(Day 4) 2015-1-8
住宿：親人屋企
行程：Tanjung Piai —> 笨珍 —> 新山 —> 新加坡
0700起床，刷牙期間港女不停催促，叫我快D出嚟欣賞風景。嘩！原來房間可以瞓住係度睇日出架! 咁嘅價錢真係抵到爛。欣賞完日出後，因為要趕搭返笨珍嘅巴士，所以無食到酒店包埋嘅早餐。
0745到達巴士站等候，酒店職員話0800有車，但等呀等，有少少慌。因為這裡山卡拉，搭巴士來時只得我兩個乘客，真係怕巴士偷懶唔嚟呀！等到0830，架巴士經過車站又駛走咗，問其他路過嘅司機，佢地話架巴士會返轉頭。最後0845先上車... （港女按：早知食埋早餐先啦。）
![]() |
| 喜歡這張帶出寧靜嘅感覺 |
![]() |
| 巴士車票 |
於笨珍落車，跟地標菠蘿合照。看見附近有間餐廳環境唔錯，所以食埋個悠閒早餐先再搭車返新山～ $15.5
結賬時職員估來估去都估唔到我們來自香港，佢話旅客通常大多是新加坡及台灣人。
食完早餐順便於附近行過圈，可能太早嘅關係大部份店舖仍未開門，於一檔華人開嘅生果檔買了當地特產—菠蘿返新加坡，跟堂姐一齊食。我買時再次跟港女說明，我係非洲時已學懂開菠蘿的！價錢唔記得，好似約$10-HKD。另外再買多兩個椰青即飲解解喝，個椰青大過個頭，飲極都仲有，好似都係幾蚊港紙一個。
回新山程巴士座椅可以較到好低，所以好好瞓，可用熟睡來形容呀！到達新山Larkin車站落車，見Larkin係一個大站，便走走看。發現這裡有長途車上吉隆坡同馬來西亞各地，果然是一個長途汽車嘅大站喎！而且仲有車直接回新加坡添，不過我都係想留多一陣新山～
由於馬來西亞主要信奉伊斯蘭教，所以車站商場內大部份賣有關伊斯蘭嘅衣服、書籍等相關用品。最吸引我眼球莫過於一張黑底白字，是阿拉伯文，似足電視上所見伊斯蘭國嘅徽章咁。很想買一張貼落行李喼度，但又怕出入境被當恐怖份子，還是算吧。
喜歡食甜野嘅港女見到間冬甩店即時眼甘甘，又話係利物浦贊助商，於是一試。食冬甩時，打開地圖再看看新山有乜特別景點，決定去以彩色玻璃做外牆嘅印度廟行吓。因為前日係新山搭的士時見到一間好有特色嘅建築物，我一眼便記得多年前係斐濟時見過，可惜當時係跟同業考察團，純粹搭車路過。
![]() |
左：好懷念嘅磅，以前舊式戲院梗有一個呢
右上：Larkin站有車去新加坡不同地點 |
在新山車站坐的士，上車時站頭會登記低邊個司機載客，另外亦有直達新加坡嘅的士。的士司機係一個伯伯，無嫌我地短途，好有禮貌，仲教我地點樣行返JB Sentral。去到印度廟，原來1200已經關門，要到晚上6時才再開放，無緣了⋯ 雖然無緣入內，但難得人影都無，便於門外認真咁影吓相。我於旅途上難得用心去影吓相好難得架~
![]() |
| 聲稱全球第一間玻璃廟 |
![]() |
| 無長鏡，做唔到特寫 |
![]() |
| 話用心去影，就係影呢D，哈哈~ |
印度廟距離早前經常留連嘅離境商場不遠，可惜無行人路直達，便行馬路旁前往，要橫越五條行車線架！其實路程真的很短，約十分鐘便到離境處附近的大商場。由於人有三急先借商場個靚廁所放低幾兩，才繼續行街。
來星馬都未食過"喇沙"，便於早前去過JB City Square 嘅food court，搵到間餐廳食”喇沙"。相信這裡是發源地，點到正宗過香港開粉呱。(港女按：有幾粒獅蚶，就咁食有點腥，落少少檸檬汁就正晒。呢間舖頭嘅奶茶／薏米水亦唔錯，最緊要係好抵食！！)
食飽飽於商場散吓步，發現商場已佈置好農曆年嘅主題，也有好多辦年貨的攤檔，就順便行吓。係一檔試食鳳梨餅、榴槤蛋卷後覺得唔錯，一買便買了5盒，因為買四送一。一盒自己，一盒堂姐，一盒比叔伯拜年，拜年送呢盒手信，比交行貨更有心意呢~（港女按：大部份攤檔都有樣靚身材正的promoter，銀仔目不暇給。）
今次唔搭火車過境，試吓最大眾化，亦最方便嘅巴士~ 過關過程似足皇崗過境咁，離境後搭巴士，保留票尾。於新加坡入境後，再等返該路線嘅巴士就攪掂，終於明白為何無人選擇搭火車過境了。
過關後等950號巴士，可能送車尾，排頭位。與隔離個識講廣東話嘅大媽吹左好耐水，佢一樣話馬來西亞好亂好危險。最後等左好耐好耐，應該差不多半小時先有車。
返屋企擺低行李，即時用wifi上網與新加坡嘅朋友聯絡。這個新加坡朋有係我兩年前於寮國認識的，現在相約於新加坡食個晚飯，都幾有趣噃~
![]() |
| 有投資開嘅人，必定是好句(新加坡地鐵見到) |
![]() |
| 給堂姐的手信 |
一炷香嘅小休時間，便馬不停蹄又出發了。回想今日行程又真係幾緊湊喎，今朝在天涯海角瞓醒，現在已身處新加坡了。於牛車水地鐵站(即唐人街)會合Chu Ming，一見面大家即時回憶返相識嘅經過，很有趣。可惜我嘅國語及英文又退步了⋯
上到路面唐人街，即時被一種濃厚中國農曆年氣息所包圍，大部份攤檔都擺賣賀年物品。小販街盡頭有間印度廟，免費入場，不過影相則要收費。原來呢度都有印度廟，早知係新山時就唔特登搭的士去印度廟啦⋯ 以示尊重，女士們不可太暴露，入口處有圍巾免費供應，上身下身各一塊。港女變成印度婦女入內。我就純粹參觀，而且與朋友聚舊，都無心欣賞了，所以都無俾錢影相。
參觀完印度廟，Chu Ming便帶我們到當地人常去嘅地道市場食晚餐。有當地人帶路推介，食物當然帶水準，而且價錢十分便宜添！價錢牌所見一個去骨海南雞飯都只係二十多港元嘅價錢。出發來新加坡前，所有人都話當物價昂貴，飲食更甚。近來旅途上所見，看來香港物價應該是首屈一指、世界之巔了。
食完後，搵間人氣韓國cafe吹吹水，求其一人叫一杯嘢飲。Chu Ming於兩年前寮國初次相遇，那次是他第一次出國旅行。闊別兩年，他已經踏足二十多個國家了，當然我偶爾上臉書也看到他的post啦。今次交談主要由港女翻譯，有港女係身邊英文國語都有種依賴，外語能力退步⋯（銀仔講英文時，Chu Ming都聽得明，但當佢試講國語時，Chu Ming聽到頭都側埋，哈哈。可憐我放假都要工作模式，因為返到新加坡，同堂家姐男友傾偈，又係要開麗音呢！）
最後於牛車水站搭唔同地鐵線分別，好開心的相聚，仲話我俾了佢好多旅遊上嘅啟發添，期待有緣再會~
![]() |
| 今日行程 |
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
