![]()
亞視終於步入歷史，對於這家電視台，我的感覺很奇怪，小時候，當大部分同學在看TVB的時候，我的家人卻堅持要看麗的電視，那時真的萬二分不高興，因此，有點兒討厭這家電視台。
然而，到了九十年代，我卻任職這家電視台，老實說，真的有點土法練鋼的味道，但與此同時，我也感受到這是一家很有人情味的電視台，同事們的關係也十分融洽。自此以後，我便由討厭變成喜歡亞視了，後來即使離職，我還是偶爾撳去亞視看一看。
直到今天，我仍有不少同事在這家公司工作，希望他們盡快找到出路。與此同時，我腦海內也浮現出不少亞視的回憶，就在此跟大家分享一下。或者不久將來，就論到講無記回憶啦，哈哈（再咁落去，不遠矣）。
細路仔，最鍾意就係動畫，所以先由動畫特撮說起。話說七十年代，TVB收視贏晒，但在卡通動畫方面，麗的反而是佔優的一方，經典作品太多，直到亞視年代，仍有不少出色作品。松本零士、安達充、高橋留美子大部分作品，都是在亞視播出的。而且不少作品都是少少鹹多多趣，大概亞視沒有大台的顧慮和包袱吧。
1. 荔園小天地--好像是星期日早上播出的，是最早期的兒童節目，我家姐曾上過去做現場觀眾，她的同學也表演過牧童笛，一切彷如昨天。
![]()
2. 醒目仔時間--同430穿梭機有得撼的兒童節目，那時我應該是捧430的，但偶爾也會看看，仲保留咗當年買嘅一餅錄音帶添！醒目仔用小女孩甜甜做主持，加上毛毛可愛造型，其實好過430搵班藝員成日對住鏡頭扮揸穿梭機（仲要懶緊張，扮撞殞石，真係Low Tech到呢）。
![]()
3. 鐵甲萬能俠--機械人動畫的經典，機動戰士之前，幾乎所有機械人動畫都受其影響，最記得當然是「出嚟啦，萬能俠，落去啦，朋友號」這句洗腦式對白，還有愛美神飛彈，形神俱備的譯名「杜劍龍」更是神來之筆（原名兜甲兒），當然還有經典奸角修羅男爵。
4. 三一萬能俠--三一萬能俠的合體雖然誇張，但卻令人興奮不已，大台的宇宙大帝差咗十班，記得有同學識摺三一萬能俠，真係做到三種不同合體，可惜不肯教我，鳴鳴鳴……
5. 沙漠神童--沙漠神童的幾個僕人又係好經典，我仲記得係羅修蘭、布洛斯同百勝龍，連馬榮成都承認中華英雄之中，華英雄兩個僕人生奴鬼僕係學自沙漠神童。
6. 太寶郎--那個機械人是美式足球造型，型到核爆，不知何解，其貼紙極罕有，某次找到便興奮不已……
7. 電光再造人--卡辛的故事有點悲涼，但那個未來世界真的超有味道，突破咗我以前睇嘅動畫風格，隻百變狗更是令小孩子的我睇得好興奮。
8. 神勇飛鷹俠--超人戰隊的經典，那首的主題曲，我到今天仍然識背頭幾句！後來仲播埋美片，好似叫星球大戰，前頭無端端加咗段片，同套劇完全唔夾，無厘頭到爆。
9. 宇宙飛龍--跟一般單打獨鬥的機械人片不同，那個龍頭變成機械人個身，也是頗破格的，那時真的好想擁有那超合金呢。
![]()
10. 幪面超人--經典，經典到鄭錦昌都唱：幪面超人，聲威震九天……幪面超人的風雷電加電單車自然令人難忘，我當然有學過那變身姿勢，如果不是某細佬學人風雷電跌落街，或者可以睇到5號之後的幪面超人，至於停播N年再播的幪面超人Black及RX，唔……千呼萬喚再來，也讓我興奮了一段日子。
11. 電腦奇怪--喜歡那種略帶悲涼的意味，主角那輛雙座位電單車已經好正，得閒又彈下結他，跟手聽到乜鬼博士吹笛又頭痛又剩，然後又無厘頭無事（通常都係被對手埋在泥中，所以聽唔到笛聲），後尾仲亦正亦邪嘅對手電腦黑魔，我鍾意佢仲多過幪面超人，但好似無結尾，令我好唔開心！
12. 天地雙龍--是我的至愛的特撮，天地雙龍不會變番做人已經破格，個人可以變車同變飛機又係好有心思，我經常跟家父扮天地雙龍架。
13. 宇宙刑事--宇宙刑事播出時，已經開始少睇特撮，不過話卡邦變成只需0.0幾秒，然後慢鏡重播變身過程，還是笑死人！
14. 鄉下仔出城--主角經常着襠布周圍走，間唔時仲會甩Q埋，其實唔係幾啱細路仔，係麗的呢啲台先敢播。
15. 蜜蜂王子--好悲情的卡通，細個時好少接觸呢啲咁Sad嘅卡通，其實都幾大衝擊。
16. 七小福--講好唔好睇就一般啦，反而首主題曲到依家都仲記得，係林嘉華唱嘅。
17. 仙女下凡--我家姐好鍾意（作為男仔，梗係麻麻啦），仲買咗好多佢嘅貼紙添。
![]()
18. 星仔走天涯--頂！又話立體卡通，我用個立體眼鏡點睇都唔多覺立體囉，個古仔好鬼「名作劇場Feel」，中段大風雪冚家鏟一段好震撼，最好笑係，主題曲不斷話「我要我要找我爸爸」，但套劇嘅主角係搵媽媽喎！
19. 機靈小和尚--唔算好鍾意睇，間唔中睇下咁啦，當然首主題曲就真係記到依家。
20. 太空奇艦、銀河鐵道999、太空俠盜顯神威--除了千年女王之外，松本零士的三部大作都是在麗的/亞視播出的，三齣作品都不是小孩子看得懂的，好有哲學味道（後尾漫周論壇仲拉到去軍國主義添，好誇囉），999印象較深，不斷找尋機械身體也發人深省，不過最期待的都是美達露沖涼啦，哈哈！
21. 小露寶、大眼睛--我發誓，我真係無對小賓女起痰！小露寶除咗主題曲經典之外，雖然好公式，但最後又真係好期待睇佢攞幾多分，同埋期待佢點樣畀人罰，係咪好變態呢！大眼睛個造型都幾得意，我最記得係主題曲：活潑好動百厭本性，更添好本領，大隻眼核夠晒古怪，係我大眼睛……應該好無聊嘅人先會記埋啲咁嘅嘢。
21. 超時空要塞、超時空世紀、機甲創世記--超時空三部曲喺晒亞視播，可以話係一時佳話，超時空要塞固然最經典，但我最記得嘅係超時空世紀嘅主題曲，應該係楊仲恩唱：戰事沒法躲，宇宙要起干戈。
22. 神奇小子--藤子不二雄的名作，那時已讀中學，做功課辛苦時會間唔中睇下輕鬆下。
23. 筋肉人--當然記得「牛肉麵，頂瓜瓜，味道確唔同，營養又唔差，我足足食咗三百年，食得興起用手拿」，後來同事話其實係牛肉飯嚟！簡直係晴天霹靂。
24. TOUCH--又係好鍾意，我最記得大結局之時，我係喺大學嘅Common Room同成班唔識嘅同學一齊睇，你話呢套動畫有幾轟動呢！
25. 橙路--今次我認，真係睇女嘅啫，故事真係無乜印象。
26. 蠟筆小新--好好笑，夠玩嘢，大台一定唔敢播，將嗰度譯做何B仔，又真係好搞嘢！
![]()
27. 我係山T女福星、亂馬1/2--除了相聚一刻之外，高橋留美子兩部名作都係亞視首播，我係山T個譯名好離譜，明顯受當年電影山T老夫子影響（而山T則係玩緊ET），主角作為諸事當都好衰（原名諸星當），故事其實不甚了了，最期待反而係片頭同片尾曲，而且經常換，首首都好聽（有無人知有幾多個版本呢？），我仲癲到仲錄音機錄低添！反而亂馬就漫畫同動畫都一般。
![]()
![]()
28. 男兒當入樽--其實動漫版有啲拖，而且播到縣大賽就無，有啲無癮！不過片頭曲同片尾曲又係超令人懷念，早前去鎌倉，終於搵到片頭的平交道，真係好感動！
29. 新世紀福音戰士--其實無乜點睇，但都算係超時空之後最經典的機械人動畫，點都要提一提。
30. 頭文字D--由於唔識揸車，對賽車又無興趣，加上公仔核突，又係無乜意欲睇。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
