寫意德菜

未知老闆取Schnee為店名有甚麼意思? 德文Schnee, 是"雪", 而看見Schnee, 使我想起Schneeballen, Schneeballen是雪球, 以為是落雪後玩的雪球? 錯晒! Schneeballen是德國有名甜品, 新年在韓國首爾也見有售,  致於口味是否一樣, 無試過...唔知道... 中文寫"德國餐廳", 餐牌上也有七、八成是德國菜, 但也有兩、三成其他各地的菜式...

開放式的酒水櫃位上, 有一幅長型的貼圖照片, 是從高處望下來的慕尼黑城市景色, 右邊有哥德式尖塔建築的新市政廳, 那個新市政廳...話新...唔算新... 建於1867年... 新過吓啦..., 左邊則是年份更早的慕尼黑地標, 十四世紀建成的"聖母教堂", 驟眼看, 整幅照片, 不算太清晰, 我估...可能係老闆自己拍攝後放大貼上的.

Kostritzer Black Lager $68, 據聞... Kostritzer黑啤, 是德國鐵血宰相"俾斯麥"最愛的啤酒..., 看圖識字, 玻璃杯上寫著: Kostritzer Schwarzbier, Schwarzbier也是德國黑啤的代名詞, 而一講到Schwarzbier, 德國人自然會想起Kostritzer, 因為Kostritzer已經有五百年歷史, 一直都只是釀造Schwarzbier型黑啤, 後來...不知多少年後, 被Bitburger酒廠收購, 所以... 也看到餐廳的酒類餐牌, 也同樣供應其Bitburger啤酒牌子.

Schwarzbier屬傳統典型德國黑啤, 深黑, 飽滿, 烤麥芽香, 輕輕焦糖味, 據聞更會有微微的朱古力味, 但我程度太低, 試唔出... 上檯時, 大約一厘米的焦黃泡沫, 迅速便消失, 最後只淨下一層薄薄的泡. 千企不要被她那種深黑的顏色所嚇阻, 對比起Stout 和 Porter, 其味道更清淡, 還有一種輕盈的甜味, 女士們...必定一飲愛上.

German Bread Basket with cheese dip $68, 三種款式, 兩種深啡色的 Pretzel, 香港人最熟悉的蝴蝶結pretzel 和 一般稱為Pretzel roll, 另加數片所謂的whole wheat. 學過做德國麵包, 都知道pretzel 要加入"哥士的".... 唔使驚, 哥士的... 曾sir教落, 是氫氧化鈉也, 而食用的, 稱為caustic soda, 一聽"soda"... 喲...梳打水啫....而且還要再加水, 成為 lye, 即係碱水囉...., 香港人最喜愛的雲吞麵都有用啦... 嚇鬼咩...., 

Pretzel 麵包已經有幾百年歷史, 烘焗後有一引麥香, 而因為在烘焗前浸過碱水, 口感有韌性, 味道也帶鹹香, 還加了一些Cream Cheese, 味道更豐厚, 但德國人吃麵包時, 不大會加cream cheese的, 而到底cream cheese 是否cheese 也成疑... 

German crispy potato pancakes $158, 德國薯餅, 一般德國人稱為Kartoffelpuffer, 這款也算是德國名菜吧..., 而德國名菜, 通常都出自巴伐利亞, 主要原因當然是因為南部地方都比較富裕, 有錢就自然身痕, 食物款式和味道也特別講究, 但去到巴伐利亞, 餐廳不會用Kartoffelpuffer來稱呼薯餅, 而是用Reiberdatschi.

兩件中等份量的炸薯餅, 四人分, 每人分到半件, 廚師精心炮製了一小碗磨菇碎粒和醬料, 入口...感覺到薯絲狀的質感, 薯蓉中有嚼感的薯絲, 入口感層次更為突出, 師傅有心思.... 

German Sausage Platter $188, 有四、五款德國香腸, 再配以薯仔蓉醬和開胃酸瓜, 眼前是我最憎的一條頗大的法蘭克福腸... 哈哈..., 那款是我最愛??? 當然是Munich Weisswurst, 唔好話係香港, 現在就算去到慕尼黑, 也不易找到餐廳可以食到傳統用小牛肉做的Weisswurst, 小牛肉的顏色偏淡白, 所以做出來的香腸都是白色, 漸漸人們便索性用豬肉代替, 不過..., 其實又真係唔係好食得出太大分別, 是實上兩者的肉質和味道, 確實相差無幾. 我的第二最愛, 就是稱為Kasekrainer的煙熏芝士豬肉腸, 口感比中式臘腸較軟, 味道也較淡, 但咬口煙韌, 送啤酒一流. 還有香港人最愛... 在高檔的All Day Breakfast必用的紐倫堡腸(Nuernberg sausage), 口味特重, 煎香後, 鹹度略升, 加上那種韌度高的包衣, 與酸菜是最佳拍檔.

Roast Pork knuckle with Sauerkraut and potatoes $198, 又是一款出自巴伐利亞的名菜, 原本只是在發跡地"巴伐利亞"的餐廳有售, 但愈來愈有名, 卒之全德國大賣, 後來索性稱為德國豬手, 豬手的德語是Schweinshaxe, Schwein是豬, Haxe是腳, 合併就可以, 學過歐洲語的人都知道, 德語文法好Q麻煩..., 比法語和意大利語更多變化, 但唯一較容易的是德語的發音, 方便過法語...甚至英語, 雖然單字可以好長, 但只要跟住慢慢讀, 無難度, 只是一些“喉嚨R音”比較難發, 老師教我們飲水, 唔好吞, 口向上, 把字讀出... 哈... 攪掂!

如果你把動物看成是人一樣, 前臂是手, 後腿是腳的話, 那...這其實應該稱為德國豬腳才對. 傳統烹調方式, 把豬手放入烤爐, 起碼焗半個鐘, 期間如果太乾, 據聞...會用啤酒淋一淋, 然後再焗, 而我估計... 香港餐廳應該無咁多時間, 但想做到內軟外脆的效果, 仍有方法, 通常預早醃製, 先用細火烚, 可以鎖住豬油, 再放入烤爐高溫快速烤焗, 味道與脆度, 絕對OK!

German Spaetzle Dumplings with Raclette Cheese $128, 又是南德的出品, 最出名的Spaetzle來自黑森林地區, Spaetzle可稱為粗蛋麵, 當地人通常自己揉麵烹調, 口感似刀削麵, 只是形狀不同, 可能更類似河南地方的麵疙瘩, 做法是把形狀不一的麵粉小件, 用牛油炒香, 放洋蔥、煙肉和芝士燴一燴, 味道鹹香惹味, 這店的餐牌上, 寫明是用Raclette cheese, Raclette 是瑞士出品, 軟身易溶, 味道有淡淡的乳香, 比起德國芝士更適合做"溶芝士"菜式.

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================