今日黎到沙田辦年貨，因為商場有齊哂要行嘅鋪頭，特別係IT店，買外套同上衣等都有大減價，今日特登再去買過！一見旁邊有間雪糕店，旁邊仲有藍色嘅吉祥物，原來就係之前係旺角Sweet Monster嘅分店，二話不說，正餐都唔食就去食雪糕啦！

爆谷有幾個口味，有奶油、焦糖味、芝士焦糖、士多啤梨、朱古力！爆谷$29/盒唔算貴呀！不過味道吸引好難選擇呀!!爆谷雪糕一律$39，餐廳menu圖文並茂，各個款式價錢劃一，令食客睇得更方便！

係排隊嘅時候，差啲跌到一位老婆婆，因為佢手拎住店員啱啱遞俾佢嘅雪糕，開心到雙眼聚焦係雪糕上，就好似重回返小時候嘅樣子，邊個話潮流嘅食品只是啱年輕人，其實樂意接受新事物，或對身邊嘅事都感興趣，潮流可以由所有人帶領！

芝士焦糖爆谷雪糕 $39
芝士 一直都係我同朋友嘅最愛，芝士焗薯條、芝士火鍋、甚至芝士蛋糕等我哋都好鍾意，近排韓風食物大行其道，芝士更成為去韓國餐廳必點嘅食物之一，好似芝士拉排骨、芝士忌廉炸雞咁，大家都會覺得好新奇！都冇諗過有芝士爆谷雪糕！！要試過先知到底係咩味道？

店家就係牛奶軟雪糕嘅表面，放滿爆谷，密集都唔知係邊度入手 哈哈，鹹香嘅芝士味配搭甜甜雪糕，令爆谷味道更得出，而焦糖爆谷同樣脆口，雪糕外型突出，另外仲有焦糖、牛奶、士多啤梨、朱古力爆谷雪糕俾大家選擇，絕對帶得起潮流！

開心果仁Tiramisu拼雪糕 $59
不過太為食，一次過再點埋雪糕，揀咗開心果味，仲有可配搭Tiramisu，如果果仁可以焗得香啲再加入雪糕，相信食客都會感受到呢份用心！

朱古力爆谷 $29
我就留左盒朱古力爆谷比自己 嘿嘿，從前細嗰第一份暑期工就係戲院到做，最印象深刻係學到整爆谷，雖然只係做咗兩次，真係好好玩！諗返起，可以做一啲食物出嚟，有咁多人會享用到，感覺都幾特別，所以對朱古力爆谷情有獨鍾！而店家做嘅爆谷調味都唔會好甜，打開之後只可以放幾日，不過大家記得一次食唔可以食太多呀，可以同多啲朋友分享！

Sweet Monster
星期一至日: 11:30-22:00
沙田沙田正街18號新城市廣場412號舖
Tel: 2697 0510
分店：屯門、旺角、尖沙咀

============================================

感謝 mohkc 提供以上資料

mohkc 的網誌: http://www.openrice.com/zh/gourmet/reviews.htm?userid=717759&city=hongkong

============================================