晌銀礦灣渡假酒店住宿，喺包埋早餐，講過佢嘅歐陸半自助晚餐，順利成章就講埋佢嘅自助早餐喺點。之前，睇過啲酒店網評，話佢啲早餐麻麻，反而，食評就少講早餐，點都好，心裡已打咗底。
雖然噚晚唔算早瞓，但慣咗早起，所以，大清早嚟到餐廳，就只得我倆公婆，變相包場食早餐。
照例，先巡視一下個環境睇睇有咩食，包括：多士、粟米片、沙律吧（同噚晚嘅差唔多）、火腿芝士（夾麵包或多士用）、生果。
另一邊喺熱盤區，包括：麥皮、瘦肉粥、椰菜炒麵、豬柳扒、茄汁豆、炒滑蛋、烚蛋、叉燒包、煎腸仔、炸薯寶及咖喱角。
飲品有橙汁、蘋果汁、咖啡、紅茶，整體而言，比預期多選擇，其實食個早餐，三幾樣嘢本身都夠晒啦。
![bowl]()
橙汁、蘋果汁
先嚟一人一杯果汁，雖然唔知咩牌子，但飲落如果汁先生一類，唔會太淡太差。
![bowl]()
第一碟早餐
冷熱嘢各一半，少少沙律用嚟開開胃，炒滑蛋估唔到又幾得喎，不過，早嚟有著數，因為炒滑蛋只有面部份喺較滑，越底就越變得唔滑；豬柳扒、茄汁豆、咖喱角都喺啲現成貨加工，所以，唔會有太大特別。
![bowl]()
第二碟早餐
牛油烘多士、炒麵及牛奶粟米片，再配多杯咖啡，佢部烘多士機火力唔算好強，我想食得燶啲、脆啲，就要烘兩次，搽上牛油，就已經好好食；炒麵亦都唔差，食落唔算油。
![bowl]()
叉燒包
本來食咗兩碟都覺得夠晒，不過，老婆話啲叉燒包幾好食，見佢又細細，就不妨試番個，果然真喺唔錯喎，入口包身唔黏牙，餡料又夠惹味，無乜肥豬肉。
唔止款式，就連啲質素，都比預期好，唔知喺佢哋改善咗，定喺啲網評嚇鬼，總之食得小弟夠晒飽啦！
個人評分
味道：8/10
環境：7/10
服務：7/10
抵食：7/10
平均每人消費：HK$0
餐廳資料：
灣畔軒 Seashore Cuisine
大嶼山梅窩銀礦灣酒店
2984 6863
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
