(Day 4) 2016-3-4
住宿：Pop hotel
行程：泗水 —>日惹
0545起床，收拾行李食過匆忙早餐後，急急腳前往火車站。早餐食左D粥，夠飽肚。（港女按：喺印尼差不多朝朝都花生、油炸鬼送白粥，好懷舊呀！）酒店都算係咁，咁早都有早餐食，可能住得這裡部份客人都係搭早上嘅長途火車。
![]() |
上：房間景觀
下：早餐 |
去到火車站櫃台先用尋晚張收據，去售票處換取車票就可進入月台。例牌菜先去影張「車頭相」，便找到自己尋晚選擇好的車廂及位置。果然是最貴價嘅車票，這車廂極度舒適，座位十分寬敞，椅子可以挨到好後，真的可以用享受鐵道遊來形容呀～ 貴巴士一倍價錢，即只係港紙幾十蚊，絕對物有所值！（無比較過前面平價車廂）
0700準時開車，據車上廣播得知，這車程總共12小時。原來我地目的地日惹只是中途站，網上得知需時約5小時。
可能車票較貴，這車廂只得小貓三四隻坐。坐位舒適寬敞，整程車同港女可以用熟睡來形容呀！（港女按：有時醒咗見到農民耕田，車站附近民居有小朋友向經過嘅火車揮手，感覺好特別。）
日惹 Yogyakarta
五小時後到達日惹，車站也較大，用火車站嘅free wifi上 google map搵下酒店先（其實Google map D住宿唔齊），也save低Google map離線地圖。這功能好正，離線情況下也能睇到資訊及定位。
見時間咁早，便行之前睇google map有較多住宿嘅一條街沿路行，沿路搵住宿。日惹火車站附近比泗水有多好多住宿，行了幾間比較後，入住於印尼有好多連鎖店嘅pop酒店。pop跟ibis budget 價錢差不多，但服務一流、房間亦舒服很多。
@1300
![]() |
| 日惹火車站 |
![]() |
| 右上:Pop酒店主題顏色跟我隻錶好襯呀! |
安頓好去reception問吓前往婆羅浮屠嘅資訊，佢話只得的士前往jumbor巴士站$50000，之後要再轉巴士前往，全程要搭兩小時交通公具。心裡盤算難得咁好天，其實都只係陰天，一定要即時前往！突然想起剛才路過有個租車廣告牌，一於去問一下先~
私家車只係跟團，電單車就有得用$80000租一日，計一計都只係$50-HKD咋！抵到爛，即deal! 當然租車時港女眼啤啤????住我啦，嘩哈哈⋯ 自上次老撾無牌駕駛炒車後，現在唔識死又再無牌駕駛，今次仲要載人添！又係果句，好彩港女肯陪我癲啫~ （港女按：雖然我唔識揸車，但我覺得坐佢車尾可能仲驚過自己揸。唔知哪來嘅勇氣同信心。。。）
辦完租車手續，只係填一張簡單表格、俾錢、俾護照佢KEEP就搞掂，車牌都唔使睇，老闆簡介咗架車嘅性能，同埋俾咗張行車證我傍身，以備警察查看。跟住過隔離華僑開嘅午餐，炒飯好好食，偷吓師先~ 原來炒飯係落蛋先架，我成日最後先落蛋，唔怪得之炒到濕笠笠啦⋯
食飽後全速前進！成兩年無揸電單車，又載住港女，起初不時要停埋一邊熟習吓。（一起步就左搖右擺，唔知租車老闆有無後悔。）揸到去主要大街，嘩！今次係大城市揸兩個轆真係好大考驗呀，你知落後國度嘅路面狀況幾咁立立亂嘛，路上基本上同一時間一定有幾十架電單車左穿右插，好驚炒車呀！加上有大車一同行駛⋯ 總之一個字就係「亂」啦！
基本一條大馬路向北行，有猶豫就停埋一邊看用google map嘅離線服務來定位。駕駛技術開始越揸越好，但都不能亂嚟，以自己嘅一篤史為鑒呀！
到達城市邊緣，即前往婆羅浮屠嘅巴士站附近，都用左超過半小時呀，的士即係會好貴啦⋯ 一程的士應該已貴過我租24小時嘅電單車了~ 這裡路旁看見椰青檔，一個個巨型椰青擺放門前。自己都揸左咁耐車，加上天氣炎熱，不禁雙眼發光有如天降甘露要停下來享受一番。（港女按：當地人食椰青要加冰同黃糖，其實本身已夠甜，所以剩係加冰消消暑。同枱仲有人同我地傾偈，教我地點去婆羅浮屠。）
飲完超巨大椰青後繼續前進，無耐沿指示牌指示轉入支路，向西面進發，此處會發現有大大過Borobudur嘅牌坊。
揸多20分鐘路程，到達婆羅浮屠，電單車要泊係斜對面嘅舖仔，價錢忘記了，好似約港幣幾蚊。看看隻錶1530，仲有成兩小時遊覽，應該夠吧。
入場費每人$28萬($165-HKD)，張入場卡好靚。入場前飲品任飲，我們爭取時間，取了兩支水便入場。入場卡會於接待處收回，好在剛才有影相啫～
穿過一個大花園，便看都婆羅浮屠嘅主建築群，但天色陰暗，加上我技術唔夠火喉，總是覺得好難影得靚。逐層遊覽，浮雕太多花多眼亂，唯有用上特寫手法拍照吧。遊覽期間，聽見當地導遊正為遊客介紹時講，佢雖然是伊斯蘭教徒，但好鍾意婆羅浮屠，亦都好有興趣去研究其文化。聽到咁講，我即時好欣慰，也對印尼人有少少改觀。試問除了係印尼這裡，其他國家或地方，幾乎無可能對唔係自己信奉嘅宗教講D咁嘅野。我有朋友是某教徒，基本上是不會入內參觀寺廟，就算同佢行書展，只要果行有幾檔佛教攤檔都唔行呢條巷。試問好似廣告咁，能做到宗教共融，和尚跟神父撐起雨傘係幾咁難呢？
底部幾層主要有浮雕及佛像，接近頂層有一個個圓形嘅塔。看到其中一個圓塔損壞、佛像外露，才發現每個圓形塔裡都隱藏著一個佛像架～
![]() |
| 古代都有老麥!？ |
![]() |
| 婆羅浮屠最頂嘅圓塔 |
於最頂層找到個地方坐下來，取出網上print好有關於婆羅浮屠嘅維基百科，身處其中，慢慢來細味這地方吧。
臨走前終於有少少太陽，日落嘅陽光從厚厚嘅烏雲間照射，當堂令圓形佛塔添上色彩。由於園區下午6時多就關閉，遊客不能在這裡觀賞整個日落時刻，而沿路就有好多賣紀念品嘅人盡最後努力搵生意。
離開婆羅浮屠，取回電單車，趁天未黑齊全速回程。於支路駕駛期間遇上壯麗嘅晚霞，攝影界俗稱火燒雲。回想剛才經過稻田，看到稻田旁嘅晚霞真是一絕，返唔返轉頭好呢？又怕一陣回程天黑駕車危險。返？唔返？好！唔想有遺憾，就返轉頭吧！回到稻田旁停下來，慢慢拍攝一番，也用心來感受。好彩租電單車，如搭公共交通工具就不能看見美景時話停就停了。
日落後，基本上跟世界好多地方一樣是無街燈的，小心駕駛回日惹市。於日惹市邊陲，看到有類似熟食市場連超市嘅地方叫indogrosir，食了好味炒飯同雜菜，印尼炒飯果然名不虛傳！飯後也冒險食冰類甜品，好在之後無肚痾，你知落後國度食這類冰類甜品是有風險嘛! 之後順道去超市購物，物價大部份等於香港嘅1/3。看見止汗劑洗面膏差不多用完，就買了一點這類日常用品自用，也買了些少零食作手信。就算幾平都好，我嘅宗旨係唔會瘋狂掃貨的。
晚上1000回到酒店，沖涼後去附近嘅按摩店，港女按腳、我就按肩頸。雖然11點後要收附加費，但都算抵，鬆完筋骨就返酒店搵周公了。約港幣$100兩個鐘。
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
