9-4-2016：半熟手媽媽12m．曉曉生日週

由 Rita 於 2016-04-09 00:00:00 發表 | 累積瀏覽 164

分類：

不經不覺，曉曉一歲了﹗﹗﹗舊年嘅4月8日緊急開刀生曉嘅印象依然深刻呢(請參閱：8-4-2015：懷孕扎記37w4d The End + 新手媽媽序章．曉曉出生了﹗)，咁快就一年了，曉曉一歲，感覺大個好多呢～未來一年都要健健康康長大，開開心心同爸媽過每一日呀﹗有咗你，我哋嘅生活雖然更累更忙碌，但亦更豐富更多樂趣呢～

曉曉生日週慶祝序幕由4月6日(星期三)開始，一早已經決定要4月9日辦生日會，但適逢公公要出差，冇辦法參加曉曉人生嘅第一個生日會，有啲遺憾呢，所以率先提早切咗第一個生日蛋糕﹗話說我哋為咗生日會嘅唱蠟燭環節，其實幾日之前已經開始同曉練習呢個sequence：生日歌 ->好嘢﹗->吹吹﹗雖然佢嘅吹吹冇乜氣出，主要都係「bu」一下，嘴唇震震地咁啦，但都似模似樣咁～不過到真正切蛋糕時，因為要等埋爸爸放工返嚟，曉已經開始眼瞓呢，興緻比較低，影相時都不太耐煩，直至第一口蛋糕入咗口先有番啲笑容～

有段小插曲，因為蛋糕食得七七八八時，公公開始切橙俾大家食，平時曉曉都好鍾意食橙嘛，所以佢又伸手一指表示：「我又要食橙﹗」媽媽已經警告過你啦，食完蛋糕再食橙，啲橙冇平時嘅咁好味㗎，曉當然唔明白啦，一食落去就覺得俾橙佢嘅爸爸欺騙咗佢，怒啤咗一下﹗>_<“哈，雖然慘慘，但我哋個個都忍唔住笑咗呢～小朋友，經一事長一智啦～

生日慶祝嘅第二波就到正日4月8日(星期五)了﹗因為係媽媽嘅上班日，所以放工先去葉太度接番屋企，呀，要多謝葉太嘅生日禮物，風褸好靚丫～自從曉開始跟我哋食大人嘢，經常食到津津有味，我就決定要佢生日帶佢去食自助餐，可以開懷大嚼一番﹗

地點？就去黃金海岸酒店啦，近近地，啱啱有promotion，上網訂座有折扣呀～我專登早少少同曉曉出門口，可以帶大鄉里曉去酒店開開眼界嘛，果然，我哋係lobby玩得好開心呢，曉可以落地行行，又可以睇下噴水池、花花，仲可以撩個阿姨玩添～

時間咁上下，我哋去入座先，趁爸爸未到⋯

我哋兩母女開心自拍下先～

原本都想等埋day嚟先一齊出去拎食物，但曉已經餓到頂唔順，媽媽唯有帶埋曉曉出去拎少少啦，hip seat+手臂夾住曉，gogogo﹗

陪我哋就去過幾次自助餐，之前幾次只淺嚐過麵包同水果，今次真正有份食啦﹗jap jap jap～

原本我已經帶咗蠟燭，打算食甜品時拎件cake可以嚟多個小型生日會，唱首生日歌，影張相咁，但到甜品時曉曉已經超眼瞓了，哎吔吔，變成急急腳執嘢走返屋企咯，都未行到出路口佢就瞓著咗了⋯

到4月9日嘅重頭戲啦﹗因為我細個時年年媽咪都會同我搞生日會，小學時仲有每年有兩個添，一個邀請同學仔嚟屋企，一個就同我婆婆阿姨嗰啲慶祝，有時自己一家人仲會有多個mini切蛋糕添～因為我嘅童年太幸福了，我都好想俾同樣嘅幸福我個女，媽媽會為你搞生日會，直至你同朋友仔自己出去慶祝嘅一日，但一家人嘅晚飯一定要食到成年以後哦，好似媽媽生日會繼續同公公婆婆慶祝一樣﹗

原本諗住屋企搞生日會就算，可能請唔到咁多人咯，但姨媽話可以book佢公司會所嘅廚藝室開party，good喎，客人又可以多啲，又有for小朋友嘅遊戲室，樓下仲有公園添，太好了～所以可以請到太嬷爺爺嬤嬤姑媽一家姑姐婆婆姨媽姨丈，仲有表姨媽一家表舅父一家媽媽嘅好朋友同佢哋嘅bb嚟添～

食物訂咗GFOOD到會，再加埋一田壽司同少少水果、生日蛋糕，咁就夠晒食啦～切生日蛋糕嘅狀況同我理想中唔係好同，因為同曉曉rehearsal過幾次，以為佢會好似係屋企時開心拍掌同埋「fu fu」，但佢又肚餓到頂唔順，而且好似有少少俾太多客人嚇親呢，唱生日歌時居然喊丫～而且冇辦法好好影相，本身想逐一同每個party影相留念，但結果只影到大合照～

食食食之後就變番開心曉又鮮蹦活跳了﹗最開心係送客時不停笑笑同埋同大家揮手～

我大個女了，係一歲曉﹗﹗多謝大家來臨我生日會﹗

前往其他半熟手媽媽blog