7 新同星茶餐廳：假日單車行．強新健體

由山區麵包王於 2016-01-01 00:00:00 發表 | 累積瀏覽 1075

分類：

身為九龍人，入到嚟元朗食早餐，並非為咩人氣長龍店，仲只喺隨隨便便、隨遇而安搵咗間「新同星」，皆因趁假日同老婆入嚟踩單車，當喺做運動強身健體，我哋住美孚（近西鐵一邊），入嚟元朗非常方便，幾個站就到。

「新同星」絕對喺好街坊嘅一間茶記，唔單止裝修舊，有老店嘅味道，入嚟好幾個客，都即時同老細或其他伙計打幾句牙骹，老細回佢哋一句食乜？喺咪照舊？可見喺幾熟嘅街坊老友。講真，佢哋啲招呼亦唔錯，禮貌週週。

早餐底面兩版印晒出嚟，無乜花臣嘢，都喺晌茶記常見穩打穩紮嘅類別。小弟揀營養早餐，貪有麥皮食，因為唔知點解自己煮親都無出面咁好食，而老婆則選自選湯粉麵早餐，貪有素菜選擇。

營養早餐 $26 / $28

牛奶麥皮配三文治，單選材料$26，雙拼則$28，小弟只揀餐肉，飲熱奶茶。牛奶麥皮幾綿密，仲要喺少甜，果真夠健康。而且，份量都幾多，女生嚟淨食碗麥皮都夠呀！

餐肉三文治，絕對交足貨，餐肉無俹簁，厚切大塊，啲牛油熱到溶溶哋，正呀。

自選湯粉麵早餐 $28 / $30 / $31

幾錢份視乎你要咩主餸料，另配有牛油方包拼火腿 / 餐肉 / 煙肉 / 煎蛋 / 腸仔（任擇兩款，可重複），結果，佢要咗炆冬菇米粉，冬菇大件厚肉，好有菇香，配上米粉，淡淡清湯，簡單可口。

牛油方包配煎雙蛋，老婆怕怕哋牛油，所以益埋我多件蛋治，佢只要一隻蛋做餸就可以喇。故此，份早餐其實都幾大份，我哋講笑咁話，一對母子落嚟兩個食一份餐都夠呀！

奶茶、好立克

晌茶記，飲奶茶永遠喺最佳選擇，新同星嘅奶茶茶底不俗，茶香沉實，亦拉得滑，紅茶跟花奶嘅比例都啱啱好。

今早，小弟算喺叫食咗份半嘅早餐，夠晒氣力，出發，向屯門進發。題外話，晌天豐單車（元朗西鐵站附近）租單車，全日$50，唔知喺唔喺最抵，但可以玩成日都好抵吓！雖然由元朗可以踩單車入到屯門，但非常唔好踩，因為沿途經過好多屋村，又要過馬路，超多燈位及管制區，條單車徑如斷橛禾蟲，近乎「推車徑」，極之掃興。雖然喺咁，老婆都玩得好開心，因為佢話10多年未踩過。

條單車徑有好多馬路及燈位

難得老婆踩得好開心

個早餐真喺好頂得飽，加上今日條單車徑對小弟而言，好濕碎，都無乜需要點出力，所以，晏晝飯都唔需要食，只喺返到元朗再搵啲小食過吓口癮就夠喇！

個人評分
味道：7/10
環境：6/10
服務：7/10
抵食：8/10
平均每人消費：HK$27

餐廳資料：
新同星茶餐廳
元朗泰祥街25B號舖地下
2442 1988

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

鐘意SeeWide的分享，給我們一個Like吧！