早前到訪過中環一間西班牙餐廳，雖然有賣不少西班牙出名嘅菜式，如西班牙奄列、西班牙海鮮飯，但亦兼賣唔少其他地地菜式；而且，西班牙小食Tapas亦只有很少選擇，感覺唔全面，又有點唔正宗嘅感覺，頗有意猶未盡之意。所以，今晚再與同學仔Ivan兄嚟到西營盤，接續西班牙小食之夜，兼預祝聖誕。
Chico Chica喺食友嘅推介，比起正宗嘅西班牙餐廳，定價又實惠啲；味道上又跟足西班牙口味，部份菜式又融入亞洲風味，所以，要傳統有傳統，要新派有新派。
踏入店裡，差啲被餐廳尾嘅玻璃反映呃咗，其實屬小店格局，地方唔大，但頗有氣氛，加上客人多，非常熱鬧。餐枱亦好有特色，枱面貼上瓷磚，而我哋所揀近門口對外嘅高腳枱櫈，成張枱面都鋪晒瓷磚，感覺有趣。
小型嘅筆記板餐牌，幾頁紙詳列晒所有菜式，雖然款式似乎唔多，但睇嚟既特色，又夠精，主菜三幾款選擇，但小食就選擇多多，好嘢就在乎貴精不貴多啫。再者，講明今晚喺西班牙小食之夜，就更加啱我哋，樣樣細細碟，可以試到多啲嘢。
小弟一向唔好酒，不過，老友就對酒甚有興趣兼有研究，加上食西班牙小食，佢話點都要飲番杯先夠興致，所以，恭喜不如從命，小弟都小酌一杯，然而，以下嘅酒評都喺情商朋友寫番幾句。飲品餐單上亦有好多選擇，由汽水、茶啡、無酒精雞尾酒、啤酒、紅白餐酒……等等，都一應俱全。
對酒無興趣，而仲想飲得特別啲，我見佢推出咗啲冬季特飲，雖然，無試到，但單睇啲名稱又真喺似乎幾特別。
![bowl]()
Estrella Damm Draft $58 / 品脫
老友先嚟一杯生啤解解渴，仲要一品脫份量，成大大杯，夠晒豪氣。朋友覺得隻生啤味道較淡清新，不苦澀易入口，口感清爽，配是晚嘅炸物及蛋餅幾夾。
![bowl]()
Altano, Douro, 2012 $58 / 杯（$298 / 支）
佢話嘆西班牙小食，一邊食，一邊嗒吓紅酒，感覺會寧舍唔同。而依一款葡萄牙紅酒覺得屬中度酒體，味道複雜，橡木味唔重，算乾身，入口唔嚡（出面好多時飲落都有啲嚡口），唔食嘢就咁飲都OK，配是晚嘅燴辣肉腸、漢人堡等濃味食物好夾，質素算唔錯，以3佰蚊一支有找嘅價錢屬抵飲，出面好多要3-4佰才飲到差不多質素嘅酒。
![bowl]()
炸西班牙粟米球（Croquetas de Maiz） $68
上文提過嘅西班牙餐廳，有一道炸蕃茄芝士意大利飯球，感覺幾得意，所以，今次見到有一道相類似嘅菜式炸西班牙粟米球，又想試吓喺點！一客有4球，每個有一個乒乓球大細，炸得金黃，色澤勻巡；一咬外層非常香脆，而且，做得好薄，內裡填滿好似粟米麵糊嘅嘢，好濃粟米味，又帶點奶或忌廉嘅味道，有份鹹中帶甜嘅感覺，都真喺幾有趣嘅小食。
![bowl]()
火腿比堅利（Jamon Bikini） $75
好鬼馬嘅名字，何謂「比堅利」？其實喺西班牙一種小巧嘅三文治，借題發揮叫做「比堅利」。用料好簡單，就只有黑毛豬火腿及西班牙小乳頭牛奶芝士（Tetilla，因為芝士嘅形狀猶如小乳頭），雖然簡單，但麵包刻意用上薄薄嘅方包，仲將包面煎香過，入口時達至焦脆嘅口感，內裡夾上火腿及芝士，鹹香惹味，做得細細件，食咗兩件都唔怕太頂肚，可以再試其他嘢。
![bowl]()
漢人堡（Hansburger） $78
依個既用饅頭包，又以日本子薑入饌，更採用澳洲和牛，就喺店長所講加入少少其他地方特色嘅西班牙小食。為貫徹融和風格，更以蒸籠上枱，兩小個迷你漢堡，的骰小巧，自家手刴嘅澳洲和牛，絕對口感鬆化又好有肉香，薄薄一層車打芝士，配合日本子薑嘅酸酸辣辣，一啲都唔覺油膩，唯老友覺得始終配中式饅頭包雖然鬆軟，但咬落較黏牙。
![bowl]()
西班牙蛋餅（Tortilla） $75
以上幾道小食都做得出色，然而，試埋依道經典嘅西班牙小食就知真章，因為之前試過好幾次西班牙蛋餅都做得過火。依度嘅西班牙蛋餅，一切開就知好對辦，小弟唔一定要追求好流心，但一定唔可以過熟過老，今回個蛋餅外層微脆，內裡仲流有蛋漿，入口蛋餅極為嫩滑，就好似炒滑蛋咁，加入洋蔥、蘇巴沙腸，口感、味道都唔單一，蛋餅面嘅A字喺辣醬寫成，令個蛋餅帶點點辣，好醒胃。
![bowl]()
西班牙式魷魚圈（Calamari） $68
揀個魷魚圈時都喺十五、十六，但見佢伴個血橙汁，就加咗啲分想試吓。好彩有點，否則走寶，因為個炸魷魚圈本身已經好高水準，魷魚好柔軟鮮甜，食得出新鮮貨，炸漿做得好薄、好香脆，反而個血橙汁就唔覺太有咩特別，不過，作為佐料，平衡一下炸嘢嘅油膩感確喺功不可沒。此外，
今晚試咗兩道油炸嘅小食，兩道菜都體現到師傅嘅炸功了得，食落唔會一口油嘅感覺。
![bowl]()
燴辣肉腸（Chorizo Stew） $68
最後一道所嚐嘅小食「燴辣肉腸」喺店長推介，佢話嚟試西班牙小食又點可以唔試一試西班牙辣肉腸！初時以為又喺細細碟，原來，一份有幾多辣肉腸，以波特酒（即喺砵酒）燴煮，加入大大粒嘅白豆，啲辣肉腸煙煙韌韌，好有咬口，微微辣，又夠入味，真喺好啱餸酒用，而白豆粉腍清甜，只賣$68，我哋都覺得好抵食。
試咗共7款小食，各有特色，其實都好滿意，不過，與同學仔都喺甜品粉絲，佢喜歡食之餘仲成日整，所以，點都要試試依度啲西班牙甜品先得。餐牌所見，只有兩款，問過店員都喺細細份，就一於兩樣都點晒！
![bowl]()
加泰羅尼亞燉蛋（Crema Catalana） $68
因為個名叫燉蛋，又加上送嚟個碗又熱熱哋，兼帶點焦糖面，仲以為喺一道熱食嘅甜品，點知一滔起，比教流質，入口除面層薄薄嘅焦糖脆之外，裡面喺涼涼哋，依部份就喺餐牌所寫嘅檸檬雪葩，再加啲士多啤梨同藍莓。因為同大眾理解嘅「燉蛋」有啲分別，相信未必人人都鍾意，不過，作為見識吓其他地方嘅地道美食，又不妨一試。
![bowl]()
西班牙油炸鬼（Churros） $68
西班牙嘅經典甜品首選就喺「油炸鬼」，晌度嘅油炸鬼配搭甚有心思，因為有啲杏仁碎做裝飾，但又可以黐起嚟一齊食，再者，配摩卡醬比起常見嘅朱古力醬又喺加分位，而且啲摩卡醬幾香，一定沾唔使，所以，剩番嘅就咁飲都好正，好似飲熱摩卡咁香滑；仲有另一配角特濃咖啡雪糕，都好香咖啡味，雪糕嘅質感亦好柔滑，可是，講番個主角，西班牙油條，我哋就認為外層脆就脆，不過個心唔知未炸透定喺咩問題，有少少粉，唔夠脆身，唯有啲美中不足！
最後，嚟多一個藍色蒸籠，我哋明明無再嗌嘢兼已經叫咗埋單，原喺張單晌裡邊，真幽默。
西班牙菜食得唔多，亦真喺認識唔算深，西班牙更喺個未踏足過嘅國度，希望有朝一日，走訪這歐洲西邊嘅國家，嚐盡不同嘅西班牙小食。今晚嚟到Chico Chica，我倆都滿足離開，因為食到品質高嘅菜式，所以，值得嘉許推介俾朋友！
個人評分
味道：9/10
環境：7/10
服務：8/10
抵食：7/10
平均每人消費：HK$400
餐廳資料：
Chico Chica
西環西營盤第三街70號地下J舖
2517 9777
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
Chico Chica：質高．值嘉
Chico Chica
Italian Tomato Café (馬鞍山店)
The Crown
G-fit
Avenue75
嘉美軒精細潮州菜
Infinity Thai Restaurant & Bar
Ophelia 鳥語花香