![甜入心的相片 - 深水埗)]()
帶外地到港友人買玩具, 無理由去玩具反斗城吧.... 識得去, 一定去深水埗! 深水埗福榮街一帶, 介乎南昌街至北河街一段, 全都是玩具和模型店(事先聲明, 不是高級日本貨....), 當中大多數都有兼營批發, 如果買的數量多, 可以講價, 無論你想搵A...B...C...貨... 都不會失望...
![甜入心的相片 - 深水埗)]()
當日, 由中午十二時行到下午三時半... 已經有想死的感覺, 友人還想向太子方向進發, 想買運動服, 繼續尋寶, 但自問... 頂唔順了, 腳軟軟, 眼暗暗, 未至於暈暈地, 但都有些少頭揈揈.... 九成九係血糖下降... 食翻客甜品先可以再行動了... 下午茶時段, 甜品店都照常營業, 少客, 坐得真舒適...
![甜入心的相片 - 深水埗)]()
門口貼了大張宣傳招紙, 樣子吸引, 寫著"自家首創", 真係間間甜品店都有呢四個字個喎.... 友人甲問我知否椰皇子是甚麼? 我:"哦.... 椰皇子...應該係...椰子一種..., 應該係... 除非唔係..."哈哈哈哈.... 於是友人乙立即"專家"鬼上身...: "椰皇"其實係"椰青"既老人版, 椰青是青年, 幼嫩, 未成熟, 顏色多是米白, 通常削成五角形, 是最貴的, 而椰皇則是中年, 外皮已被切走, 剩下硬和圓的中心, 價錢雖然較便宜, 但內裡的汁較甜. 還有老年版本.... 友人乙還想講落去, 但已經被制止... 再唔食嘢落肚, 要暈低了...
![甜入心的相片 - 深水埗)]()
焦糖布甸椰皇子 Caramel Pudding $36. "自家首創"的皇子, 終於上檯了, 有得食, 再不管"友人乙"繼續鬼上身發噏風..., 椰皇雖平, 但功效多, 既滋潤, 又清熱, 解渴之餘, 更益氣生津... 但在中醫角度, 椰皇性質屬"涼", 不宜吃太多, 所以一般都先把椰皇用火燒一燒, 不單可以..以"熱"制"涼", 更使內裡椰汁變甜.
![甜入心的相片 - 深水埗)]()
原隻椰皇, 打開上蓋, 透明凝結了的椰糕上, 放一件小焦糖布甸, 賣相有春夏feel, 淋上了椰漿, 一啖...., 焦糖布甸幼滑, 凝結椰汁如啫喱般的糕狀, 但又不似啫喱的結實, 彈牙中有軟度, 入口後溶化成椰水, 清涼解渴, 還有那爽口的椰肉, 與滑溜的布甸, 層次感豐富... 友人問: "層次感豐富"即係點..?? ... 到底層次感會有幾豐富??.." 我答佢: "頂!! 層次感好...好...好...豐富, 有三個"好" 咁豐富囉..."
![甜入心的相片 - 深水埗)]()
除了各人要了一個焦糖布甸椰皇子外, 再後加一客朱古力窩夫 Chocolate Waffle $39. 店員阿姐話: "因即叫即做, 要等耐一點噃....", 等?? 無問題!! 我地大把時間, 最好等耐D添.... 哈哈... 上檯, 賣相...無失望哦! 即叫即"烘"既窩夫, 與即叫即"筆"既雪糕(呢個係爛gag...我認..), 外脆內軟, 又冷熱交融, 記緊撕少少頂上的薄荷葉碎, 與朱古力雪糕一齊食, 味道... 好特別... 有幾特別??? 就係"薄荷朱古力"...., 夠晒特別吧!?!? 哈哈...
![甜入心的相片 - 深水埗)]()
這店位於三、四線的街道, 租金應該不算高, 所以食物的訂價都偏低, 大部份的價錢, 都是圍繞著廿零三十多元, 三十六元的焦糖布甸加椰皇子, 相信在太子或旺角, 起碼收四十多元, 下次再來試埋那款夠晒騎呢既"雪香飄壺"....
============================================
感謝 oasiswong 提供以上資料
oasiswong 的網誌: http://www.openrice.com/zh/gourmet/reviews.htm?userid=85184&city=hongkong
============================================
