2月6日(Happy Friday)~過年前真係忙到甩轆
星期二終於做完大掃除~星期三..算休息一日
出去買定材料~星期四..留力整蘿蔔糕 & 芋頭糕
今年兩款鹹糕都整得唔錯~相片已經出左係FB專頁
用返上年個食譜..所以唔寫啦! 另外..買盒"大樹菠蘿"
今年試整"菠蘿蜜年糕"~個名好靚! 感覺仲帶點禪意^^
原本星期四整晒三款糕~不過手腳放慢..年糕依日先有時間整
其實我唔知用"菠蘿蜜"整年糕好唔好食~不過直覺應該幾夾
所以試下~未整果陣同朋友講~佢話不可思議..想像唔到咩味(哈)
一盒份量..整左3盒細既長錫紙盆~剩返少少..用撻模整埋佢
本身我地都鐘意食菠蘿蜜~好多時買黎做生果
聞既香味係重過食入口~入口就比較清香淡甜
今次用黎整糕都一樣..聞既香味好重
煎香試試..入口帶軟糯~味道屬清淡甜
淡淡菠蘿蜜甜味..起初唔太突出
反而食完過一陣..口腔既菠蘿蜜味
會慢慢浮現..慢慢有回甜感~感覺幾得意
依款"菠蘿蜜年糕"唔錯~慢慢浮現出味道..感覺好神奇呢
食譜 :
1. 大樹菠蘿(連核400g - 起肉打蓉) 2. 糯米粉(320g) 3.澄麵(80g)
4. 清水(370g) 5.甘蔗片糖(220g)
1. 煲熱清水+片糖煮溶~拌勻待暖
2. 粉類篩好~加入糖水拌勻~加入大樹菠蘿蓉..完全拌勻
3. 糕模掃少許油..倒入年糕粉糊~慢火隔水蒸20分鐘至全熟即成
p.s. 可用牙籤刺孔試熟度~無黏糊狀即熟
============================================
感謝 Yanomi 提供以上資料
Yanomi的網誌: http://www.yanomichung.blogspot.hk//
============================================