(Day 3) 2015-9-13
住宿：Ruby backpacker
行程：Nampula —> Ilha de Mozambique
清晨0530，馬達加斯加朋友Talian要走了，話去要南部工作十四天。在住宿內陪佢等候期間，看見他手持同我隻錶同牌子Garmin嘅GPS機。嘩！要用到呢D，就問吓乜工作。
原來佢工作要去Nampula南面嘅一個森林度樹木嘅直徑，相信係有關環境保護嘅工作。真係有意義嘅工作，雖然佢要露宿山頭，但做得有意義又何妨！公司俾了兩部GPS佢，以防迷路，而我亦終於估到少少法國朋友尋晚佢講嘅工作啦，我英文水皮只識聽population呢個字，應該都關於環境問題嘅工作。
![]()
|
|
中：右面是我朋友Talian
|
跟Talian道別後再回房瞓。瞓醒早餐後同Alex逛街，期間警察好似target左Alex嘅膚色咁，共查了五次passport，Alex亦不停用葡文對答。我都當然被查啦，檢查後無問題都放行，無被屈。因為要搭1100於火車站外開出嘅小巴，所以行到咁上下我都提Alex係時候要回住宿攞行李離開了。
![]()
|
|
住宿包埋嘅簡單早餐，廚房有得任食
|
![]()
|
|
行到一個迴旋處，可能是中心區域
|
![]()
|
|
當地都幾多這類型嘅漫畫，尋日博物館內都見過
|
![]()
|
|
幫襯買少少上車食
|
臨離開時，老闆娘特別提醒我別將行李放上車頂，因為好危險，相信可能會被偷。
好人嘅Alex送我去火車站，期間又被截查⋯
見Alex都唔係好「老脾」用葡文以發佢地爛渣，但見果兩個差人又狀甚無奈地解釋，原來當地差人都唔係想像中咁恐怖啫，哈哈~
去到火車站外跟尋日視察一樣見到好多小巴，小巴於當地叫做”Chapa”。經Alex替我Confirm後，上了其中一架新款嘅Hiace貨車小巴，$200-Metical($32-hkd)，再見Alex。
非洲坐這類型小巴，通常坐滿人才開車，逼到渣甸魚咁。起初鬆動D時，隔離個當地人同我係咁傾計，仲攞出一部新款Sony notebook出來話要同我合照，又播非洲音樂來向我介紹，較有印象嘅係一首尼日利亞流行曲，因為MV幾得意。佢夠膽成部Notebook攞出嚟，看來都唔係咁危險啫~
之後陸續上客就真係迫到歡樂滿東華咁喇！前面位小男孩仲拎住隻生雞上車，似足以前回鄉探親嘅情景，求神拜佛隻雞唔好賴C呀⋯另外Chapa途中不停埋站，期間除了有乘客上落外，必定有幾十人圍住架車叫賣，後面位非洲大媽亦提醒我要小心行李，以免被車外嘅人搶走。(真係咁危險？)
個半小時後到達其中一個中途站，司機叫我地全車人轉另一部車。當地人好好人咁讓我坐車，唔使同人迫。
轉坐另一架車後，之前個司機好老實，退返$100-Metical俾我來作呢程嘅車資。於是等待開車期間買了$10($1.5-HKD)粟米、$10一梳小型香蕉。我每次買都好醒架，用最細額硬幣試佢。
![]()
|
|
右圖：見個當地人係車上開部新款Sony notebook，睇嚟都唔係咁危險啫~
|
![]()
|
|
歡樂滿東華
|
不過車頭都唔係太好坐，因為我要放個60L大背囊於腳下，隔離都坐左個人，迫到隻腳好似無血到咁⋯
坐我隔離嘅係印度裔嘅當地人，又傾起上嚟。我們一同探討莫桑比克，首先佢提醒我小心停車時攞相機出來以免被搶，跟住佢就講唔明當地人為何無遠見，才令到一直咁貧窮。佢自己有個好大嘅農場，我當然了解每個種族有不同特性，如果唔係南非以前由白人管理嘅業務，交回黑人後都唔會一落千丈啦，而佢咁有生意頭腦亦都係遺傳自印度人嘅。不過講開又講，莫桑比克有好多印度後裔喎。
前前後後車程總共五小時，看見椰子樹或棕櫚樹於路旁出現，即表示接近海邊嘅終點站。原來這車不進入莫桑比克島，要係鄰近小鎮Lumbo轉車，再轉貨車過長橋。於車斗上企穩，攞出山狗及相機，紀錄特別嘅一刻。
這五個小時車程，見證了當地人嘅民生百態，是城市Nampula所見唔到的。沿途所見路人不絕，看來”11號巴士”才是當地人的主要交通工具。而且這裡路人嘅衣著比城市所看見嘅更地道，大多色彩鮮豔，好似特登襯過咁樣，而且步行間亦再展示出頂上功夫了得。由於車速快及路面崎嶇，好不容易才拍攝到一張滿意嘅當地人照片。另外當地大多無自來水，沿途亦見到人用大型人手水揼一下一下咁抽取地下水。偶然也見當地婦女亦有用一條大木來樁D唔知乜野(後來知道是樁植物來製作飲料)。
除了民生外，生態亦好特別。沿途路旁不停看見類似有成個人咁高嘅蟻丘物體、巨型嘅包包樹等。這程車簡直又係視覺震撼呀!
![]()
|
|
幾個小時車程，沿路不停看見路人
|
![]()
|
|
車輛行走期間，好難影到這張咁有特色嘅靚相
|
![]()
|
|
路經村落，可見玉米是當地人主要食糧
|
![]()
|
|
左邊是最有非洲特色嘅樹，而右邊類似巨型蟻丘嘅物體經常看見
|
![]()
|
|
這張照片隔了擋風玻璃拍攝，雖然質素差，但有懷舊紀錄片感覺。而包包樹正是非洲的其中一個代表。
|
非洲歡樂滿東華實況，小弟第一次upload片咋
最後一程貨車只得幾名乘客，要經過一條長長嘅橋後進入莫桑比克島，而這條橋太長又只夠一架車行駛，所以不時有擠塞嘅情況。進入島後只見全是矮矮的平房，大部分更是破落不堪。貨車沿途落客最後只剩我一人，司機連人帶車駛到自己家門，隨後叫佢的兒子帶我去Ruby住宿都幾好人噃~
穿過橫街小巷，行了十分鐘路程到達Ruby住宿。住宿亦位於寧靜小巷裏，心諗出入會否危險⋯
帶到我來住宿後，小朋友自行離去，無問我收取任何回報。
讀萬卷書不如行萬理路之認識猴麵包樹：(取自Wiki)
猢猻樹屬（
學名：
Adansonia）是
錦葵目錦葵科的
植物，又稱
猴麵包樹屬。共包括8種，土生在
非洲大陸（1種）、
馬達加斯加（6種）和
澳洲（1種）。
落葉喬木，猢猻樹高達5至30米。其樹枝長得像樹根一樣，樹幹非常粗，直徑可以到達7至11米粗，需要幾十個人手拉著手才能合抱一圈。樹通常可活500年，但一般相信有些樹已有5000年的壽命
[1]。由於沒有
年輪須要靠
同位素測年齡。
而猢猻樹英文俗名Baobab，當地人都係咁叫，所以我文中都以包包樹作稱呼吧
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
