Hello Kitty 中菜軒都開咗成年
今日終於有機會去試吓! 芊芊一見到 Hello Kitty 就好開心喇!
幾時有人會開番間「獸電戰隊」主題餐廳? 對男仔公平D呢 ^>^
啱啱去完九龍公園打咗個轉, 過埋食晏時間差唔多2點
我哋就行5-8分鐘就嚟到 Hello Kitty 中菜軒
開店之後一直都未嚟, 因為驚太多人要等位, 同埋之前去街冇嚟開呢頭
一如我所料真係冇咩人, 一嚟到就直入有位坐, 仲坐喺大 Hello Kitty 隔離
影相話咁易! 影完又影, 食食吓又影, 坐喺隔離幾時影都得!
每張枱面都刻有 Hello Kitty (真係蝕落去而唔係就咁印上去)
門口隔離放咗個玻璃櫃擺放住好多Hello Kitty的產品
嗰隻Hello Kitty公仔要$398, 唔知有冇人買呢?
原來裡面環境唔算大
不過到處都會見到Hello Kitty, 吊燈, 牆飾, 茶壼茶杯都有
店內有一個房間都放了幾張枱, 這裡的特色係牆上面掛住既Hello Kitty畫
Hello Kitty係著住中國服飾, 有D係拎住個琵琶好得意! 不過睇睇吓幅畫又幾有日本風
跟住我就諗住去個厠所，順便睇吓佢厠所會唔會好Hello Kitty
點知除咗門口塊牌之外，裡面都唔係太特別！
等咗唔駛太耐就有嘢食喇，呢個叫做「翡翠蝦球蛋白飯 $128」
下面綠色嘅原來係蒸水蛋，至於點解綠色可能係加咗D綠茶粉
鮮蝦餃皇 $68
最初我以為侍應擺錯咗，另外三件擰轉咗個頭
但係原來得一件蝦餃係有樣睇！味道正常，偏鹹
馬拉榚 $48
太乾身唔夠好味！
Menu本身分開上下兩部份
上半Part嘅點心都係有Hello Kitty造型，但係下半Part就只會得塊有Hello Kitty Shape嘅紅蘿蔔/配菜等裝飾
雖然呢碟春風得意腸冇得意嘅Hello Kitty造型，但係反而有驚喜，好好食！
你可能以為佢係炸腸「両」，但係佢係腸粉皮包住春卷，佢春卷餡仲有D好似炸軟殻蟹咁嘅脆脆喺度(可能真係)
$42 碟都每件值 $7 㗎！
難得咁貴食一次，幾歹都影相影番夠本先起筷
芊芊最識食鍾意食蝦餃，所以俾個有Hello Kitty樣嘅佢食
食完之後佢仲拎起塊蒸籠紙上嚟放喺面度，好似膊Mask咁，好攪笑！
食得七七八八之後我哋再叫多個芒果布甸(係哥哥至愛)
等緊嘅時侯我哋出去同佢個生招牌影番幾張相先
嘩，Hello Kitty芒果布甸嚟啦！$58 好貴囉！
其實有Hello Kitty造型只不過係布甸上面粒朱古力...玩嘢咩！
Photo by CANON 5D Mark III, Len | EF 24-70mm f/2.8L USM
呀劍評分: 8分
8
[飲飲食食] 佐敦 Hello Kitty 中菜軒
Hello Kitty 中菜軒
Italian Tomato Café (馬鞍山店)
嘉美軒精細潮州菜
彩晶軒 V Cuisine (荃灣分店)
Fish & Chick (西環店)
欣圖軒 Yan Toh Heen
恆河咖喱屋 Hin Ho Curry Restaurant
大戶屋 Ootoya (太古店)