係！近年亞視不斷播外購劇，可惜真真正正好睇又經典嘅其實無乜，反而由60年代至90年代，就真係超多名作啦！雖然亞視啲配音真係麻麻，有時啲譯名又唔知點咁，但都成為我們成長的記憶了。
1. 星空奇遇記（60年代）--科幻片的經典之作，我當年太細個啦，都無乜印象，剩係記得冼撲同佢隻耳仔，佢個手勢都係後嚟睇記得香蕉成熟時先記番起。
2. 蝙蝠俠（60年代）--最記得蝙蝠俠件緊身衫，永遠都係兩集，第一集結尾蝙蝠俠同羅賓例牌遇到大危機，但第二集一開頭又輕易化解咗，好兒戲，但四大奸角--小丑、企鵝、謎妖妬貓女又真係好經典，直到今日我都剩係記得呢四個奸角。
2. 斬虎屠龍劍（70年代）--搞到我一直以為「帶子雄狼」係咁寫，套劇又真係好有型，好有蒼涼味道，啲打鬥快狠準，將同期港產武俠劇比下去，勁到後嚟王三日嘅洪熙官都抄佢。
3. 錦繡前程（70年代）--不是前程錦繡，我記得臨尾個男主角會喺河邊之類大嗌，努力、奮鬥、努力、奮鬥，勵志到呢……
4. 神秘之夜（70年代）--好似有三個警探的獨立故事，最好睇就當然係哥倫布探長啦，我識呢個哥倫布好似仲先過發現新大陸嗰個。
5. 變形俠醫（70年代）--細個都好鍾意睇，成日等睇佢發嬲變形，不過一直唔明，佢爆咗衫之後變番正常人點辦。
6. 通天奇兵（1984年）--幾位主角各有群戲，最出名當然係T先生啦，不過亞視啲人物譯名就不敢恭維。
![]()
7. 東京愛的故事（1993年）--鈴‧木‧保‧奈‧美……啊啊啊！仲使乜多講！！！當然還有超正的主題曲。
8. 包青天（1994年）--其實幾老土，但又收得下喎！證明橋唔怕舊，拍得好故事講得好一樣大把人睇。
9. 101次求婚（1994年）--個女主角成日喊真係好鬼煩！不過又幾感動人嘅。
10. 三國演義（1995年）--係呀！成個三國歷史，我就係睇呢套劇先知多少少咋！當然葉振棠嘅主題曲都好正。
11. 沒有家的女孩（1995年）--老人精安達佑實一出，誰與爭峰，夠晒煽情。
12. 縮水情人（1995年）--即係南君之戀人，有一代妖男武田真治同高橋由美子，不少年輕人的至愛。
13. 等你說愛我（1996年）--即係星之金貨，有酒井法子加竹野內豐，仲使乜多講？
14. 還珠格格（1999年）--其實趙薇大眼樣真係好鬼娘，我亦唔覺林心如靚，不過都叫做經典。
15. 雍正王朝（1999年）--歷史劇之經典作，即時對雍正改觀，以後講親清初，一定有八王爺份。
16. GTO（2000年）--反町扮鬼塚雖然唔及新版咁似原著，但係勝在型，猥鎖得嚟都咁型，服未！翻睇名單，啲學生都好勁，有窪塚洋介，仲有小栗旬！
17. 康熙帝國（2001年）--同樣改編自二月河作品，陳道明又真係做得幾好，不過一直唔明，點解無拍（定無播）乾隆？
18. 庶務二課（2001年）--唔使多講，剩係睇江角真紀子條長腿就夠啦，哈哈！
19. 美麗人生（2001年）--木村喎！常盤貴子喎！編劇係長假嘅北川悅吏子喎！唔明當年亞視點解會搶贏無記！
![]()
20. 大和撫子（2001年）--菜菜子扮拜金女固然形神俱備，亦係憑此劇先識得堤真一，首主題曲亦好好聽。
21. 藍色生死戀II（2002年）--見到崔智友個成日可憐樣就想摑佢兩把，亦唔覺裴勇俊有幾靚仔，又絕症又亂倫（好似係），真係要幾老土有幾老土！不過套劇咁多人睇，一定有佢嘅理由……啩。
22. 我係金三珣（2006年）--韓劇嚟講，呢套真係幾好睇，亦係以後大部分韓劇嘅經典方程式，一個惡死兼烏歪女仔，竟然得到又靚仔又有錢嘅男主角青睞，大家繼續發夢啦！
23. 葡萄園裏那男人（2007年）--三個字！尹恩惠
24. 正印出頭天（2010年）--呢套長達百集嘅劇，都唔知點解可以拖咁耐，嗰時無無聊聊，又差唔多睇晒喎！到依家我睇電視見到個男主角（有做愛上Pinocchio），我都只係記得佢叫沈佑燦。
25. 篤姬（2010年）--成個幕末歷史，我就係靠睇呢套劇學番嚟，仲係睇完一集再睇番正史，無聊到呢！
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
