續(Day 2) 2015-9-12
住宿：Ruby Backpacker
行程：約翰內斯堡(南非) —> Nampula(莫桑比克)
話說上回講到來到莫桑比克後受到諸多錯折，逃回住宿後面如死灰。經深呼吸冷靜過後，佢地又唔係偷又唔係搶，心諗無理由唔出去觀光架，咁不如唔好來非洲！
出發前問一問住宿老闆娘外面是否安全，她是一名本地白人，應該是葡萄牙裔。她說ok，只要唔好比人感覺到身上好有米應該唔會有大問題。於是放低晒所有財物於Ruby，只帶相機及少量現金，決定膽粗粗再出外闖一闖，目的地是步行過一條街嘅博物館。正想外出時剛好見一名白人少女住客拎住膠袋回來，似去完超級市場，心諗治安應該無想像中咁差呱⋯
於是心驚膽顫外出，行嘅不是主要大道，路人疏落。步行期間，左顧右盼，驚被老笠。如要影相先係褲袋開好機蓋及開關制，隨即攞部相機出來極速影，影完又即時袋返好。今次非洲之旅換上4/3微型換鏡相機是明智之舉!
LP講博物館入場費$100-MZM，我又無散紙，結果俾了張$200-MZM($30-HKD)，門口無講幾錢，即任由宰割... 撞正兩個印度商人一起參觀，並由收錢嘅職員帶領入內講解。開頭影了兩張相就被職員制止，笑笑口話轉頭可以比我影喎，心諗又想「掠水」？博物館雖然簡陋但都好值得參觀，畢竟是我來非洲第一個博物館吧，而且Lonely planet描述這crowded city亦只提及這唯一景點。內裡有於莫桑比克出土嘅文物、歷史，職員都詳細講解，心又諗會否收Tips？參觀過後他笑笑口說可以影，算吧，無謂助長這風氣。離開時職員無抓多一分錢Tips，是否我小人之心呢？
![]()
|
|
進入簡陋展館
|
![]()
|
|
影了一張後才發現不能拍照
|
參觀博物館後，與剛才好好傾嘅印度商人分手，他有房車接走。由於又要得返自己一人，此刻有些少茫然，真想跟埋佢一齊走呀⋯ 於是去博物館後面LP介紹嘅餐廳食少少野，諗任食完早D返RUBY瞓覺，怕入夜開始危險。漢堡$150($23-HKD)當地啤酒$60($8-HKD)，一D都唔平!
食完見時間尚早，先去火車站視察一下先，因為聽日搭車係火車站外嘅小巴停泊處，無謂到時才孭住大袋細袋去搵。心慌慌咁行多兩個街口去到大馬路，期間見到當地人頂上功夫了得，及後見火車站外有好多地攤擺賣蔬果，攞相機把握瞬間影了張珍貴相片。
火車站外有眾多小販，影相期間D女小販叫我影佢地，但見附近都比較雜亂，也有幾名當地人前來搭訕，即時雙手插袋，分別緊握褲袋中的零錢及相機，視察過小巴停泊等候狀況後便打道回府。
回程時再穿過博物館，再次看見博物館職員，並親切地叫我可以係外圍拍照。其實都十五十六，唔知佢是否想屈錢。影完無被屈，仲係博物館大閘傾計添~ 好開心，來非洲第一次同當地人於街上慢慢傾談。看來我真的是以小人之心度君子之腹了⋯ 無計，鬼叫由一入境就被屈咩!
![]()
|
|
回程時街頭快拍
|
返回Ruby，剛認識的法國朋友Alex及馬達加斯加朋友Talian，兩位都很年青，話要去market工作，有乜工作呢？ 解釋極我都唔明⋯ 算吧，有得外出又有人陪，梗係跟埋去啦！原來佢地都未去過，要沿路問人，對答全程都由Alex負責，因為只得佢識葡文。最後行咗去一個好遠嘅market，但已關門，天也開始黑，於是又走回頭路。看見他們比較輕鬆無咁緊張，唔通無我想像中咁可怕？
返回住宿後Alex提議去飲啤酒，由住宿沿住漆黑一片街道行到一個街角，見有兩個大雪櫃於街頭，雪櫃內存滿了啤酒。從黑夜中只能從雙眼眼白辨別到有無人，原來有幾個黑人坐在啤酒膠箱飲啤酒。於是大家坐在街角上的啤酒膠箱上啤一啤，一支又一支，其實銀仔唔係太飲得⋯
諗住挨完長途機今晚早點瞓，但看見他們意猶未盡，提議食完宵夜再去酒吧飲⋯ 好！有人帶住認識非洲黑夜，挨眼瞓都抵！
行行吓去到在中午時曾經過，看見一大班黑人嘻嘻哈哈，怕行埋去會危險，驚到唔夠膽行埋去嘅小食店。我地每人叫了一款小食，味道唔錯！超平！老闆仲叫我影佢間舖添~ 睇嚟晏晝果餐咁貴都係專掠遊客了⋯ 食完後有人兜搭，知我地想飲野帶我地到一間酒吧，可惜人影都唔多隻，借廁所遁再去第二間。去到第二間較有人氣，再飲了些酒，頂唔住睡魔周公急call了。
![]()
|
|
左二、三是法國及馬達加斯加朋友
|
回程時於漆黑嘅街道他們都唔記得路，好在我今日已行過兩次。回到住宿旁邊嘅街道，看見4-5人蓆地而睡，並用木來生火取暖，可見當地人才叫赤貧！其實以前係機場工作時同過一個巴基斯坦人傾計，佢話香港好幸福，無錢就有錢比你使，無得住就安排住宿你住，無得食就有食物銀行等等⋯
返回住宿無穿無爛，輪流沖涼後於同一間大房瞓，馬達加斯加朋友Talian仲話明早要早起離開Nampula前往工作。早抖吧~ 諗都無諗過係非洲南部入夜可以出街，而且無比想像中危險添，這經驗十分寶貴，唔係人人都有架~ 勢估唔到，非洲黑夜比旺角黑夜更平易近人。
讀萬卷書不如行萬里路之認識莫桑比克：(取自Wiki)
鄭和下西洋時最遠曾達莫三比克的貝拉港
[1]。
1498年3月，葡萄牙航海家
達伽馬率領船隊到達莫三比克，當時就有
阿拉伯的貿易站在沿海一帶設立。自
1505年開始，成為葡萄牙的
殖民地，葡萄牙在沿海興建了許多貿易站和堡壘，並且使它成為非洲東岸航行船隻經常停泊的港口。葡萄牙的商人、傳教士和探險家更深入內地。到了十九世紀初期，當地的奴隸制度才被廢止。
經過了近五世紀的漫長殖民統治後，莫三比克人民也開始政治覺醒，要求獨立自主的呼聲高唱入雲，但是葡萄牙政府對這個殖民地不肯放手，因此爆發了為期15年的叢林游擊戰爭。
1975年6月25日，莫三比克正式宣布脫離葡萄牙獨立，成立
莫三比克人民共和國，奉行社會主義。
莫三比克獨立後繼而發生內戰，直至1992年才內戰結束，莫三比克開始實行
多黨民主制。
另外究竟叫莫桑比克？莫三比克定叫舊名莫三鼻給呢？我跟香港領事館叫"莫桑比克"為準吧~
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
