(Day 37)2011-03-14
住宿：不知名住宿
行程：復活節島環島遊
瞓醒先係旅館食包埋既豐富早餐，有自家香蕉同鮮渣果汁。好有島國特色既早餐，慢慢食，十分享受~ 我諗呢餐如出去食，一定又過百港紙呀!!! 特登食淨塊火腿用來夾麵包及香蕉打包用來中午食先~ 係復活節島旅遊，飲食上真係要慳得就慳呀!
今日既行程決定租架車來過環島遊，格價後間間公司都差不多。呢度物價指數咁貴，但租車價錢就絕對正常噃。只係用左$60-USD per day，就租到架98年Suski既四驅車，連國際牌都唔使睇。唉… 係香港用$80整既國際牌，呢個行程中諗好有D地方租車遊。不過種種原因，要去到最後一站先租得成，國際牌仲要連睇都無睇，真係無用武之地囉⋯
@1330
左軚車好快就習慣，決定來過順時針環島遊。離開市中心過左機場無耐，轉入一條小路，就來到今日第一個既站立Moai石像群“Ahu Akivi”，但就撞正一場過雲雨… 根據書中所講，特色之處就係這裡一共7座既石像，係全島唯一向個海架! 現場觀察所得，雖然個海比較遠，但都叫係遠眺既~ 咁點解其他既就全背著海呢? 至今仍然是個謎!
沿小路出到近大路時，去到一個叫Puna Pau既地方。呢個係一個火山口，話島另一面既石像，就係用呢個火山口呢D石製造。古人點樣運巨大既Moai過去呢? 至今都係是一個謎!
![]()
呢個就係火山口啦~
直到揸車去到島既另一面，停埋一邊休息一下。食D餅乾、今朝特登食剩既香蕉及麵包作午餐先~ 這裡有個不錯既沙灘，又有好多石像，另外有間餐廳於帳篷內擺滿好多枱櫈，似乎用來招呼遠處停泊既郵輪。
上車前又經過先前滿佈椰樹既草地，久唔久就有”卜”一聲，“重DupDup”成熟既果實就會掉下來，梗係要小心以免中頭獎啦! 突然心血來潮，如果打開呢D椰子咪有椰青飲囉! 於是嘗試又撞石又用手，出盡飲奶既氣力打開，點知… 實心既???另一個也是這樣…點解呢? 攞車途中，都有見遊客好似我咁做埋D傻事呀~ 哈哈~
![]()
於是繼續行程，路上見到好多瘦削既野馬。後來返到來香港睇電視有講復活節島，訪問一個老一輩既原住民，話小時候無見過有馬係島上存在。D馬又何時出現？點解會有呢? 又係一個謎…
來到島既東部，經常係相片、電視中見到一字排開既Moai巨像盡現眼前。細心看看數一數，一共十五個。每個石像高矮肥瘦樣樣齊，其中一個帶帽既仲零捨醒目添~ 於是攞本書出黎慢慢睇介紹，話原來曾經係1960年既海嘯摧毀左幾座石像，並由日本既一間公司出資重新修復好架!
我到訪時將近日落，方圓十里渺無人煙，只有幾隻野馬垂頭食草。於是係南太平洋既拍岸聲下，呆望著眾多既石像，寧靜地感受謎一樣的Moai。無人既感覺，既神秘又鬼異。
![]() |
| 立正企好!!! |
後來來都一個山頭，只見圍欄內，漫山遍野都是Moai石像，或躺或站或只露出個頭… 嘩!有好多呀!!! 原來呢度就係Rano Raraku死火山，估計大部份Moai，都係用呢座火山既石來建做。不過就太晚經已關門，唯有從圍欄外Zoom入去影相啦~
@1900
島既東南面水質清澈
![]()
由於沿途都無街燈，要趕緊係入黑前返回市中心。返到市中心近郊既海邊，來得及欣賞美麗既日落呀! 而且仲有好多人，從高高既懸崖上釣魚Tim~
太陽從水平線上消失，水平線既盡頭，正正就是香港既日出。呆呆望著，彷彿望到香港晨早匆忙上班既境況呀!
返旅館沖完涼，趁有部車係小鎮兜吓，睇吓有乜野食。去到地勢比較高既地方，見有好多當地人外賣Pizza，就知係親民價啦! 落車一睇…果然全中~ Pizza起碼一定食飽飽先啦! 於是堂食Pizza $4000-Peso($65-HKD) $1000-Peso大樽裝汽水~ 兩個人食到飽，同尋晚果餐比… 唉…
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
