林布拉大道附近*西班牙2016 (Day 2- Barcelona Part 2)

18.01.2016

男人天生搵路就係叻 ! 老公望一下地圖就識路 . 行左幾個街口再入左橫街就黎到大教堂 . 入場每位 7 歐 . 小地勤沒入去 , 要錢的都無咩興趣睇 . 歐洲太多免費教堂了 .

影左幾張相就向住人多既地方進發 .

大教堂 , 拜拜 .

歐洲既屋真係好靚 . 好似好大間咁 .

沿住大街行 , 一睇就知旅遊區 .

行下行 , 就黎左 Placa Catalunya ( 廣場 ) , 依到係林布拉大道起點 , 我地終點係去到海邊 .

 

係外圍行左一圈先入去再睇 .

依個廣場唔算大 , 不過就好多白鴿 , 多到嚇死人 .

我本來只係想近近地同佢地影張相 , 無諗到佢地突然成堆飛過黎 , 真係好恐怖 !

係 大街的中段有間家樂福 , 我地即時買左晚餐 , 怕行到太夜返酒店 , 咩都無得食 , 結果估錯了 . 西班牙餐廳開到好夜 , 普通西餐都唔算貴 . 係西班牙食牛平過食雞 . 牛肉真係食到好重牛味 , 可惜我唔好 . 反而隻雞完全無味 , 雞脾一隻 5 歐 .

好多水果買 , 好平 .

大街上有好多花店 , 擺放得好靚 , 仲有好多種子買 . 不過香港邊有咁大地方比你種花呢 ? 其實我真係好想種檸檬 , 因為實用 .

依間甜品店好靚 , 不過都唔平 .

遠遠就見到地標-哥倫布紀念柱 . 有興趣的話 , 可以比錢上頂睇下海港風景.

近看哥倫布紀念柱 . 巴塞不似歐洲其他地方咁晨早天黑 . 就算冬天黎都唔算太凍 , 天氣的確很不錯 .

 

附近景色唔錯 . 印象中係天書見過依座建築 , 好似係舊既海關辦事處.

夜幕低垂 , 海港景色好靚 . 好多旅客坐係到吹海風同休息 . 我地就行左去商場到睇下 , 無咩野買 . 不過有免費的洗手間 .

 

 

巴塞最令我喜歡的地方就係依個大市集 , 好熱鬧 . 不過星期日係唔開的 . 依個市集好有當地特色 , 不過就不及匈牙利的那個市集大同多野睇 . 但已經係整個行程最令我印象深刻的地方.

 

好多乾果 , 擺得好整齊 , 不過都唔算抵 .

 

水 果亦擺得好靚 , 依個季節士多啤梨又平又新鮮 . 我地買左一盒 , 又大粒又多 . 士多啤梨結實 , 爽同帶點酸 . 日本的就比較甜同多汁 , 雖然係同一樣野 , 但不同地方竟種出不同口感同味道 . 如果你問我喜歡西班牙的還是日本的 , 小地勤會答西班牙 , 因為又平又多 , 好抵食 !

 

見到就覺得牙痛 ! 旅遊區 , 絕對唔平 .

 

如果喜歡食牛 , 西班牙絕對平 ! 係西班牙最抵食就係牛同魚 , 雞就真係唔建議 . 如果去餐廳 , 一定唔好叫雞 , 小地勤係唔好牛同魚 , 但真係食左幾次雞都唔覺好食 .

 

彩色既臘腸 , 外表好吸引 , 價錢亦唔貴 , 但唔太想試 .

 

西班牙火腿 , 食左好多 , 亦試左好多 . 一係一分錢 , 一分貨 , 一食就知貴定平 .

 

真真正正既馬介休 .

 

番紅花是世界上最昂貴的香料 , 係超市買了平價的來試下 . 大市集買的總覺得是貴 , 但可能先係真野同靚野 .

 

歐洲人都愛這樣賣辣椒的嗎 ? 以前係東歐既市集都見到佢地成串咁掛起 , 好似爆竹咁 .

 

買左盒貴價既火腿試食 , 真係好好食 . 4.5 歐一盒得幾片 . 

 

係門口再買左盒 1.5 歐火腿比較下 . 貴野的確唔同 , 特別香口同乾身 ! 食多左都分到貴同平 , 仲識得分黑同白毛豬 , 店員仲話食橡果的豬係 Bellota , 最貴最頂級 . 如果用機器同人手切價錢都有唔同 . 黎一轉西班牙 , 對火腿認識都深左 .