下呂溫泉。體驗日本三大名泉 Day3-4

第三天（續）

由白川鄉黎到高山，好快就要再坐車向下呂出發；原本係冇諗過去下呂，不過book酒店時先發現今晚高山酒店超full，係 full到大部份酒店都冇晒房，就算有房既一係好遠一係好貴，應該太多人黎睇點燈迫滿高山，最後四圍睇下邊道有得住就睇到去下呂，都好彩搵到個平平地既地 方住，而且可以乘機試下日本三大名泉之一既「下呂溫泉」，總算冇白費去到咁遠


係高山落左巴士，見對面有間FamilyMart即刻衝入去買野食先，要知道今日係冇正式食過午餐，要快手入去揀野食，如果買唔到都唔知一陣下呂有冇得買


係便利店揀到心頭好，要趕返去對面火車站；搭火車千其唔好遲到，要好耐先有一班車，呢程車張psaa都係包左唔洗比錢，show pass比車站職員睇就入得去


入閘等車，一陣會坐「特急ひだ20號」，即係「Wide View飛驒」 列車




對面有部普通車停站；今次坐既呢條「高山本線」係單線鐵路，火車班次好少，只有一條路軌如果我地部車未到既話佢係唔走得


車到啦！突然見到左右都有車一齊到，原來係呢個站係會將兩列火車合拼，再一齊開去名古屋




火車好舒服，乘客唔多；呢部車唔係電氣化火車，而係柴油火車，坐佢既感覺唔似係坐緊火車，似坐巴士多啲，無論係聲音同加減速都好似巴士，感覺好特別




本來都唔想食佢住，上到車見後面有人食麥當勞，前面又有人食緊野，我都開左佢食先；日本便利店既野出名好食，呢盒烏冬都好好食，而且便利店服務好好，買野食唔洗自己叮架，職員會幫大家叮完再裝好，佢地好熟手好快就叮好


經過41分鐘車程，第一個站就去到下呂


呢個站好靜，全部車就只係得我地兩個落車，呢一刻仲以為自己落錯車，下呂咁出名點會冇人黎架？琴日先同朋友傾完日本鬼故如月車站故事，一出黎即刻又諗起呢個鬼故，好彩呢道仲有車站職員企係月台等我




出到黎就向溫泉街方向行，出面都係好靜




「下呂溫泉」同「草津溫泉」﹑「有馬溫泉」並列為日本三大著名溫泉，可想而知名氣有幾大；下呂溫泉由公元10世紀開始已經係著名溫泉治療勝地，成個下呂有好多溫泉酒店，條條街都係




街邊有個「手湯」bor，浸對手落去即刻暖晒


行多幾步又見到有手湯，周街都有溫泉水


過埋橋就到今晚住既地方，酒店係正河邊


今既住係「小川屋酒店」，佢應該算係一間比較大既酒店，當初book呢道係因為一個字...「平」！




地下大堂好大丫！差唔多八點先黎到酒店，晚餐時間都過晒，所以我冇book到野食，只係book住宿就夠




上面幾靚bor


今晚住係呢間房，都唔錯丫又夠大，HKD$770唔知算唔算平呢？不過呢間房有一個未必個個都接受既地方，房入面有廁所但就冇浴室，想沖涼就要去溫泉個道沖啦，對我黎講完全冇問題，我鐘意係溫泉沖涼多個係浴室，溫泉感覺大好多亦都舒服好多


放低行李就出去行下，街上好多人著住酒店提供既浴衣，唔怕凍既咩？下呂除左多手湯之外都有好多比人浸腳既免費足湯，呢個係其中一個




下呂除左有大河，仲有細河






呢間就係小川屋，外面睇冇咩特別，左下角著燈個道係浸溫泉地方，係正河邊景觀都算開揚，不過會有野遮左好多唔比出面望入溫泉，哈哈




呢個時間仲有開門既只係見到一間機鋪同便利店，今晚宵夜有著落


係酒店房沖茶慢慢嘆


我同朋友都未係日本食過章魚燒，見到即刻買先，不過呢個叮完之後個樣都唔靚，而且都係唔好食...




屋企附近有間CoCo壱番屋，日本都見過佢分店，但一路都未有機會食，竟然係便利店都見到有就即刻買左；呢個咖哩好好食，而且記得仲好平，好抵食！




食完野休息一陣就去浸溫泉啦，今次係我第一次浸溫泉
入 去個時有啲驚，因為太夜人影都唔多個，入面好大又好驚入錯地方，好彩之後都有一個人入到黎；室內溫泉池算係好大，大到游水都得，咁岩室外池維修緊出唔到 去...室外池就係咁既樣，第二日會入去浸，啲相比現場睇更靚，哈哈（啲相係酒店網下載，我唔敢拎相機入溫泉影相...）




浸完溫泉成個人舒服晒，今日咩住個大背囊咩足一日膊頭有啲攰，浸個溫泉就岩晒；我都係浸過溫泉先知溫泉係咁正，當年係河口湖都住過溫泉旅館但冇浸到，蝕大本啦！今次旅程有好多機會比我浸返夠本，哈哈



第四天

朝早訓醒又再浸多次溫泉，今日兩個溫泉對掉左，可以試到另一個溫泉，仲可以試到戶外溫泉！行去戶外溫泉條路好凍，不過浸落去好舒服，會浸到唔想走；溫泉唔可以浸太耐，浸一陣就要走啦，byebye


朝早出去散步，見到足湯又去浸下（好醒目拎定毛巾出黎）






四圍睇下風景






係道睇睇下風景既時候，我見到間中有少少好似灰既野飄過，我就同朋友講係落雪，不過咁岩旁邊有個地盤佢就話似係灰，我都唔係好肯定...


返酒店拎返行李check out




小小既溫泉神社


行到河邊開始見到有多啲「灰」飄過，而家可以肯定係雪啦！不過啲雪太少同太細，影唔到出黎


河邊有一個露天溫泉，係免費個個都可以浸架，佢特別之處係係正河邊，可以一路浸溫泉一路睇風景，不過呢佢風景實在太開揚而且係正橋邊，係道浸就會比路人見到你光脫脫既身影，唔知有冇人敢體驗呢？




行到返下呂站，今日熱鬧左好多






今次坐10:14既特急列車返高山，有pass繼續唔洗買飛，不過可以係售票處換指定席車飛，換左就算幾多人都唔怕冇位坐








同下呂講再見


火車由名古屋開黎，車上已經差唔多坐滿人，好彩換左指定席咋，如果冇位就要企成個鐘




又到早餐時間，今次食呢個牛肉飯團，算足料有好多牛肉




火車一路向高山前進，開始見到有積雪，心情特別開心，因為今次旅行係為雪而黎架




火車準時黎到高山站


十五個鐘都唔夠既快閃下呂溫泉之旅完成，今次機緣巧合之下去到下呂溫泉，浸左我人生第一次溫泉，更可以體驗列日本三大名泉，從此之後我同朋友都愛上左溫泉啦！今晚又有得浸，Yeah！