又突然好想食甜品, 剛好又想清吓雪櫃及整甜品的材料, 於是決定先整朱古力曲奇~
俾成品照大家看看~~
其實都係參考上次去工聯會上堂的食譜~ 因為今次唔想再買新材料, 所以原本食譜有的合桃或朱古力粒都唔加了, 只係整純朱古力曲奇~ 另外食譜建議用黃啡糖, 但係自己想清咗屋企的糖 (因為用剩了一小包), 於是用番白糖了~
材料有: 100g牛油 (室溫, 用了無鹽的, 又係剩貨, 其實用有鹽的都得~), 麵粉150g (之前有低筋麵粉未用哂), 可可粉原本10g, 為了清材料+鍾意食朱古力, 落了20g~ 焗爐就預熱180度~
將牛油、麵粉加朱古力粉放在大碗中, 按上堂的做法, 就係用手搓成一舊曲奇餅團便可~~
最初搓的時候, 幾樣材料都比較鬆散, 不過搓夠5分鐘, 就開始黏在一起了~ 終於變成了一舊朱古力餅團啦~
上次整的時候冇曲奇餅模, 今次喺屋企整, 用吓曲奇餅模整型~~ 整好就放在舖了baking paper的焗盤上~
用180度焗15分鐘就整好啦~~ 顏色變得比較淺色~~
這樣一堆曲奇餅, 夠自己同老公食幾日了, 因為每次都唔好食太多~ 個人鍾意食朱古力, 覺得幾好味, 老公就話朱古力味太濃了~~ 第時有時間希望整吓其他款式啦~
============================================
感謝 helenhlblog 提供以上資料
helenhlblog的網誌: http://helenhlblog.blogspot.hk/
============================================
