期待已久嘅日子終於嚟到，自2014年12月陀住曉去台北babymoon(12-12-2014：台北babymoon day 1．難得貴賓體驗)之後，我足足一年冇出過門去旅行啦，之前2015年10月去大澳酒店住一晚(1-10-2015：曉出遊注意day 1(part 1)．大澳文物酒店)都唔係好止到渴，當爹媽姐恒期間有無數個trip要prepare對於呢個只係其中之一嚟講，呢個trip係我唯一嘅盼望～其實曉9個月人仔第一次出國都算好快了﹗難得有尼個契機去參加婚禮，我哋有得開心一家七口一齊去旅行～
day 0係咩行程？執行李丫﹗平時我哋兩個出門，可能出發前一日or出發當天至執，但今次要帶埋曉，好驚啲嘢拎起手冇得用，所以執行李呢件事都有少少緊張，要帶住曉搭飛機又有少少緊張，我個人都係去到第一個目的地檳城先至放鬆落嚟呢～
其實都考慮咗好耐帶幾多個喼好，去七日夏天嘅目的地，衫褲鞋襪唔會好厚，但三個人一隻大喼都好似冇乜可能，雖然話公公婆婆支援我哋可以幫手帶啲曉嘅消耗品如尿片、baby food之類，但我又唔想搞到空間好緊張，買嘢都要就住啲行李咁，所以索性帶兩隻大喼咯～今次我隻桃紅大喼係佢最後一次服役啦，四年幾來風風雨雨，用埋今次要退役了，仲記得嗰陣係honeymoon時專登新買嘅呢，都有少少唔捨得呢～
出發時我哋兩個大人嘅東西基本上放晒入我隻桃紅喼度，爸爸隻黑色布質喼就讓俾曉用，佢有啲比較bulky嘅東西，黑喼空間闊啲～我帶咗啲咩俾曉？
衫褲鞋襪：我只帶咗夏天衫衫同泳衣去，多件薄外套，我哋出發時著住嘅冬天衫打算回程時著番就好，出發嗰日13度，凍過13度嘅機會應該唔大吧？﹗結果⋯我哋返嚟嗰日係香港幾十年來最凍嗰晚﹗﹗好在落的士入屋苑lobby都係幾步路，攬到實一實都ok～其實啲夏天衫衫都係專登買㗎，因為香港係冬天，曉基本上冇呢個月數嘅夏天衫，我都考慮咗好耐9m嘅佢應該買6-9m size定係9-12m size？6-9m可能fit啲舒服啲好睇啲，但9-12m又可以到春天仲有機會著到，結果我買咗連身上身衫係9-12m，買咗少少連身裙子係12-18m，幾條褲子係12-18m，大不了唔啱著就真正到夏天至著，turn out全部衫衫都ok喎，good﹗﹗我已經係英國牌子next網店嘅fans啦，間唔中就會上去逛逛，啲衫又平又靚～衫衫數目冇預到好多，所以中途都要洗衫，辛苦爸爸了～
http://hk.nextdirect.com/en/
尿片：以平時平均每日用6-7塊嚟講，我預鬆少少，一包新嘅片片64塊執起14塊，帶咗50條去～夠晒用有突啦﹗馬來西亞無論係檳城定係吉隆坡，育嬰設備唔多，基本上只有吉隆坡嘅機場同靚靚大商場至有用過育嬰室嚟換片片，其餘時間都係偷偷摸摸務求唔好打搞到其他人快快手手換就算，加上天氣熱流汗多，即使飲水再多，比起平時濕片都冇咁多，所以都冇用好多片片～濕紙巾同埋換片墊呢啲當然係必備啦﹗
食物和水：好在我哋餵人奶，只要帶條餵奶巾就解決咗奶奶嘅問題﹗yeah～曉剛剛加固時我買咗個象印燜燒杯其實都有少少for呢個trip希望生米焗成熟粥俾佢食，係屋企試焗時啲粥感覺唔太綿(因為嗰陣我唔識要預熱個杯，同埋唔知要用熱水洗米)，而要配料亦係一個問題，結果放棄咗燜燒杯，決定帶14餐樽裝baby food去﹗又帶定啲樽裝果蓉～我搜羅香港唔同地方買到、唔同牌子、唔同口味嘅baby food帶去，曉開頭都正常地食晒成樽，仲唔夠飽要追加奶奶或水果，但佢食到第五、六日都係頂唔順餐餐差唔多味道，開始抗議，寧願食我哋啲白飯都唔願意食baby food﹗okok，下次三月底去台北，你差唔多一歲了，俾你跟我哋食大人嘢啦～水我就冇特別帶，成個trip曉都係飲當地嘅樽裝水，倒入佢自己個飲管杯度，so far佢又冇抗拒，飲咗都ok～帶定啲餅乾應急用啦，結果都係我哋食下snacks時本著人有佢要有嘅心態食咗少少星星餅咋～旅途中有買水果俾佢食，提子同香蕉都好方便～而自助早餐亦俾到蛋黃配白粥、新鮮水果俾佢一齊分享～
餐具：平時係香港，係屋企或者出街，都係洗腳唔抹腳咁一餐用一條口水肩做餐巾， 一餐用一條紗巾嚟抹手抹嘴，一餐用一隻匙羹用完就掉入洗手盆⋯但出門唔可以帶咁多嘢嘛，所以我哋好有紀律地只帶一隻匙羹同一條食飯肩，用完就洗，肩肩未乾就「晾」係背包外面，濕紗巾就放入小盒仔每餐洗，都好work呀～不過返到嚟香港我哋又變番懶鬼了～帶定咗套係大人椅上面嘅「流動baby seat」，結果都冇用過，雖然馬來西亞育嬰室唔多，但餐廳嘅bb椅又居然好充足喎，令人吃驚嘅係，居然似大排檔嘅地方都有bb椅﹗讚呀～另外都帶定一堆bb抹嘴抹餐具用嘅無菌濕紙巾，獨立包裝啱晒去旅行用﹗
梳洗用品：係呀，平時用開嘅牙刷、抹口仔嘅紗布、指甲鉗、bb沖涼液、紗布大毛巾、潤膚lotion等等當然都要照帶啦～
玩具和圖書：呢個真係超重要﹗﹗﹗搭飛機成三個幾四個鐘一程，仲有啲長途車，唔計瞓覺唔計食飛機餐都有好多時間要同曉消磨，我帶咗四件佢favourite嘅玩具、幾本圖書，好在都用得著～
坐駕：有少少誇張，我哋帶咗bb車+兩條揹帶去，bb車我有少少後悔的，因為旅行其間出去玩其實都冇俾佢坐，推車仔唔太方便，又要上車落車，推嘅路亦凹凸不平，結果都係長期用hip seat揹帶，我同爸爸輪住揹﹗架bb車最後都只係機場度推⋯點解要兩條揹帶？其實嗰條babasling係平時用嚟抱曉瞓覺用的，我覺得帶埋都係好正確嘅選擇呀，最主要係上飛機時用，hip seat太大舊，係閘口臨上機hip seat連埋bb車一齊寄倉，babasling係機艙裡面用就比較輕巧，要收埋都可以塞入背囊入面～good﹗
睡袋：一早要求酒店要安排bb床，但原來係超軟床褥嘅網床而唔係木床，曉咁大個女係張床度都窩咗入去轉唔到身，結果佢咁多日都係同我哋瞓大人床啦，冷氣又唔太凍，睡袋就冇用過lu～
備用藥物：只帶咗體溫計同埋啱啱出發前出玫瑰疹食剩嘅藥咋，其實bb係旅途中病都係唔好隨便亂食藥，買定旅行保險有需要係當地睇醫生比較穩妥，好在曉呢個月雖然不停病，但萬幸係旅途中嘅七日都健康生猛豬豬～
防曬防蚊用品：防曬我只帶咗遮同埋帽咋，旅途中用咗姨媽嘅防曬霜，但我怕曉會皮膚敏感，只搽係手腳，雖然好勤力咁擔遮，但佢都曬到黑咗，好在就冇曬傷過～帶咗啲防蚊貼，但好似都唔太work添～照咬﹗可能嫰脾脾太好味～
行李執得差不多，下一篇blog就出發咯～
待續
前往其他馬來西亞旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 247276
全部攻略 705
全部回應 10
