10 驚喜肉餅*肉餅哥小炒料理

星期日去左荃灣探個朋友
經過呢間肉餅哥
見佢個名好好笑，而且Menu幾特別
問朋友佢話餐廳係新開，佢都未試過
咁就一齊入左去試下喇

餐廳係新開無耐
入面裝修雖然唔算好精緻
但都幾型，而且感覺好整潔



講到明叫肉餅哥
呢到梗係主打食肉餅啦
呢到既肉餅套餐有3個range:
$58、$68同埋$98，價錢都幾經濟
由最基本既蛋黃肉餅到無聽過既黑松露肉餅都有
肉餅仲可以揀煎定蒸
就連飯都有白飯、油飯、菜飯比你揀
加加埋埋我諗可以組到百幾個組合出黎

唔想食肉餅既話，都仲有小菜可以揀

涼拌萵荀 $22
小公主好鍾意食萵荀
久唔夕會叫呀媽整黎食
見到呢到有，又點可以唔叫
但係，原來呢個涼拌汁入面加左wasabi架
建議唔食wasabi既朋友要小心 (即係我T.T)
朋友食到就話覺得都幾有新意
而且萵荀好嫩，爽脆無渣



潮州家鄉肉餅(煎) + 油飯$68
我地叫左2個肉餅Set share
肉餅入面有韭菜、花生、馬蹄、沙葛、冬菇
之前都無食過咁樣既肉餅
韭菜、花生同冬菇令到個肉餅好香
而馬蹄、沙葛就增加左口感，唔錯
仲重要唔會煎得好油，用黎送飯真係岩哂
油飯落左黃姜粉，所以影出黎咁黃
味道就不過不失，應該係用海南雞飯醬黎煮



原隻新鮮龍蝦肉餅(蒸) + 菜飯 $98
咁大個女都未聽過用龍蝦肉黎整肉餅
所以即刻Order黎試下
個菜一上枱果時個個都望住
比$98就可以有隻龍蝦仔，會唔會係伏呢?
其實心入面諗住都係gimmick野多
點知肉餅入面真係有好多龍蝦肉
雖然入面唔係好多料，只係有豬肉，龍蝦肉同馬蹄
但龍蝦肉真係好鮮甜，而馬蹄又爽爽地
所以食落味道同口感都唔會好寡
如果鍾意重口味既朋友都唔怕
佢有自家製甜豉油，用黎撈飯唔錯



你以為個龍蝦係擺係到裝飾?
咁你就錯喇，你睇下個鉗幾多肉
菜飯唔會好油，而且份量勁多

不過當晚最令我驚豔既都唔係個龍蝦肉餅
而係呢碗跟餐例湯
因為真係足料到好似係屋企飲咁
其實如果佢話要收$20我都會肯比錢
正係睇個色都知係煲左一段時間
味道勁濃郁，完全無味精味

最恐怖既係，唔收錢既例湯入面連豬肺都有
出面d餐廳，例湯入面有落肉都已經好好
呢到係連咁難洗既豬肺都有，勁有heart

連一碗例湯都咁花心思
你就知道呢到係有用心去做生意
我唔敢講呢到既肉餅好食到天上有地下無
但跟據佢地既定價、服務同埋食物質素
係絕對值得大家去一試
(朋友話呢到以後應該會成為佢飯堂，哈哈)

============================================

感謝 暴食小公主 提供以上資料

暴食小公主 的網誌: http://www.openrice.com/zh/gourmet/reviews.htm?userid=58662494&city=hongkong

============================================