔡瀾之類。由於是一位大叔，香港人認識嘅只係靚仔靚女，所以問過幾個就算自認為是日本通嘅香港人都唔知佢乜水。當我幫手搵人時，由於著眼識日文嘅香港女仔，港人唔知佢乜水當然碰壁啦！及後叫個空姐朋友幫手，D日本crew好踴躍，即時有兩個興奮地答應，加上港女一個曾經喺日本留學同工作嘅表姐就剛剛夠數。搵齊人後，仲收到一開始問過嘅朋友來電，話公司有好多日本女同事，知道這消息時紛紛起哄，仲問需唔需要後備添！起初對主角嘅知名度都半信半疑，現在相信啦~
拍攝期間由於我既要返工，又要學潛水堂，只能見到Nori幾面，但真感謝佢嘅熱情招待，在蘭桂坊完成拍攝後有餘興節目，終於與我“旗下”嘅日本女仔見面，呵呵~
當然唔少得仲有主角啦！
能夠為香港旅遊做一點事，真係好開心架!
![]() |
| 最後一集於珍寶海鮮舫拍攝 |
［代課老師］
多年前上攝影中班時認識的老師，跟他亦師亦友。其後，多得這位老師賞識，為佢嘅攝影初班代一節課。他已任教多年，漸覺已成例行公事，所以想加入新元素，而且因事忙，所以叫我於初班代課講“旅遊攝影”，仲話之後都會搵我幫手添。當佢叫我幫手時真的好興奮，邊有諗過會得到老師賞識架！不過當時我諗自己講攝影都唔在行，唯有靠講旅行搭救啦~
我亦首次自家製作了一個教學powerpoint。
我咁大個仔未試過講talk講咁耐，以前返工就算準備好資料企出來講野，都只係講到3至4成就dead air，最長都唔過5分鐘。不過我今次竟然可以Solo講足一個半小時，仲唔夠時間講添！睇嚟我真係好鍾意同人分享旅行軼事噃~
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
