今次到親愛的搵餐廳興祝, 嘿嘿, 原來你靜靜地早一個月已經book咗餐廳, 等我仲好緊張添,
銅鑼灣區都有講究菜式烹調, 氣氛好, 價錢合理嘅餐廳! 分享吓食咗咩先

平日六點黎到, 由門口到走廊行入黎, 有種花香味, 餐枱都以黑色為主, 鎢絲燈影照係白色牆身, 簡約温暖嘅裝修, 有五張四人枱及兩張二人枱, 暖色嘅燈光暗暗地, 帶點浪漫氣氛

生蠔一般日子有買一送一, 星期三特設oyster night, $180有半打 好抵食呢!

每兩個月轉一次Menu, 價錢$598-698, 份量超滿足!!! 包你抱住個肚走

法包+自制茄子醬
餐包有Rosemary嘅香味, 裏面好軟心, 外皮就好脆
每日用新鮮茄子加香草煮成蓉, 再焗香!!少少辣, 似咖喱



由檸檬嗰邊開始食
第一隻係美國蠔, 每啖咬落甜味好出, 食落好爽口鮮甜, 好容易入口
第二隻法國蠔質地較實, 咬口會多啲, 海水味較重, 微咸, 整體黎講最好食嘅品種
最後算係較新嘅品種, 食完嘅時候有種回甘, 海水亦比較輕, 每款蠔都好大隻!!!!

風乾金槍魚柳, 蘋果火箭菜沙律配濃香黑醋汁 (4/5)
配搭包含晒甜酸苦辣外加咸咸地風乾金槍魚柳嘅tuna, 有酸酸嘅檸檬橄欖油, 苦澀嘅火箭菜, 香甜嘅黑醋汁, 五味陳雜! 十分偏好火箭菜 所以菜式都好高分 哈哈

波士頓龍蝦配配鮮什莓他他 (5/5)
呢個龍蝦有肉地好新鮮, 拆哂肉! 食得爽得黎好濃膏味, 好滿足, 醬汁用乳酪做成, 食完龍蝦, 藍莓同士多啤梨嘅清甜品浮返上黎

法式龍蝦湯 (4/5)
好香濃龍蝦味, 感覺用咗好隻龍蝦攞去煮咁, 最細心係湯上面加個"A"字裝飾表達Amina!!

煙番茄紅菜頭忌廉濃湯 (4/5)
有啲攪爛嘅蔬菜粒粒, 味道好似lasagna, 我想講好好食

海鮮酥皮盒 (4.5/5)
酥盒有手掌心咁大, 上枱時聞到好香牛油味, 裏面嘅海鮮一啲都唔馬乎, 有蝦, 蜆, 帶子及青口每樣都厚切, 口感好滿足, 白汁亦唔覺膩, 店長主動請我地飲返杯, 酸甜白酒更加配合

香煎鵝肝配砵酒燴葡萄 (5/5)
鵝肝煎到完美嘅八成熟, 外面脆脆地, 中間就半熟狀態, 好似鵝肝醬咁creamy, 味道甘香, 有些人唔接受嘅鵝肝味, 就用紅酒葡萄去中和, 兩者好完美, 要特定厚度同埋温度嘅控制, 做法好講究功夫

中途站-番石榴沙冰 (4/5)
喜歡選用番石榴沙冰有種清淡濃香感覺, 清一清個味蕾, 迎接main course, 淡粉紅色嘅賣相亦都好討人喜歡

法式油封鴨腿, 松露薯粿配車厘子蜂蜜燒汁 (5/5)
去法國旅行期間學咗用油封鴨腿, 去除多除脂肪後焗薯蓉, 鴨腿嘅油脂甘香包補令你回味 , 所以一見到一定要點黎試吓!! 可以學到唔同做法
煮過嘅車厘子甜味增添咗鴨脾嘅味道
薯波係用薯蓉加麵粉, 整成形後煎成嘅, 好煙韌感覺, 離奇地食到黑松露味, 原來真係加咗松露!! 大愛哈哈

秘制美國極黑豬脊肋肉配焦糖燴蘋果 (4/5)
用青蘋果中和油份, 多咗份甜味, 味道唔會單一, 完全唔怕肥膩
係點菜嘅時候店員都提示我地呢個菜式比較肥, 但都無法抗拒中菜就稱為五花腩嘅豬肋肉, 要keep住肉質入口即溶, 所以選材第一要點就係要脂肪夠均勻, 上面有青蘋果蓉, 中和豬肉有油膩感, 燜到好淋, 簡直係法式東坡肉!!

黎到甜品時間~ 
Tiramisu
一般餐廳做法會用手指餅, 吸收咖啡汁, 放在中層, 而呢做法破舊立新, 有傳統元素之餘, 又會做啲變化, 用咖啡啫哩代替, 味道香濃, 而忌廉層都好creamy, 奶味好香, 三角形千層酥好脆, 口感好豐富!



砵酒啫哩, 菠蘿肉, 花生焦糖脆脆配椰子雪糕
黎嘅時候一大陣白煙, 原來上放咗一小杯乾冰, 煙霧彌漫睇唔清甜品係咩東東, 哈哈
煎菠蘿味道比較甜, 掩蓋咗椰子雪糕味, 上面有啲開心果粒, 同脆脆好夾!





苿莉花茶
已經食到十一點幾, 好滿足嘅一餐, 最後安排清香花茶, 暖下個胃, 舒服晒!

推介此餐廳 5/5 首先服務好細心, 當我傷風感冒搵紙巾, 佢哋仲快手就遞盒紙巾俾我,  亦會安排好上菜時間, 令我哋唔會食得咁趕急, 成餐飯都好輕鬆自在, 因為有時食高級小小嘅餐廳, 都會好侷促, 令人感覺唔舒服, 而Amina絕對比到你屋企嘅感覺, 環境有情調, 用料新鮮,好似我哋咁嘴刁都滿足到! 而且份量絕對夠食, 飽到抱住個肚, 代男朋友講值回票價 ,嘿嘿
聽聞之後會推出lady night優惠, 各位女士們不妨到呢間餐廳gathering^^ 店長仲有啲森美 哈哈
平均消費$714.5, 2個人, 每人6個course + 半打蠔

Amina² Cuisine
星期一至日: 19:00-00:30
銅鑼灣富明街2-6號寶明大廈4樓J室
Tel: 6222 9405 / 6642 1870

============================================

感謝 mohkc 提供以上資料

mohkc 的網誌: http://www.openrice.com/zh/gourmet/reviews.htm?userid=717759&city=hongkong

============================================