Olive Cafe：飽欖美味

沙田打上嘅新界區甚少有小弟搵食嘅足跡，因為過嗰邊真喺好長途跋涉，偶爾都只喺約番啲新界友聚聚先至入嚟，所以，趁今日入新界區掃墓，就約番以前工作嘅師姐聚一聚食個晏，大談軼事，細說當年。



第一次嚟「橄欖咖啡室」（Olive Café），印象好似荃灣都有店，但格局好似又唔同，原來都喺同一集團。入到店內，就如外面睇到，地方闊落一室純白襯木系，加上今日外面天氣好，陽光充沛，掃走悶氣，讓人更覺爽朗。




套餐點都喺抵食嘅定律，不過，晌度喺搵唔到午餐，皆因周六、日、公眾假期由10:00am-3:30pm提供早午餐，供應時間比一般嘅早午餐長，套餐包餐湯或沙律，主菜連是日特飲，都喺$80-$108，定價唔貴。晌咁好嘅環境食餐晏仔，打吓書釘，又或同三五知己吹吓水，感覺挺寫意。如想餐後食啲甜品，可以再加$25選配，不過，之後再對比個甜品餐牌，其實唔喺優惠好多。

餐湯或沙律之選，因為見只喺一般田園沙律，雖然可以加錢配煙三文魚或香辣燒雞，但同師姐都喺揀是日餐湯，因為喺甘筍忌廉湯，平常都較少飲。



甘筍忌廉湯 睇賣相已覺得幾對辦，色澤橙黃，仲以忌廉畫花，花多少少心思令感覺都唔同啲。湯嘅質感唔錯，好順滑，甘筍味未算超濃，但入口清甜。

主菜共有10款選擇，形形式式都有，相信迎合到絕大部入嘅口味。小弟揀咗客羊，因為見佢配牛角包，感覺挺特別，師姐就簡單啲要客黑松露炒蛋。



焗中東羊肉牛角包 $85 羊肉配牛角包真喺好少有，所以，專登要試一試佢，咪睇佢只喺一客牛角包，賣相、用料都做番足，以木板盛載，配上油醋沙律菜及脆薯角，感覺好不一樣。而牛角包面放上炸薯仔絲，包內夾滿羊肉、洋蔥粒、茄子粒，仲有唔少芝士絲，口感豐富，羊肉帶有獨特羶香，喜歡羊肉嘅朋友真喺咪錯過，個牛角包亦做得酥香脆身，只喺嫌兩側收尾有啲怪，比較硬淨。







黑松露煙三文魚炒蛋 $88 講賣相，個煙三文魚炒蛋做得仲靚，同樣以油醋沙律菜及脆薯角伴碟，不過，厚多士配黑松露炒蛋，煙三文魚捲成玫瑰花形，3樣嘢堆成一個小塔，望落好有睇頭。個炒蛋頗為嫩滑，食落原來唔止加入黑松露醬，仲有洋蔥及煙三文魚碎，一啖過連埋多士放入口，非常好食。







套餐提供5款甜品加配選擇，如果唔啱食都唔緊要，其實，佢哋有另一個甜品餐牌，裡面有仲多款式。

甜品餐牌內一共有十多款選擇，如唔同味道嘅芝士餅、窩夫、蘋果金寶、法式燉蛋、木糠布甸、德國黑森林、芭菲、Movenpick雪糕……等等，大概都喺$30、$40一客。本來，我哋都想一嚐佢哋個德國黑森林朱古力蛋糕，睇吓正唔正宗，可惜是日午市未有供應，所以，揀咗木糠布甸及意大利芝士餅。



木糠布甸 $28 跟套餐加配需額外俾$25，所以，都只喺優惠咗$3。不過，木糠布甸聽落好似普普通通，但晌度又真喺無求其迤做，睇佢一層層，唔喺只得煉奶忌廉、瑪莉餅碎咁單調，仲有奧利奧朱古力餅碎、少少金寶碎，再插一片意式脆餅，外觀顯得精緻好多。放入口就梗喺一匙過由面插到底滔出嚟食，咁先可以食出味道上有重變化！





意大利芝士餅 $38 而小弟所揀嘅意大利芝士餅賣相好特別，未見過可以將啲馬卡風芝士捲住手指餅，真喺做得好有心思，更難得喺啲芝士做得好柔滑，充滿唂咕味，中間嘅手指餅浸透咖啡酒，濕潤濃香；上面塊朱古力薄片唔單止好脆口，成件事就令外觀變得更立體。

因為套餐所謂是日特飲只喺花茶，再者，嘆甜品又點可以唔襯杯咖啡！惠顧任何套餐，額外加多$10就可以轉任何特色咖啡，實在喺個好大誘因。如果你唔多喜歡咖啡，仲有好多選擇，可以+$18轉特飲、沙冰、奶昔、果汁……等，又或+$28轉花果茶（壺上）。





泡沫咖啡 +$10 雖然杯泡沫咖啡都拉埋花，不過，個人覺得有少少唔對辦，因為泡沫嘅厚度比較薄，似杯鮮奶咖啡多啲。幸而，師姐話飲落都唔錯，咖啡嘅味道頗醇香。



鮮奶咖啡 +$10 小弟就較喜歡鮮奶咖啡，唔喺因為有拉花，而喺2/3喺奶，1/3喺奶泡，口感順滑得嚟唔會感覺太輕飄飄咁。眼前杯鮮奶咖啡，入口柔順均勻，沖調嘅手勢不俗，店家標明採用意大利品牌LavAzza嘅咖啡豆，質素始終有一定保証。

今餐，各項食物都做得有水準，而且，賣相上都落足心機，彷彿飽覽到當中嘅美味。講吓講吓師姐原來遲啲會去日本廣島自由行，不過，事前準備上預到唔少阻滯，變咗要佢擔大旗負責安排個行程，希望佢個個困難都迎刃而解，有個愉快嘅廣島之旅，飽覽美景。
個人評分
味道：8/10
環境：8/10
服務：8/10
抵食：8/10
平均每人消費：HK$140
餐廳資料： Olive Cafe
大埔安邦路9號大埔超級城A區地下012A舖
2667 2788

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================