連環哈碌的兩父子
最後一日，老豆把眾人叫醒之後一個人落樓下公園散步，順便去便利店買幾個包番來做早餐。望望露台外的幾棵樹，始發現大樹的葉比起6天前我們剛到步時紅了不少。這露台的景觀相當不錯，只是我們天天早出晚歸，都沒有好好享用這露台。
露台外變紅了的葉
喺露台見到落左街買早餐嘅細佬番緊來
老豆晨運時影低左屋企棟大廈
bye bye 東京屋企
bye bye 東京屋企個廁所。阿媽話費事即到人地個屋企咁污糟，走之前要抺一抺
bye bye 東京屋企個廁所個浴缸
由於下午需於上野坐Skylinner到機場，我們決定先把所有行李寄存在上野火車站，再到上野附近的淺草寺去。由於不知火車站的locker有幾多，所以都不能太遲出發，因為冇locker用就麻煩。
哈碌第一回
9點離開親愛的東京屋企，一行5人帶著行李來去地鐵站。屋企部lift細，要分兩批落樓。老豆同阿爸先落，我、媽、細妹下一round。部lift係透明lift，我地三母女準備入lift之際，竟然見到老豆同細佬個頭喺lift入面緩緩升上來，好明顯佢兩條友頭先唔記得禁 lift。由於佢兩個喺部lift度升番上來個畫面太搞笑，我同細妹一見到佢地就忍唔住爆笑，我細佬自己都忍唔住笑。激動的心情直到離開左棟大廈都未能平復。
bye bye 東京屋企大堂lobby
正式告別東京屋企了
哈碌第二回
去到地鐵站，準備出閘時老豆才醒起張地鐵pass收左喺尋日著果件恤衫個袋入面; 而件恤衫，好不幸已經俾阿媽收左入最大果個喼嘅其中一個壓宿袋入面。無奈下惟有在眾目睽睽之下於地鐵站開喼搵番張飛出來。當然老豆少不免俾阿媽鬧一餐。
玻璃外的阿婆一直望住地鐵站呢班打開個喼嘅香港人
搶locker之役
未夠十點來到上野京成電鐵站，發現locker並唔係想像中的多，最大的locker更加已經俾人借晒。我地一行四個喼+一個大backpack，正猶疑應該點樣分配D喼同locker之際，突然出現一大班拖著行李的遊客要來租locker，Locker頓時手快有手慢冇，情況十分混亂。有遲來一步的遊客真係租唔到locker。 我地一家最後總算「擺」到到兩個中型locker同兩個細locker，好彩D細locker都放得落一個喼，勉強都可以將要寄存的行李寄晒。估唔到東京京成電鐵的locker原來咁短缺，真係爭遲一步都冇，就連諗吓租邊個size的Locker的空間都冇。打完一場「搶locker之役」以後，我到售票處換領下午5點鐘從上野出發到成田機場的skylinner車票。我們的東京Family
trip，很快就到尾聲了。
淺草寺
坐一個地鐵站去淺草寺，本來這天想去埋東京大學同上野公園，但恐怕時間不夠，只能去一個景點。
俾老豆偷影
這天是星期日，淺草寺雷門前的那條手信街擠滿了人。團友們對這裡的手信小食都很有興趣，在這條手信街花了不少時間。
行完手信街進入寺廟範圍，看到兩班童軍在叫口號呼籲人捐錢。我們剛好用剩大量散紙就決定都捐晒出去。不過正當阿媽拿著大堆散紙去捐錢之際，原來童軍門已開始散band，阿媽走到提著錢箱的童軍領隊身邊示意要捐錢，童軍領隊就讓她把錢放入錢箱裡。由於零錢實在太多，放錢都放左一段時間。終於入完，三個童軍領隊都向她躹了一個躬。我不禁失笑。我地捐出的只是大量1 yen
/ 5 yen / 10 yen/ 50 yen等唔值錢既散紙，實在唔deserve 一個躹躬，何況是三個人的躹躬 ?
搵緊散紙去捐的阿媽
離開雷門，我們在雷門週邊的那些有點鴨寮街 feel的攤檔閒逛順便找吃的。老豆一直說要在日本買隻平平地的夜光錶，結果竟然在最後一天搵到，才三百多港元 ，仲買左個銀包 ，雖然我極懷疑都是made
in China。
時值星期日，雷門週邊食肆的生意都不錯，有D仲要排隊等位。老豆一話要食就唔等得，又話要試試拉麵，眼前的確有一間食堂有位，但那食堂感覺比較低檔，店內的人都不似遊客，只有幾個中年麻甩佬，仲食緊煙，我本人實在唔多想入。但老豆唔想再搵，細佬又鍾意呢度可以食煙，而我只是個有職責冇地位的苦命導遊而已，並沒有say，所以就入左呢間草根食堂食我們在東京的最後一個午餐。
草根食堂果然比較草根，服務都比較親切友善。食堂內的電視機原來播緊賽馬，店內的幾個麻甩食客一邊食煙，一邊睇賽馬炮馬經，跟香港的馬迷十分相似，呢間食堂的確岩晒同樣草根兼麻甩的老豆feel。細妹見電視播緊賽馬就跟老豆調位，俾呢位香港資深馬迷睇吓久違了的馬。食堂雖然草根，但十分乾淨，也沒有被二手煙影響。而且，竟然有English
menu!!
我們的光顧似乎帶往了這家草根食堂。不一會兒，本來門庭冷清的食堂已經坐滿了遊客。想不到我們今早在京城電鐵火車站帶旺了那裡的locker出租率，食飯又帶旺左間食堂，一坐低就令食堂爆滿。
食飽之後，我們來到了一條有點像大阪心齋橋的購物街。一家皮具店大減價，全店手袋同類似UGG毛毛鞋都只係500yen 一個。阿媽唔執輸買左對毛毛鞋同手袋，而我們都不太想在日本買made
in China的東西，所以都沒有購買。整個東京之旅最滿載而歸的，應該是我媽。
回到上野大概兩點多，我們想在上野JR上蓋的商場再逛一會。老豆話攰唔想再行，想搵個地方坐。只是這個商場一樣沒有讓人休息的地方，又沒有快餐店，我們只好把他帶到Starbucks，買了杯茶和蘋果批讓他邊吃邊等。想不到一向麻甩的老豆竟然會跟Starbucks扯上關係，在Starbucks歎茶食甜品。
安頓好老豆之後，我們一行四人就繼續逛逛那個JR 商場。只是商場規模其實不大，賣女仔野多，阿媽同細佬行左一陣就番Starbucks搵老豆。我同細妹行到四點三都番去，準備坐五點skylinner去機場了。
前往成田機場的skyliner列車
bye bye東京
哈碌第三回
從上野出發，不用一小時就到達機場。架車好舒服，大家都在車上打瞌睡。在terminal 2落左車，細妹發現細佬好似比來果陣少左D行李，諗真D，原來佢漏左個背囊0係架車度，而架車已經開走左，去緊terminal 1。立即搵車站職員求助，但月台上只有幾個警察。警察的英文不太好，說了好幾次他才明白我們發生什麼事。他把我們refer 去skylinner的職員度，職員問我們坐位資料後就call車上的職員去搵個背囊，雖然冇俾人拎走，但我地要等架車駛番來terminal 2，大概要等二十分鐘。好彩本身都預早左一班車的時間，如果唔係就大穫。
剛從skyliner職員手上取回背囊的弟弟
等左20分鐘，skylinner職員拎左細佬個背囊上來。我們就繼續趕去Terminal 3。成田機場的交通工具只去到terminal 2。我們得走五百米路回terminal 3。本來沿著扶手電梯的指示走，很快就可以搵到行去terminal 3果條路。不過我地咁多喼就打算坐lift，但lift沒有去terminal 3的指示，唔知去邊層出，結果我地層層都出左一次先搵番去terminal 3果條路，好百痴。
哈碌第四回
來到terminal 3已經有得check in 了。我地5個人只買左3人份的行李，磅好行李冇超重先去check in，點知細妹本來打算hand carry 果個喼被發現大左D，唔俾Hand carry，要寄艙。個喼係專係俾人帶上機做hand carry的，無諗過會過大。好彩地勤都好好，俾時間我地開喼拎走兩對鞋又磅左幾次，直到冇超重先寄，搞左頗耐。幾經波折終於搞惦可以去食飯。
又回到最初的起點- 成田機場Terminal 3的food court，幫襯第一日來0既時候果間烏冬店食最後一頓晚飯。
「哈碌」第五回
食食吓飯，好似聽到機場廣播叫細佬個名，話佢行李有問題要去check。頭先漏左個背囊喺火車度單野佢都仲驚魂未定，依家聽到話行李有問題之條友又發脾氣，爆晒粗話唔X 理。由於日本人讀中國人名發音有D奇怪，我地都唔敢肯定。好在廣播會讀埋係邊班機幾號座位嘅人行李有問題，對過座位編號之後發現唔係佢，先知係虛驚一場。
食飽入禁區。Terminal
3的禁區只有幾間 duty free shop，已經擠滿了香港人在店內作最後衝刺，狂買手信。細妹之前一直想搵一種東京出的香蕉蛋糕，超市搵唔到，估唔到機場有大把，連我在河口湖買的kit kat富士山 strawberry cheesecake 都有得賣，價錢都係差唔多，唔怪得咁多香港人在機場喪買啦! 本來細妹拎左幾盒香蕉蛋糕想買，睇真D原來唔夠兩星期就過期，於是只買兩盒算。不少香港人都係在duty free shop買到最後一刻先上機，十分瘋狂。日本仔呢招好毒呀!!廉航機場禁區唔賣高檔野，賣小食手信，價錢同出面差唔多，令貪小便宜的香港中晒招，不自覺地愈買愈多，連我家果兩個女人都不自覺地跟香港同鄉們在東京的機場作最後衝刺。
本來諗住上機前裝D水入水樽，但我地在terminal 3禁區搵唔到水機，反而見到唔少人在樽裝水自助售賣機前排隊買水。原本禁區係冇免費水飲。再一次證明日本仔好毒，陰我地上機前狂買手信之餘仲連水都要賺我地。好一個令人又受又恨的國度。
============================================
感謝 lingwhatever 提供以上資料
lingwhatever的網誌: http://lingwhatever.blogspot.hk/
============================================
