三文航母出黑薯公海

住了黃埔區十年, 甚少行到這邊, 以前這邊的地鋪是一間大型貿易公司, 全拆卸搬走了, 現已全面重新佈置, 如果不是去百佳逛, 都不察覺原來已經變成食肆區域了.

此店為於百佳隔離, 全落地玻璃窗, 剛過最繁忙的午飯時間, 客人不多, 可以揀個靚位.坐近窗邊, 大型梳化, 一邊食, 一邊望街, 看車來車往, 好寫意. 

大約下午二時左右, 還有午市套餐供應, 要了第一項推介: 香煎三文魚配黑松露薯蓉 (Pan-seared salmon with truffle mash potato served cream sauce)

是日餐湯: 紫薯濃湯, 美觀大特寫,  圓潤的紫色, 放了兩小件脆麵包粒, 洒一點香草, 賣相已經無得輸, 一啖入口, 用紫薯攪打的湯底, 杰度十足, 香滑濃郁.

主菜出場, 打橫看, 如航空母艦下水禮一樣, 三文魚皮的上層, 十分平敞, 好似讓戰機起飛的航母甲板, 下面的頭尾兩邊打斜切入, 十足船身, 放在底的黑松露的忌廉薯蓉, 自然是波濤洶湧的海面吧...

切開一小件, 放碟, 特然覺得藝術美感上升了幾級...哈哈... 師傅把三文魚皮煎得十分香脆, 下部厚切的三文魚肉, 油香味濃, 入口軟熟, 伴碟的薯蓉, 加入了矜貴黑松露, 立即升價數倍, 軟滑薯蓉, 帶出微微的松露香味.

友人左諗右諗, 決定不要午市套餐, 最後選擇了推介: 和牛漢堡(Homemade Aus Wagyu Beef Burger with French Fries), 還另加了額外配料: 菠蘿和煙肉. 近期吃了很次澳牛, 唔係佐敦個間, 而係"澳洲和牛", 之前提過了, 日本牛移民澳洲, 取得居留權後, 變成二等公民, 聲價雖跌, 但水準相差無幾, 聽講此店的和牛漢堡, 為了提升口感, 是用牛隻的三個部份溝混而成, 但我程度低, 無法分別得出是那三個部位... 但只講口味, 絕對是一等一, 肉汁豐富, 牛肉味濃, 麵包的皮更是脆口, 好滿意.

近鏡大特寫, 可見每一層配料, 上下麵包烘過, 脆皮香口兼鬆軟, 由底層數起, 生菜、蕃茄、牛肉漢堡、另加的菠蘿和炸脆了的煙肉, 整件漢堡, 足足有七吋半高, 即時攞把間尺, 度一度張開口的直徑, so...只得兩吋, 無奈..... 又要施展壓包功夫, 把麵包和配料扶正中間, 用紙巾包好, 然後用手掌大力一壓, 嘩....好有快感.... 醬汁四淺, 頓時, 七吋半變成兩吋半....喲....看見都好興奮呀....哈哈...

奧利奧與布朗尼迷人窩夫(Oreo and Brownie Waffles with Ice-cream), 好跨張的造型, 份量十足, 底層是大型窩夫, 沿周邊用忌廉去固定oreo餅乾, 再放一細圈的Brownie, 中間兩件雪糕球, 最高點還有放上忌廉, 食完呢件嘢, 今晚起碼都要跑番成粒鐘呀...陰公...

底層窩夫並非完整的圓型, 而是花朵型狀, 圓型的周邊突出了半圓圈, 一刀可以切出三角, 類似船型狀, 方方便食用.

埋單時, 收到一張小卡, 上面寫著"Free WiFi", 以為是甚麼免費上網通行証, 反轉後面, 原來是優惠卡.

消費優惠卡, 每消費滿$120, 可獲1枚印花, 集齊3枚印花, 可獲一杯鮮奶咖啡(8安士/中杯), 集齊5枚, 便送芝士薯條, 如果8枚, 更可獲意粉一客或雪糕窩夫一客. 但留意, 換領只適用於平日的星期一至五.

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================