今日終於有機會嚟一試 Little Twins Star 流沙飽
但係比我想像中........難食同服務差！(只限尖沙咀分店, 因為未試過中環店)
今日去完天文台開放日，諗住順路終於可以嚟試一試Little Twins Star Cafe(通常人哋都係咁叫)
其實佢真正店名叫點心代表Dim Sum Icon, 除咗Little Twins Star，仲有幾款蛋黃哥點心同埋嚟緊最新嘅醜比頭特色飲品推出
哥哥拖住呀妹一路唱歌一路向The One出發
嚟到門口咁啱見到有布甸狗即刻兩個走埋去同佢影張相
論盡嘅哥哥一跑去就捱住嚟影相，佢都唔記得咗今日毛毛雨，一趴落去就成個衫袖濕哂！
我當然就好......激氣啦！呢D事每日都會遇見
上到嚟L3, 但係實際都唔知上咗幾多層！總之一開始就搭Lift！
因為今日落雨濕濕，所以露天座位閂咗！玻璃上都貼滿咗醜比頭嘅貼紙
我拎咗張飛等位...兩個嘢就喺度不停拍櫈嘈死人
呢日我哋兩點幾先嚟到，所以只係等咗幾分鐘，好快就到我哋
但係點知佢安排咗張超高枱俾我哋，我行到埋去先知，佢見到芊芊咁細粒就唔應該俾張咁高嘅枱我哋坐啦！
後尾先知因為高枱剛好有3個入坐，仲有3個吉位就放埋我哋入去坐滿佢，明明有四人枱就留番俾D排喺我哋後面有4人嘅朋友
我坐到埋去又唔想煩，就唯有自己小心D坐喺芊芊隔離，哥哥就要靠自己喇！
同大家見到嘅一樣，裡面嘅餐紙茶壺等等都印有Little Twins Star樣！
但係唔知點解人哋隻杯都印有Little Twins Star，但係我哋三個隻杯都冇囉，就咁白色咩都冇
今日我就冇叫蛋黃哥點心，如果 Little Twins Star 點心，我就叫咗蝦餃腸粉同埋流沙飽
哥哥又叫住好想食鳳爪排骨飯，當然佢唔會明白嚟呢度叫呢個飯係好傻啦！
仲有個玫瑰普洱，我以為叫茶係唔駛錢，原來同茶樓一樣仲要每個收$10
仲要收埋加一....總數$255都幾貴！不過心裡面諗如果D嘢好食就算數啦
好啦，等咗5-10分鐘嚟第一籠流沙飽啦！放低嗰吓即刻心裡講「大佬！有冇得換過籠呀？」
因為Twins Star 男仔個頭Bunk咗一忽！大家嚟得呢度都係為咗影相呃Like啫...依家連幅相都影得唔靚
之於味道就同一般流沙飽一樣就預咗㗎喇，最緊要佢哋兩個食唔停話好好食咁就算！
好喇，俾多次機會佢...今次嚟碟腸粉，真係「頂」.....一聲！個職員拎住碟嘢有少少半飛過嚟空降喺我面前，碟裡面嘅鼓油飛哂過隔離幾條腸粉度
做得主題餐廳，係咪應該個賣相係最緊要㗎呢？好唔好食我唔想再講....已經火滾
最後到籠蝦餃！算係最安全嘅一樣，不過味道鹹到飛起....
最後鳳爪排骨飯嚟到，個哥哥就居然同我講話好飽...
咁成籠飯我自己一個點食得哂呀！完
Photo by CANON 5D Mark III, Len | EF 24-70mm f/2.8L USM
呀劍評分: 5分
5
【親子餐廳】尖沙咀 Dim Sum Icon 点心代表 ＠The One
点心代表 (尖沙咀店)
Italian Tomato Café (馬鞍山店)
南坊
富臨皇宮 (黃大仙店)
小皇府 (MOKO新世紀廣場)
名館 Ming Bistro (希慎廣場)
G-fit
海逸皇宮大酒樓