(Day 3) 2015-1-7
住宿：Tanjung Piai resort
行程：新山 —> Tanjung Piai
今日嘅目的地，是想去看看亞洲大陸最南端嘅所在地。
0800起床食酒店包埋嘅早餐，中式有粥、西式有薯片焗豆，仲有日式昆布湯之類，都算豐富。
0915 check-out後，要等到1000才有shuttle，便步行前往巴士站，唔等shuttle了。
去返JB Central巴士站，聽到站務員高叫Larkin, Larkin, Larkin就上車了。1005時去到Larkin，係更大規模嘅巴士站，有麥記、冬甩店、當地服飾、手提電話店等等。到巴士站時剛好有架 22巴士開去西部城市笨珍，仲有冷氣添。
![]() |
| 酒店附近 |
![]() |
| 右：車票 |
一小時車程到達笨珍（瞓得好舒服），見當地特產是菠蘿，周街都賣，仲有菠蘿造型嘅地標。到站後又剛好上了架黃巴士去Kukup龜喀島$2.8-RM，俾了錢再睇清楚車頭目的地個牌，見到個英文名似曾相識。攞出地圖一看，原來有我想去嘅最終目的地，亞洲版塊最南端嘅國家公園Tanjung Piai 。於是詢問司機是否前往，可惜他只懂馬拉語，叫站長幫忙。站長稱尾站就是國家公園，而即日尾班車是2130。(尾班車時間由於言語不通，不知是否準確) 尋日上網搵資料又話無無何公共交通直達嘅？要從Kukup 包車或的士才能前往... 總之有車去太好了，發現新大陸或第一手資訊咁～ 係銀仔最擅長的<— （又係度自吹自擂）
由笨珍來到Tanjung Piai車程半小時，架車無冷氣，比較舊式，成車得五、六人並於中途站落晒車。到達尾站只得我們兩人，可見真的無人嚟架⋯ 下車後車長指示我們向前行就是，用身體語言詢問後得知下一班車於1600開出。
![]() |
| 落車後司機指示我們向前走 |
起初諗住係笨珍或龜喀島找住宿，再坐車前往國家公園，見有車直達當然更改計劃啦！拖住個有轆嘅袋前行，好在不是大件行李，都唔急住搵住宿。不過正值中午，天氣太炎熱了，曬到頭爆。無耐見到一個渡假村，嘩！外型好似幾正喎！係伸延出海嘅屋仔咁～港女又啤住我話「book定先吖嘛！」哈哈～ 睇嚟有排比佢講了。入到去，見到好親切嘅接待員，問住宿種類同幾錢。了解到有獨立屋同客房，價錢都唔太貴，於是要求參觀一下。比較貴嘅獨立屋係家庭房，係石屎版棚屋，可惜只係望紅樹林，不選擇了。最後入住平價標準房（約$150-RM），揀了間景觀最正嘅單邊房，嘩！房間裡兩面環海，望住個馬六甲海峽。接待員話未見過香港人，來這裡遊客主要是本地人，所以酒店都是較為基本而殘舊，不過有自來水、冷氣已經好好了。
@1230
![]() |
上：我們入住其中一間普通房，有無敵嘅景觀
下：獨立屋只能看到紅樹林 |
![]() |
| 右上：可以瞓住睇海景 |
大熱天時不宜外出，見已是午飯時間，便幫襯酒店餐廳。點了個中型海鮮飯、牛油蝦、炒菜，同埋果汁。個炒飯雖然話係medium，但都好巨型，令我諗起關島嗰個連四個人都食唔晒嘅Combo呀！以免浪費食物，盡食... 都總算食了七七八八。$61-RM，約$120-HKD。
食完飯，開Google map一睇，國家公園應該離這同名嘅住宿有一段距離。無公共交通公具前往，問清楚步行時間約為半小時，都係回程才行吧。去程叫reception 幫我們call的士，但call唔到。話有電單車送我們去，不用錢，是酒店服務喎~ 太好了，仲講明話男載男、女載女。係喎！這是伊斯蘭教國家噃～ 所以這行程於馬來西亞我同港女最成日講笑就係「石刑」，係新加坡時就講「打藤」，哈哈～
電單車五分鐘車程，到達國家公園，俾完小費酒店職員，佢地話唔收之餘，仲問我地幾時回程，可以再接我地返酒店。我地都係塞咗小費俾佢地，同埋話一條直路無問題，玩完會自己行返去。去到售票處，見到本地人票價係$5-RM，外國人要$20-RM($40-HKD)。入場時查票職員先話亞洲大陸最南端嘅地標，近100米嘅通道因被海浪沖爛咗而關閉，無緣了... 既然來到也要入內，去較近位置影張相。沿棧道行，穿越紅樹林便到達封閉位置，能遠距離看到地標，相信我們站立位置已是亞洲大陸最南端吧。期間用八爪腳架夾棧道扶手來自拍，夾得唔穩，成部相機跌落紅樹林的泥濘。好在泥濘有避震作用，只是污糟一點啫。
之後去多一個瞭望台便回程，期間港女仲攰到係瞭望台櫈上瞓著左添。（港女按：俾海風催眠）回程時見紅樹林有好多動物，有好多蜘蛛網。港女忽然大叫，我都嚇一嚇，原來佢發現有條蛇盤據於棧道旁，仲見有巨型蜥蜴。
返回出入口處，嘆緊雪條時遇到傾盤大雨，好在有瓦遮頭啫。上網話政府保護這自然生態區已算唔錯，可惜紅樹林內仍然有好多垃圾。在園內參觀了個多小時都無見到其他遊客，可以話係包場遊覽。這個世界之最乜乜，比起其他地方嘅世界之最乜乜吸引程度應該差好遠。網上得知原來當地政府曾經大力宣傳，但成效不大。可能方圓百里都無其他吸引景點或配套啩，所以無人專程嚟睇。來到馬來西亞最南嘅柔佛州，最出名嘅Legoland及outlet 通通都無去。我喜歡去這類較特別嘅地方，讓平凡的旅程變為不平凡。
在景點接待處避了一陣雨後，雨勢稍減，便出發步行回程。沿路看到路面於下雨後蒸起一層煙霧，可見地面溫度極高，我同港女蒸住行路返住宿，約半小時抵達。沖涼後已是1730時，從房間睇唔到日落，於是小睡片刻。瞓了個半鐘至1900時，瞓到唔願起身。
晚飯又海鮮餐，冬蔭功湯、蒸魚、炒菜$68-RM($136-HKD)，連6%稅項。今次汲取教訓，全部叫small，只係魚無得選擇一定要medium，好大條呢！餐後於大堂，聽住海浪聲上吓網，打吓遊記。夜班職員唔太識英文，幾經打聽，得知聽朝返回笨珍嘅頭班車係0900時，今晚又要早點瞓覺了。
讀萬卷書不如行萬里路之誰是歐亞最南：
之前搵過嘅網站再搵唔番，唯有自己打⋯ 話說歐亞大陸最南稱號之爭奪，由新加坡及馬來西亞兩者之爭。新加坡聖淘沙小島亦自稱為亞洲最南端，被馬來西亞方面不認同。她們覺得新加坡只是一個島，只不過用一條橋來與亞洲大陸嘅馬來西亞相連。況且聖淘沙更是新加坡南部的一個島，更談不上是歐亞大陸最南端喎。
本人都覺馬來西亞方面說得有理據一點。
![]() |
| 為食貓 |
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
