圖片摘自<上水人大聯盟> Facebook
其實McDonald都算係大財團。 大財團的一間分店執笠本來都冇乜好可惜。不過近年來香港人失去的實在太多，尤其是深受水貨客困擾的上水，以至上水人對開業超過二十年的新都McDonald結業都十分感慨，紛紛在<上水人大聯盟> Facebook留言或分享在McDonald的最後一夜。
對一班上水長大的八十後而言，新都McDonald係一個充滿集體回憶嘅地方。八十後的我們係睇 McDonald 廣告大。當年的 McDonald主打細路市場，即係我地八十後。麥當奴叔叔、小飛飛、漢堡神偷、滑嘟嘟由細睇到大。初初搬來上水時還未有 McDonald, 最近都要出太和。到後來新都商場建成，大概是我讀小三/小四的時候，McDonald 霸氣地租了地下的 king size 鋪位，估計有成萬尺，細路欣喜若狂。還記得當年新都老麥開張第一晚，生平最憎食老麥的爸媽都唔怕人迫 （還是敵不過我地三姐弟妹的「威迫」？），帶我地幾個細路去食晚餐。晚的情景到今日都仲記得。細個覺得這家King Size McDonald 真係好大好正，喺外面行過仲可以聞到濃烈的炸薯條香味，收銀有成十條 line都依然要排隊，店內仲有個區專搞生日會，有幅巨型 McDonald卡通人物油畫，睇見都開心 (可惜一直以來，都未被邀請過參加McDonald生日派對，童年遺憾也)。門口仲有個麥當奴叔叔蠟像迎賓。
家裡唯一一張上水新都老麥的照片，是妹妹幼稚園時跟學校參觀新都老麥時拍的。背景是文中所說的那幅McDonald卡通人物油畫。
為左氹阿媽帶我地食新都McDonald，我同細佬將當年<大家樂永遠一百分>的大家樂廣告歌重新編曲改詞，運用了「排比」、「遞進」等修辭手法寫成了一曲 <麥當奴永遠無限分> :
<麥當奴永遠無限分>
「豆泥」酒家只得零雞蛋。
(註 : 原名圓苑酒家，喺上水舊墟，又污糟又殘舊，我地細個都好憎去。但老豆貪佢易搵位，又近投注站，所以雖然「豆泥」都成日要去)
大快活只得二十分。
(註 : 喺屋企樓下，仲未執)
富江酒樓只得五十分。
(註 : 喺屋企樓下，細個成日去，舊年執左)
大家樂永遠一百分。
(註 : 喺新都老麥隔離，舊年執左)
麥當奴永遠無．限．分!!!
因為新都老麥夠大，門口位置經常被區內老人師奶及菲傭姐姐（當時未流行印傭）佔據吹水。踏入二千年，McDonald轉打年青人老線，target依然是我們八十後。店內的麥當奴叔叔、小飛飛、漢堡神偷、滑嘟嘟等幾乎絕跡，但我地中學生依然鍾意放學去食吓新地，傾吓 project。 連我媽有次同老豆吵架 “離家出走“都係走左去新都 McDonald. 你話上水新都老麥點會唔係我地嘅集體回憶？
新都老麥一直生意都好好，所以開左之後，好快上水就接二連三開左幾間老麥，高峰期有五間。到後來，自由行殺到，新都廣場大幅加租，新都老麥的鋪位面積大幅縮小至原來的四份之一，已經沒有以前的霸氣，變得狹小而焗束。加上店內愈來愈多自由行及麥難民，而我也過了認為“麥當奴永遠無限分“的年紀，所以愈來愈少幫襯，只是偶然行山前去買個早餐打包。去年新都大家樂結業，網上流傳老麥都做唔住，我以為只係吹水，深信大財團不會倒下，但，賣快餐又怎會敵得過金鋪藥房化妝品店的衝激？現在，曾經叱吒上水丶陪伴上水八九十後成長的新都老麥曾的倒下來。
連財雄勢大的老麥都做唔住，上水人就快出街無飯食。
